27°C , Partly sunny | Kigali-Rwanda
Arakangurira urubyiruko ubworozi bw’amafi kuko butanga inyungu vuba

Arakangurira urubyiruko ubworozi bw’amafi kuko butanga inyungu vuba

Yanditswe na Dusingizumuremyi Vestine

Ku ya 17-12-2018 saa 05:55:51

Niyibizi Jean Pierre utuye mu Mudugudu wa Ndengwa, Akagari ka Kibirizi, Umurenge wa Rubengera, mu karere ka Karongi, ahereye ku byo ubworozi bw’amafi bumaze kumugezaho arashishikariza urubyiruko kubwitabira kuko bwabafasha kwiteza imbere mu gihe kihuse.

Niyibizi avuga ko aho kugira ngo urubyiruko rwirirwe rushakisha akazi ko mu biro, rwashaka uko ruhanga imirimo itandukanye irimo n’ishingiye ku buhinzi n’ubworozi kuko na yo iteza imbere uyikora mu buryo bw’umwuga.

Uyu mworozi afite ibyuzi yikoreye, abimaranye imyaka 15, abasha gusaruramo ibiro biri hagati 300 na 500 mu gihe cy’amezi atandatu kandi agasigamo n’andi mafi ari kororoka.

Ati: “Nahisemo gukora umushinga w’ubworozi bw’amafi kuko nari mfite ubutaka, nshukura aho azaba nko muri metero ebyiri z’ubujyakuzimu nyoboramo amazi, nteraho ubwatsi ku mpande kugira ngo hatazazamo isuri, nshyiramo ibiro 2400 by’abana b’amafi nguze ikiro kimwe ku mafaranga 2500”.

Niyibizi avuga ko afite ibyuzi biri ku buso bwa are 60. Ati: “Ubu nibariye umushahara nta bwo najya munsi y’ibihumbi 60 ku kwezi. Amafi uyagaburiye neza mu mezi ane, atandatu utangira gusarura, ubu nange nzitaho nkazigaburira, umusaruro nkawujyana ku isoko, iyo nasaruye nsarura ibiro biri hagati ya 300 na 500 ariko ubwo mba nakuyemo izikuze akiri mato nkayasubizamo, amafi abiri apima ibiro bitatu”.

Yongeyeho ati: “Ubworozi bw’amafi butanga umusaruro kuko yororoka buri munsi”.

Avuga ko umusaruro abona umufasha no kunoza imirire nta bwo agurisha gusa, kandi ngo umusaruro ugera no ku baturanyi bakanoza imirire.

Niyibizi ahamya ko ibanga ryo kugira ngo amafi yororoke ari ukuyagaburira, kwirinda ko akuze arya akiri mato, kutarenza amezi atandatu atari yaroba n’ibindi.

Arateganya kwagura umushinga we akaba yakongeraho n’ubworozi bw’ingurube. Asaba urubyiruko rushobora kubona ubutaka rwayoboreramo amazi bigakunda rugakora ubworozi bw’amafi ngo kuko bwororoka vuba kandi bugatanga inyungu vuba.

Arakangurira urubyiruko ubworozi bw’amafi kuko butanga inyungu vuba

TANGA IGITEKEREZO

Leave a Reply

Your email address will not be published. Required fields are marked *