21°C , Partly cloudy | Kigali-Rwanda
Bishop John Rucyahana

Amwe mu matorero aranengwa kubangamira ubumwe n’ubwiyunge

Yanditswe na Mugisha Benigne

Ku ya 09-11-2018 saa 11:01:52

Imiryango ishingiye ku madini n’amatorero ya ADEPR, Eglise Methodiste du Rwanda na Islam yanenzwe kubangamira ubumwe n’ubwiyunge ku kugero cya 10%.

Ibi ni ibyatangajwe na Bishop Rucyahana John, Perezida wa Komisiyo y’Igihugu y’Ubumwe n’Ubwiyunge (NURC) muri raporo iyi Komisiyo yagajeje ku Nteko rusange ya Sena, mu rwego rwo kugaragaza intera ubumwe n’ubwiyunge bw’Abanyarwanda bugezeho.

Bishop Rucyahana ati “Hakozwe icukumbura ryimbitse ku bumwe n’ubwiyunge muri imwe mu miryango ishingiye ku idini yagaragayemo ibibangamira ubumwe n’ubwiyunge ku kigero cy’10%, iyo miryango ni ADEPR, Eglise Methodiste Libre n’umuryango w’aba Islam mu Rwanda.”

Bishop Rucyahana yavuze ko mu Itorero rya EMLR na ADEPR hagaragaye ibibazo by’amacakubiri ashingiye ku moko y’Abahutu n’Abatutsi.

Rucyahana avuga ko mu idini ya Islam ho ibibangamiye ubumwe n’ubwiyunge bishingiye ku myemerere n’amahame atandukanye, bituma batumvikana ku buryo bwo gushyiraho ubuyobozi n’uburyo bwo gusenga.

Yagize ati “ Ibi byose biterwa no kwikunda kwa bamwe n’inyungu ku bandi, usanga bari mu itorero cyangwa idini rimwe bahanganiye ubuyobozi cyangwa ibindi bintu bigera mu itorero.”

Rucyahana avuga ko ntawe ukwiye kwishingikiriza icyo ari cyo ngo abangamire inzira y’ubwiyunge bw’Abanyarwanda, asaba buri wese kwimakaza icyabuteza imbere n’icyatuma abantu babana neza mu mahoro.

Bamwe mu bayoboke b’ayo madini n’amatorero baganiriye n’Umvaho Nshya bayibwiye koko mu madini n’amatorero yabo hagiye hazamo ibibazo by’ubushyamirane no guhangana, ngo kandi koko bigira ingaruka ku bayoboke b’ayo madini.

Umwe mu bayoboke w’Itorero rya Methodiste avuga ko higeze kubamo amacakubiri hagati y’abayoboke, ariko ngo akenshi bituruka ku bashumba kuko haba hari inyungu babifitemo, maze abayoboke na bo bakagurikira buhumyi.

Undi wo muri ADEPR avuga ko no mu itorero iwabo havutsemo ibibazo byo guhangana biturutse ku bukungu bw’iri torero, ariko ngo iby’amacakubiri hagati y’Abahutu n’Abatutsi byo nta byo yabonye.

Avuga ko ahubwo bahanganiye amafaranga aboneka mu Itorero biza kuba bibi mu gihe cyo kubaka Ihoteli y’iri torero ku Gisozi.

TANGA IGITEKEREZO

Leave a Reply

Your email address will not be published. Required fields are marked *