18°C , Partly cloudy | Kigali-Rwanda

Ambasade y’u Rwanda muri Amerika yashimiye abitabiriye amatora

Yanditswe na KAYITARE JEAN PAUL

Ku ya 05-09-2018 saa 07:11:22

Ambasade y’u Rwanda muri Leta zunze ubumwe z’Amerika, yashimiye Abanyarwanda batuye mu bihugu bitandukanye byo ku mugabane w’Amerika uburyo bitabiriye amatora y’intumwa za rubanda yabaye ku cyumweru tariki 02 Nzeri 2018.

Ambasaderi w’u Rwanda muri Leta zunze ubumwe z’Amerika, Mukantabana Mathilde (Foto Rwanda Embassy in USA)

Ambasaderi Mukantabana Mathilde uhagarariye u Rwanda muri Leta zunze ubumwe z’Amerika yagize ati “Abanyarwanda mwese mwakoze ibiri mu burenganzira bwanyu nko kwitabira amatora ya 2018 y’intumwa za rubanda zizabahagararira mu Nteko Ishinga Amategeko, mwakoze.”

Abanyarwanda baba mu mahanga mu bice bitandukanye by’Isi bitabiriye ibikorwa by’amatora y’Abadepite bazabahagararira mu Nteko Ishinga Amategeko y’u Rwanda kandi yitabiriwe ku kigereranyo gishimishije nkuko byatangajwe na Komisiyo y’Igihugu y’Amatora NEC.

Ambasaderi Mukantabana avuga ko muri Leta zunze ubumwe z’Amerika gusa, hari ibiro by’itora bigera ku munani, agakomeza asobanura ko ibyakozwe n’Abanyarwanda batuye kuri uyu mugabane, ari ikimenyetso kigaragaza ko Abanyarwanda biyemeje kujya bagira uruhare mu matora.

Yagize ati “Ni ikimenyetso cy’uko Abanyarwanda biyemeje kugira uruhare mu bikorwa biranga umwenegihugu wese utuye muri diaspora, bityo akagira uruhare mu biteza imbere igihugu ke ikindi kandi akagira n’uruhare rugaragara nk’umwenegihugu.”

Abatoreye muri Leta zitandukanye zo muri Amerika boroherejwe uburyo bwo gutora nko kubegereza ibiro by’itora. Ambasade y’u Rwanda muri Leta zunze ubumwe z’Amerika, ivuga ko hari abatoreye i Washington D.C, New York, Georgia, Maine, Arizona, Texas, California no muri Leta ya Indiana.

Mu majwi y’agateganyo yatangajwe na Komisiyo y’Igihugu y’Amatora NEC, FPR-Inkotanyi, ni yo yabashije kubona amajwi menshi mu bihugu byo hanze y’u Rwanda bigera kuri 25.

 

TANGA IGITEKEREZO

Leave a Reply

Your email address will not be published. Required fields are marked *