18°C , Partly cloudy | Kigali-Rwanda
Nyirarukundo Salome (wa gatatu uturutse iburyo), wabaye uwa gatatu mu isiganwa ryabereye i Barecelone.

Athletisme: Nyirarukundo yishimiye umusaruro yagize mu isiganwa ryabereye i Barcelone

Yanditswe na NKOMEJE GUILLAUME

Ku ya 14-02-2018 saa 06:28:41

Nyirarukundo Salome ukina imikino ngororamubiri yo gusiganwa ku maguru “Athletisme”, yitwaye neza yegukana umwanya wa 3 mu isiganwa ryabereye i Barcelone muri Espagne “Barcelona Half Marathon”, ryabaye ku cyumweru tariki 11 Gashyantare 2018.

Nyirarukundo Salome (wa gatatu uturutse iburyo), wabaye uwa gatatu mu isiganwa ryabereye i Barecelone

Uyu mukinnyi mpuzamahanga w’umunyarwandakazi, yaje ku mwanya wa 3 aho mu gusiganwa ahareshya n’ibilometero 21, yakoresheje isaha imwe iminota 8 n’amasegonda 48 “1h8’48’’).

Nyirarukundo akaba yarushijwe na Tejitu Daba ukomoka muri Bahrain wegukanye iri siganwa amasegonda 12 (1h08’36’’) ndetse n’amasegonda 13 kuri Dibabe Kuma wo muri Ethiopia wabaye uwa kabiri muri iri siganwa aho yakoresheje 1h08’37’’.

Mu kiganiro yagiranye n’Imvaho Nshya, Nyirarukundo Salome yatangaje ko yishimiye uburyo yitwaye muri iri siganwa muri rusange. Avuga ko kwitwara neza bisobanuye ko yihesheje agaciro ndetse akaba ari n’umuhigo yesheje nk’umunyarwandakazi.

Yagize:“Ni ibyishimo bikomeye kandi ni agaciro nihesha muri rusange. Ikindi ni umuhigo wo ku rwego rw’igihugu nesheje nk’umunyarwandakazi”.

Nyirarukundo usanzwe ukinira ikipe ya APR Athletic Club, wari imbere muri iri siganwa mu bilometero 20 na metero 300 bakaza kumunyuraho muri  metero 700 za nyuma, atangaza ko agifite ikibazo mu bijyanye no gusoza.

Yemeza ko iri siganwa rya “Barcelona Half Marathon”, ryamweretse uko ahagaze kugeza ubu ndetse n’icyo abura kugira ngo azabashe kwegukana umudali wa mbere mu marushanwa ahuza ibihugu bikoresha ururimi rw’icyongereza “Commonwealth Games 2018” azabera muri Australia kuva tariki 04-15 Mata 2018.

Nyirarukundo Salome watangiye neza uyu mwaka wa 2018, yegukana irushanwa rya “Kigali Half Maraton” ritegura Marato mpuzamahanga y’Amahoro “Kigali International Peace Maraton”, kuri ubu aherereye muri Kenya aho ari gukorera imyitozo yitegura aya marushanwa ya Commonwealth Games 2018.

TANGA IGITEKEREZO

Leave a Reply

Be the First to Comment!

avatar