19°C , Partly cloudy | Kigali-Rwanda

Athletisme:  Rwamagana Marathon Challenge 2020 izitabirwa n’abasaga ibihumbi 5

Yanditswe na BUGINGO FIDELE

Ku ya 14-02-2020 saa 09:20:41
Hakizimana John wegukanye isiganwa riheruka mu kiciro cy'abagabo ubwo yashyikirizwaga igihembo na Guverineri w'Intara y'Uburasirazuba, Mufulukye Fred

Akarere ka Rwamagana ku bufatanye n’Ishyirahamwe ry’imikino ngororamubiri mu Rwanda “RAF” n’abaterankunga batandukanye bateguye irushanwa rya Marato rizaba tariki 16 Gashyantare 2020.

Iri rushanwa rizaba mu byiciro 3 hari abazasiganwa  Marato “Full Marathon” (42,196 km),  igice cya Marato “Half Marathon” (21.098 km) ndetse n’abasiganwa bishimisha “Run for fun”  bazasiganwa kirometero 10.

Umunyamabanga wa RAF, Umutangana Olivier aganira n’imvaho Nshya tariki 13 Gashyantare 2020 yavuze ko hamaze kwiyandikisha abantu basaga 1700 kandi bagikomeza kwiyandikisha kuko aba  hatarimo abazasiganwa bishimisha.

Yagize ati: “Abantu bakomeje kwiyandikisha kandi turizera ko  irushanwa muri rusange rizitabirwa n’abagera ku bihumbi 5”.

Iri rushanwa ryateguwe mu rwego rwo guha abakiri bato umwanya wo kwigaragaza ndetse no kwegereza amarushanwa abaturage. Uretse ibi uyu uzaba ari n’umwana mwiza ku bakinnyi bazaserukira u Rwanda muri shampiyona y’Isi mu gice cya Marato “World Half Marathon Championships 2020” izabera mu mujyi wa Gdynia muri Pologne tariki 29 Werurwe 2020. Ni isiganwa rya kabiri ribaye nyuma y’iryabereye i Huye “Huye Half Marathon 2020” tariki 18 Mutarama 2020.

Iri siganwa rigiye kuba ku nshuro ya 6  ryateguwe ku bufatanye bw’inzego zitandukanye  zirimo Akarere ka Rwamagana n’Intara y’Ibutasirazuba ari naho rizabera, Minisiteri ya Siporo, RAF, Musada, Jibu, SFH, Agrotech, AEE, Polisi y’igihugu, AVEGA, Dereva Hotel, Croix Rouge, IntraHealth n’Inama y’Igihugu y’Urubyiruko.

Ubwo iri rushanwa riheruka muri 2019, Hakizimana John mu kiciro cy’abagabo ni we wabaye uwa mbere muri Marato “Full Marathon”  akurikirwa na  Ndagijimana Enock (Nyanza)  na Habakurama Frederic (Kicukiro. Mu bagore uwa mbere yabaye Nyirarungwa Mediatrice (Kicukiro) akurikirwa na Musengimana Pelagie (Gakenke) na Uwimana Jeanette (Kicukiro).

Mu gice cya Marato “Half Marathon”, mu bagabo uwabaye uwa mbere ni  Nimubona Yves (Kicukiro) akurikirwa na Hitimana Noël (Kicukiro) na Hakizimana Jean D’amour (Rubavu). Mu bagore uwa mbere yabaye Yankurije Marthe (Kicukiro), Niyirora Primitive (Burera) na Musabyeyezu Adeline (Ngoma).

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.