23°C , Mostly cloudy | Kigali-Rwanda
Ambasaderi w'u Buyapani mu Rwanda, Takayuki Miyashita (Foto Munyentwari Charif)

Ambasaderi w’u Buyapani mu Rwanda yavuze ku mubano w’ibihugu byombi

Yanditswe na Kayitare Jean Paul

Ku ya 14-03-2019 saa 12:46:29

U Buyapani n’u Rwanda bifatanye umubano w’imyaka irenga 50 ishize mu nzego zitandukanye zirimo uburezi, ubuhinzi, gukwirakwiza amazi meza, ikoranabuhanga, serivise n’ibindi.

Umubano w’ibihugu byombi ushingiye ku bukungu, ubucuruzi, inkunga n’inguzanyo, ubufasha bwa tekiniki no guhugura abantu.

Kugeza ubu mu Rwanda hari kompanyi 24 z’Abayapani zikora ibikorwa by’ubucuruzi.

Mu mishinga igamije kongera ingufu z’amashanyarazi, u Buyapani bwateye inkunga u Rwanda ya miliyoni zirenga 30 z’amadorari y’Amerika yakoreshejwe mu kubaka, gusana no kuvugurura zimwe mu nganda z’amashanyarazi (Substations).

Mu kiganiro n’itangazamakuru cyabereye kuri Ambasade y’u Buyapani i Kigali, Ambasaderi w’u Buyapani mu Rwanda Takayuki Miyashita, yagarutse ku mubano w’ibihugu byombi kandi ko uzakomeza uko umeze.

Yagize ati “Nizera ko igihugu cy’u Buyapani n’u Rwanda ari inshuti nziza kandi umubano w’ibihugu byombi uhagaze neza kandi uzakomeza gutyo binyuze mu bufatanye dusanzwe tugirana nk’ibihugu byombi.”

Amb. Miyashita akomeza avuga ko igihugu ke ahagarariye mu Rwanda kizakomeza gutera inkunga imishinga inyuranye kugira ngo Umunyarwanda ashobore kubaho neza.

Ati “Dutera inkunga imishinga y’iterambere ry’u Rwanda kandi umuturage agashobora kubaho neza kandi tuzaharanira gukomeza gukora ibi”.

Ku nkunga y’u Buyapani, u Rwanda rurateganya kugira icyogajuru cyarwo mu kirere, ibyo bikazarufasha kwigenga mu bijyanye n’isakazamakuru ku buryo busesuye.

Ambasaderi Miyashita yavuze ko igerageza rya mbere ry’icyo cyogajuru ryageragejwe n’itsinda ry’impuguke z’Abanyarwanda n’Abayapani mu nama y’ikoranabuhanga muri ‘Transform Africa 2018’.

Ambasaderi w’u Buyapani mu Rwanda, Takayuki Miyashita (Foto Munyentwari Charif)

Kugira ngo ibyo bigerweho, hari ibigo bibiri byo mu Buyapani harimo JICA (Japan International Cooperation Agency) na JAXA (Japan Aerospace Exploration Agency) bikomeje gukorana n’u Rwanda, hakaba hari n’Abanyarwanda barenga 35 barimo kwiga ibijyanye n’ibyogajuru mu Buyapani.

Cyuzuzo Yves ni umwe mu bagize amahirwe yo kujya kwiga mu Buyapani binyuze muri gahunda y’ubufatanye hagati ya Leta y’u Rwanda n’u Buyapani, ABE Initiative.

ABE Initiative (African Business Education Initiative for Youth) ni gahunda iha amahirwe yo kwiga ikiciro cya 3 cya kaminuza no kwimenyereza ku rubyiruko rwo muri Afurika rugaragaza ubushobozi bwo kuba rwateza imbere ibijyanye n’inganda muri Afurika.

Cyuzuzo avuga ko yasanze umubano w’u Buyapani n’u Rwanda udashingiye gusa ku bubanyi n’amahanga, ahubwo ngo mu Buyapani bafite umuco ujya kumera nk’uwo mu Rwanda kuko abaturage baho batuje nk’Abanyarwanda gusa ngo bakagira akarusho ko kugira ikinyabupfura kinshi, gukunda umurimo no kunoza ibyo bakora.

U Buyapani bumaze guha u Rwanda inkunga mu mishinga myinshi y’iterambere irimo kubaka umupaka ugezweho wa Rusumo, umushinga urimo gukorwa wo kuvugurura umuhanda wa Kagitumba – Kayonza – Rusumo aho u Buyapani bubinyujije muri JICA, bwatanze inkunga ya miriyoni 56 z’amadorari.

TANGA IGITEKEREZO

Leave a Reply

Your email address will not be published. Required fields are marked *