18°C , Mostly cloudy with thunderstorms | Kigali-Rwanda
AS Kigali ni yo iyoboye urutonde rwa shampiyona by'agateganyo

AS Kigali iyoboye shampiyona mbere y’uko Rayon na APR FC zikina imikino y’ibirarane

Yanditswe na BUGINGO FIDELE

Ku ya 14-03-2018 saa 07:57:45

Ikipe ya AS Kigali ni yo iyoboye urutonde rwa shampiyona by’agateganyo aho mu mikino 15 ifite amanota 29. Gusa n’ubwo iyoboye urutonde ishobora gutangaza uyu mwanya mu gihe ikipe ya APR FC na Rayon Sports zatsinda imikino y’ibirarane.

AS Kigali ni yo iyoboye urutonde rwa shampiyona by’agateganyo

Iyi kipe ya AS Kigali ni yo yasoje imikino ibanza shampiyona aho ku mukino w’umunsi wa 15 yakiriye Musanze FC ikabasha kuyitsinda ibitego 4-3. Gutsinda uyu mukino byatumye iyi kipe itozwa na Nshimiyimana Eric ifata umwanya wa mbere n’amanota 29 aho mu mikino 15 yatsinze  imikino 8, inganya 5 igatsindwa 2.

Hasigaye  imikino 4 y’ibirarane

Kugira ngo imikino ibanza ya shampiyona isozwe  hagomba kuba imikino 4 y’ibirarane ku makipe ahagarariye u Rwanda mu mikino y’Afurika.

Ikipe ya APR FC ni yo ifite imikino myinshi (3) y’ibirarane harimo umukino w’umunsi wa 13 yagombaga gukina na Etincelles FC. Nk’uko tubikesha ishyirahamwe ry’umupira w’amaguru mu Rwanda, uyu mukino biteganyijwe ko uzaba tariki 25 Werurwe 2018 ubere i Rubavu.

Umukino wa kabiri w’ikirarane ni uw’umunsi wa 14 aho  APR FC  izakina na Gicumbi FC, umukino ukazabera i Gicumbi, tariki 28 Werurwe 2018  naho umukino wa 3 akaba ari uw’umunsi wa 15 aho APR FC igomba kwakira Espoir FC, gusa bikaba bitaratangazwa igihe uyu mukino uzabera.

Undi mukino w’ikirarane ni uwa Rayon Sports aho yagombaga gukinana na Sunrise FC ku mukino w’umunsi wa 14, uyu mukino ukaba uzakinwa tariki 26 Werurwe 2018 ukabera i Nyagatare.

Izi kipe zombi n’izitsinda iyi mikino y’ibirarane zizahita zikura ku mwanya wa mbere ikipe ya AS Kigali.

Mbere y’iyi mikino y’ibirarane, AS Kigali irayoboye n’amanota 29, ikurikiwe na Kiyovu n’amanota 28 na Rayon Sports n’amanota 27. APR FC ni iya 7 n’amanota 21. Umwanya wa nyuma wa 16 hari Gicumbi n’amanota 11.

TANGA IGITEKEREZO

Leave a Reply

Be the First to Comment!

avatar