28°C , Sunny | Kigali-Rwanda

Athletisme: Abakinnyi bazitabira shampiyona y’Isi  bagiye guhabwa ubufasha  ngo bitegure

Yanditswe na BUGINGO FIDELE

Ku ya 09-09-2019 saa 17:11:49
Muhitira Felicien uzaserukira u Rwanda muri shampiyona y'Isi i Doha muri Qatar

Abakinnyi 2 ari bo Muhitira Felicien “Magare” na Mukandanga Clementine  ni bo bazaserukira u Rwanda muri shampiyona y’Isi mu mikino ngororamubiri “IAAF World Athletics Championships 2019” izabera i Doha muri Qatar kuva  tariki 27 Nzeri kugeza 06 Ukwakira 2019.

Aba bakinnyi bombi n’ubwo barimo kwitegura ariko nta bufasha bari bahabwa   nk’abitegura  guserukira igihugu muri iri rushanwa rigiye kuba ku  nshuro ya 17.

Muhitira Felicien yatangarije Imvaho Nshya ko hari gahunda yari yakoze yo kwitegura ariko biba bigoye kwitegura neza uko bikwiye atabonye ubufasha.

Umunyamabanga mukuru  w’ishyirahamwe ry’imikino ngoramubiri mu Rwanda “RAF”, Umutangana Olivier yatangarije Imvaho Nshya  ko aba bakinnyi  kuva kuri uyu wa Kabiri tariki 10 Nzeri 2019 bagomba guhabwa ibimufasha mu myitozo ku bufatanye bwa RAF  na Minisiteri y’Umuco na Siporo “MINISPOC”.

Yakomeje avuga ko Muhitira yahisemo kwitoreza mu Karere ka Ngoma aho akomoka mu gihe  Mukandanga Clementine  arimo kwitoreza mu Butaliyani ariko azaza  gukomereza imyitozo  mu Rwanda kuva tariki 11 Nzeri 2019.

Aba bakinnyi bombi bazaserukira u Rwanda muri Marato (42km) babonye itike nyuma yo kwitwara neza  aho babonye ibihe bisabwa “Minima”  n’ishyirahamwe mpuzamahanga ry’imikino ngororamubiri  “IAAF”.  Mu  bagabo ibihe bisabwa ni amasaha 2 n’iminota 16 mu gihe mu bagore ari amasaha 2 n’ iminota 37.

Muhitira  yabonye bwa mbere itike  mu Gushyingo 2018 ubwo yegukanaga umwanya wa 5 mu irushanwa   “Asics Firenze Marathon 2018” ryabereye mu Butaliyani   aho yakoresheje amasaha 2, iminota 14 n’amasegonda 32.

Muri iri siganwa ni ho Mukandanga Clementine  nawe yaboneye itike aho yasoreje ku mwanya wa 3 akoresheje  amasaha 2,  iminota 30 n’amasegonda 59.

Muhitira yongeye kwitwara neza mu irushanwa  rya marato “Roma International Marathon 2019” yabereye i Roma mu Butaliyani tariki 7 Mata 2019 aho  yegukanye umwanya wa 6 akoresheje amasaha abiri n’iminota 10 n’amasegonda 58, ibi akaba ari byo bihe byiza amaze gukora.

N’ubwo shampiyona y’Isi 2019 izatangira tariki 27 Nzeri 2019, aba bakinnyi b’u Rwanda bazakina tariki 29 Nzeri 2019. Mu bagabo bazakina mu gitondo naho mu bagore bakine nyuma ya saa sita.

Muhitira ni inshuro ya kabiri agiye kwitabira shampiyona y’Isi  akaba yaritabiriye bwa mbere muri 2015 ubwo yaberaga Beijing mu Bushinwa aho yasiganwe muri metero 5000, gusa ntabwo yabashije kugera ku mu kino wa nyuma kuko atabashije kurenga amajonjora.

Muri 2017, shampiyona y’Isi yitabiriwe n’umukinnyi  umwe ari we Nyirarukundo Salome mu gusiganwa metero ibihumbi 10 asoreza ku mwanya wa 25.

Muhitira Felicien uzaserukira u Rwanda muri shampiyona y’Isi i Doha muri Qatar

Mukandanga Clementine nawe uzibira shampiyona y’Isi mu kiciro cy’abagore

TANGA IGITEKEREZO

Leave a Reply

Your email address will not be published. Required fields are marked *