21°C , Partly cloudy | Kigali-Rwanda

APR FC yanganyije na AS Kigali, Rayon Sports itsinda Gasogi United

Yanditswe na BUGINGO FIDELE

Ku ya 06-01-2020 saa 08:25:21
Ubwo APR FC yanganyaga na AS Kigali mu mukino w'umunsi wa 16 wa shampiyona (Foto : Uwihanganye H.)

APR FC 0-0 AS Kigali

Heroes FC 0-1 Bugesera FC

Kiyovu 0-0 Etincelles FC

Espoir FC 1-2 Mukura

Gicumbi FC 1-2 Marines FC

Musanze FC 2-1 AS Muhanga

Sunrise FC 2-2 Police FC

Rayon Sports 1-0 Gasogi United

Mu mpera z’icyumweru gishize tariki 04 na 05 Mutarama 2020 hakinwe imikino ya shampiyona y’umunsi wa 16 ari nayo ifungura imikino yo kwishyura.

Ikipe ya APR FC yari yasoje imikino ibanza ya shampiyona ya 2019-2020 iyoboye urutonde nta bwo yatangiye neza imikino yo kwishyura kuko yanganyije na AS Kigali 0-0. Izi kipe zikaba zari zanganyije no mu mukino wa shampiyona ubanza igitego 1-1.

APR FC na AS Kigali zikunze kugorana kuko mu myaka 6 iheruka zakunze kunganya cyane kuko uyu wari umukino wa 6 zinganyije mu mikino 14 zahuye muri shampiyona mu gihe buri kipe imaze gutsinda imikino 4.

Ikipe ya Rayon Sports yitwaye neza itsinda Gasogi United igitego 1-0 cyatsinzwe na Sugira Ernest ku munota wa 55 w’umukino nyuma yo kwinjira mu kibuga asimbuye Iranzi Jean Claude ku munota wa 55. Iki gitego  kikaba ari icya mbere yari atsinze nyuma yo kugera muri Rayon Sports avuye muri APR FC.

Iyi kipe  isa n’ihanganiye igikombe cya shampiyona n’izi kipe zombi, Police FC nta bwo byayigendekeye neza kuko yanganyije na Sunrise FC ibitego 2-2, umukino  wabereye kuri Sitade ya Nyagatare.

Kunganya kwa APR FC, Rayon Sports igatsinda byatumye ikinyuracyo cy’amanota iyi kipe ya APR FC yarushaga Rayon Sports kigabanuka  amanota yari 6 aba 4. Bivuze ko  APR FC iyoboye n’amanota 38 naho Rayon Sports ikaza ku mwanya wa 2 n’amanota 34 naho Police FC ikaba ku mwanya wa 3 n’amanota 33.

Hari n’indi mikino yabaye

Mu yindi mikino yabaye, ikipe ya Bugesera FC yatsinze Heroes FC igitego 1-0, Kiyovu inganya na Etincelles FC 0-0. Iyi kipe umukino wa shampiyona uheruka w’umunsi wa 15 yari yatsinze Mukura ibitego 4-2. Mu mukino ubanza wa shampiyona, Kiyovu yari yatsinzwe na Etincelles FC ibitego 2-1.

Ikipe ya Mukura yitwaye neza itsindira Espoir FC iwayo ibitego 2-1, Gicumbi FC itsindwa na Marines FC ibitego 2-1 mu gihe ikipe ya Musanze FC yatsinze AS Muhanga ibitego 2-1.

Nyuma  y’iyi mikino y’umunsi wa 16, ikipe ya APR FC ikomeje kuyobora urutonde n’amanota 38 ikurikiwe na Rayon Sports n’amanota 34, ku mwanya wa 3 hari Police FC n’amanota 33, Mukura ku mwanya wa 4 n’amanota 28 mu gihe ikipe ya Heroes FC ari yo ikomeje kuza ku mwanya wa nyuma wa 16 n’amanota 8.

Sugira Ernest wahesheje Rayon Sports amanota 3 mu mukino we wa mbere yari akiniye iyi kipe (Foto : Uwihanganye H.)

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.