21°C , Partly cloudy | Kigali-Rwanda
Ubwo APR FC yashyikirizwaga igikombe cya shampiyona ya 2017-2018 mbere yo gutangira iya 2018-2019 (Foto Bugingo F)

APR FC yashyikirijwe igikombe cya shampiyona  ya 2017-2018

Yanditswe na BUGINGO FIDELE

Ku ya 20-10-2018 saa 08:25:28

Ikipe ya APR FC yashyikirijwe igikombe cya shampiyona y’ikiciro cya mbere  mu mwaka w’imikino wa 2017-2018. Umuhango wo gushyikiriza igikombe iyi kipe wabereye kuri Sitade ya Kigali i Nyamirambo ejo hashize tariki 19 Ukwakira 2018.   Iyi kipe ikaba yashyikirijwe igikombe cya shampiyona ya 2017-2018 mbere yo gutangira umwaka wa 2018-2019.

Ubwo APR FC yashyikirizwaga igikombe cya shampiyona ya 2017-2018 mbere yo gutangira iya 2018-2019 (Foto Bugingo F)

APR FC  nta bwo yashyikirijwe igikombe cya shampiyona   muri Kamena 2018 kuko umukino w’umunsi wa nyuma ukirangira yahise yerekeza muri Tanzania mu mikino ya CECAFA Kagame Cup 2018.

Mbere yo gutangiza  umwaka w’imikino wa  2018-2019, APR FC yabanje guhabwa iki gikombe giherekejwe na miliyoni 25 z’amafaranga y’u Rwanda.  APR FC iki gikombe ni icya 17 yegukanye kuva mu 1995 ikaba yeraherukaga iki gikombe muri 2016 (1995, 1996, 1999, 2000, 2001, 2003, 2005, 2006, 2007, 2009, 2010, 2011, 2012 na 2014, 2015, 2016 na 2018).

Kuba APR FC yaregukanye shampiyona ya 2017-2018 byahise biyihesha itike yo  guserukira u Rwanda mu mikino y’Afurika y’amakipe  yabaye aya mbere iwayo “Total CAF Champios League 2018-2019” izatangira mu  Gushyingo 2018.

Muri iyi kipe bakaba bafite intego zo kwitwara neza bakaba bagera mu mikino yo mu matsinda nk’uko byagenze ku ikipe ya Rayon Sports yari yitabiriye iyi mikino muri uyu mwaka w’imikino uheruka aho yageze muri ¼ .

APR FC yatangiye shampiyona ya 2018-2019 itsinda

Nyuma yo gushyikirizwa igikombe cya shampiyona iheruka ya 2017-2018, ikipe ya APR FC yahise ikina n’Amagaju FC umukino wa mbere wa shampiyona ya 2018-2019.

Ikipe ya APR FC yatangiye neza itsinda Amagaju FC ibitego 2-0 byatsinzwe na  Hakizimana Muhadjiri ku munota wa 6  ndetse na Nshuti Dominique Savio ku munota wa 12. Iyi kipe ikaba yahise inayobora urutonde n’amanota 3.

Nyuma y’uyu mukino w’umunsi wa mbere wa shampiyona ya 2018-2019, APR FC izahura na Musanze FC mu mukino w’umunsi wa kabiri uzabera i Musanze tariki 27 Ukwakira 2018.

 

 

TANGA IGITEKEREZO

Leave a Reply

Your email address will not be published. Required fields are marked *