21°C , Partly sunny | Kigali-Rwanda
Ambasaderi wa Suwede mu Rwanda Jenny Ohlsson (uwa kabiri uturutse ibumoso), ukurikiyeho ni Guverineri Munyantwari Alphonse bishimira ubufatanye mu guteza imbere abaturage (Foto Ingabire A)

Ambasaderi wa Suwede yashimye amatsinda yo kubitsa no kugurizanya

Yanditswe na Ingabire Rugira Alice

Ku ya 06-12-2018 saa 11:35:13

Ambasaderi wa Suwede mu Rwanda, Jenny Ohlsson, nyuma yo gusura ibikorwa iki gihugu gitera inkunga mu Karere ka Nyamasheke amatsinda y’abagore n’urubyiruko yo kubitsa no kugurizanya.

Abaturage bafashijwe kwishyira hamwe na Suwede binyuze muri World Vision, bigishwa imyuga itandukanye no gukora imishinga.

Amatsinda yatewe inkunga ni 1.518 yo mu turere twa Rusizi na Nyamasheke, akaba yarizigamiye amafaranga asaga Miriyoni 687, akaba yarahawe inguzanyo ya Miriyoni 486.

Abayagize bakaba bashimiwe umuhate n’umurava bagaragaje basabwa kwigisha abandi no kurushaho kumenyekanisha ibyo bakora no gukangurira bagenzi babo ibyiza byo kwishyira hamwe.

Amb. Ohlsson yagize ati: “Ambasade ya Suwede mu Rwanda igamije gufasha u Rwanda kwiteza imbere hahangwa imirimo mishya idashingiye ku buhinzi, tumaze imyaka itatu dukorana n’amatsinda atandukanye muri Rusizi na Nyamasheke binyuze mu mushinga Core ukorera muri World Vision, twabonye byarabaye igisubizo none twahisemo kuwongerera igihe ukaba imyaka cumi n’itanu.”

Yakomeje agira ati: “Turizera ko intego twihaye izagerwaho Abanyarwanda bagatera imbere biciye mu guteza imbere imirimo idashingiye ku buhinzi, ikozwe n’abagore n’urubyiruko, ibyo nabonye byaduhaye ikizere kurushaho, tuzakomeza gufatanya mu kubimenyekanisha mu ruhando mpuzamahanga. ”

Ambasaderi wa Suwede mu Rwanda Jenny Ohlsson (uwa kabiri uturutse ibumoso), ukurikiyeho ni Guverineri Munyantwari Alphonse bishimira ubufatanye mu guteza imbere abaturage (Foto Ingabire A)

Guverineri w’Intara y’Iburengerazuba, Munyantwari Alphonse, arashima abaturage bishyize hamwe bagakora amatsinda yo kubitsa no kugurizanya mu turere twa Rusizi na Nyamasheke kuko byagize uruhare mu guteza imbere abayitabiriye.

Yagize ati: “Amatsinda yo kubitsa no kugurizanya ni igisubizo kuri buri Munyarwanda wese, nta cyo wageraho udashyize hamwe n’abandi, turashima amatsinda yakozwe igihumbi magana tanu na cumi n’umunani muri Rusizi na Nyamasheke, yaje kubyara koperative mirongo ikenda n’ebyiri zikora ibikorwa byunganira ubuhinzi, ubu twishimiye ko hari impinduka, ababarizwaga mu kiciro cya mbere cy’ubudehe barisabira gushyirwa mu cya gatatu”.

Abatuye muri utu turere barashishikarizwa kurushaho kugana aya matsinda, kuko abishyize hamwe kubatera inkunga byoroha kandi bikaba igisubizo kihuse cyo gukemura ibibazo bishingiye ku bukene.

Munyantwari yagize ati: “Iyo batishyira hamwe baba bakiri mu bukene, ni yo mpamvu dushishikariza abantu kwishyira hamwe bagakora bakiteza imbere kuko ibyo gukora birahari kandi byazamura umuntu vuba.”

Nyirabwimana Esther ubarizwa mu itsinda Duharanire Ubuzima ribarizwa mu Murenge wa Kagano mu Karere ka Nyamasheke, we na bagenzi be bishyize hamwe nk’abagore bakora ibikapu nyuma yo gusanga bashoboye, byabagiriye akamaro ku buryo afite inyubako akesha guhuza imbaraga na bagenzi be.

TANGA IGITEKEREZO

Leave a Reply

Your email address will not be published. Required fields are marked *