21°C , Intermittent clouds | Kigali-Rwanda
Ubwo Muhitira yari-ahagurutse mu Rwanda yerekeje muri Congo Brazzaville

Athletisme: Muhitira yitabiriye isiganwa mpuzamahanga rizabera muri Congo Brazzaville

Yanditswe na NKOMEJE GUILLAUME

Ku ya 13-08-2019 saa 10:00:25

Muhitira Felicien ukina imikino ngororamubiri yo gusiganwa ku maguru “Athletisme” yitabiriye isiganwa rya “Semi Marathon International de Brazzaville- SMIB 2019” rizabera muri Congo Brazzaville tariki 14 Kanama 2019.

Uyu mukinnyi watoranyijwe n’ishyirahamwe ry’imikino ngororamubiri mu Rwanda “RAF” kuba ari we uzahagararira igihugu muri iri siganwa yahagurutse i Kigali, yerekeza muri Congo Brazzaville ejo hashize tariki 12 Kanama 2019.

Muhitira akaba kandi ataragiye wenyine kuko yajyanye n’itsinda ry’abandi bakinnyi bo muri Congo Brazzaville bari bamaze iminsi mike bitoreza mu Rwanda mu rwego rwo kwitegura neza iri rushanwa rizabera iwabo.

Aganira n’Imvaho Nshya, Muhitira Felicien yatangaje ko afite intego yo kwitwara neza muri iri siganwa akaba yahesha ishema igihugu agiye ahagarariye nubwo bizaba bitoroshye ahanini bitewe n’abandi  bakinnyi bakomeye bazaba bahatana.

Avuga ko amaze iminsi yitoreza i Kibungo mu Ntara y’Iburasirazuba ari naho mu rugo kandi iyo myitozo ikaba yaragenze neza.

Ati: “Maze iminsi nitoreza i Kibungo, niho mu rugo iyo ndi mu Rwanda, ni imyitozo yabaye myiza, bityo bikaba bimpa ikizere cy’uko nzitwara neza, nkazamura ibendera ry’igihugu.”

Muhitira Felicien uzwi ku izina rya “Magare” ni umwe mu bakinnyi bazaba bitezwe cyane muri iri siganwa bitewe n’uko ari we ufite agahigo ko kuba yararitwaye mu myaka ibiri ishize (2017 na 2018).

Mu mwaka ushize wa 2018  ubwo iri siganwa ryabaga ku nshuro ya 15 rikitabirwa n’abagera ku bihumbi 2, Muhitira yegukanye umudari wa zahabu nyuma yo gusoza ari ku mwanya wa mbere aho mu gusiganwa intera y’ibirometero 21 na metero 100 yakoresheje  isaha imwe, iminota 4 n’amasegonda 35.

Yakurikiwe n’undi munyarwanda, Hitimana Noel wakoresheje  isaha imwe, iminota 6 n’amasegonda 23 naho Ezekiel Kipsang wo muri Kenya  yaje ku mwanya wa 3 (1h07’50”).

Nyuma yo kwegukana iri siganwa, Muhitira yahawe miriyoni 2,5 z’ama CFA akoreshwa muri Congo Brazzaville akaba angana na miriyoni 3,7  z’amafaranga y’u Rwanda naho  Hitimana Noel wabaye uwa 2 ahabwa miriyoni 2 angana na miriyoni 3 z’amafaranga y’u Rwanda.

Muhitira Felicien usanzwe aserukira u Rwanda mu mikino ngororamubiri, yitabiriye iri siganwa yaherukaga kwitwara neza yongera kwisubiza umudari wa zahabu mu isiganwa rya “Semi Marathon Marvejols-Mende 2019” ryabereye mu gihugu cy’u Bufaransa tariki 21 Nyakanga 2019.

Biteganyijwe ko namara gukina iri siganwa azahita atangira umwiherero  yitegura shampiyona y’Isi “World Athletics Championship 2019” izabera i Doha muri Qatar kuva tariki 27 Nzeri kugeza 6 Ukwakira 2019.

Ubwo Muhitira yari-ahagurutse mu Rwanda yerekeje muri Congo Brazzaville

TANGA IGITEKEREZO

Leave a Reply

Your email address will not be published. Required fields are marked *