24°C , Mostly cloudy | Kigali-Rwanda
Iburyo ni Umukuru w'Igihugu Paul Kagame, ari kumwe na Amb. William Gelling wari uhagarariye u Bwongereza mu Rwanda, aha yamuherezaga impano

Amb. Gelling yasezeye Kagame anashima imikoranire myiza

Yanditswe na TWAGIRA WILSON

Ku ya 12-01-2018 saa 07:45:42

Amb. William Gelling wari umaze imyaka ine ahagarariye u Bwongereza mu Rwanda yasezeye ku Mukuru w’Igihugu Paul Kagame. Amb. Gelling yaboneyeho gutangaza ko igihugu ke cyakoranye neza n’u Rwanda kandi yizeye ko bizakomeza.

Ku munsi w’ejo hashize tariki 11 Mutarama 2018  ni bwo Perezida Paul Kagame yakiriye mu biro bye Amb. William Gelling wari umaze igihe ahagarariye igihugu ke cy’u Bwongereza mu Rwanda.

Iburyo ni Umukuru w’Igihugu Paul Kagame, ari kumwe na Amb. William Gelling wari uhagarariye u Bwongereza mu Rwanda, aha yamuherezaga impano

Nyuma y’ibiganiro bagiranye, Amb. Gelling yabwiye abanyamakuru ko yishimira imibanire y’u Bwongereza n’u Rwanda mu myaka ine amaze ahagarariye icyo gihugu mu Rwanda, imibanire igaragara cyane mu guteza imbere ishoramari n’ubucuruzi.

Ku birebana n’imikoranire hagati y’u Rwanda ndetse n’igihugu ke, Amb. William Gelling agaragaza imikoranire myiza yabaye hagati y’u Rwanda n’u Bwongereza ahanini mu byerekeranye n’ibikorwa bigamije gutanga amahugurwa  y’ingabo zijya mu bikorwa byo gucunga umutekano mu bihugu bitandukanye mu rwego rw’Umuryango w’Abibumbye.

Ati   “Mu by’ukuri nishimiye ko u Rwanda twakoranye neza, kandi  mfite ikizere cy’uko no mu bihe biri imbere bizakomeza’’.

Ubusanzwe, ubutwererane hagati y’u Rwanda n’u Bwongereza mu nzego zitandukanye bunyuzwa mu ishami ry’u Bwongereza rishinzwe iterambere (DFID), aho ryibanda ku bikorwa byo gushyigikira no guteza imbere uburezi, ubuhinzi, gufasha abatishoboye, ubucuruzi n’ishoramari.

U Bwongereza bunafasha u Rwanda no mu bikorwa byo kwigisha amahoro  aho batanga amahugurwa ku matsinda y’Ingabo na Polisi baba bitegura koherezwa mu bikorwa byo kubungabunga amahoro mu rwego rwa Loni.

Iki gihugu kinatera inkunga imishinga yo muri aka karere irimo “Trade Mark East Africa” uyu ukaba ari umushinga ugamije koroshya ubucuruzi mu bihugu bigize Umuryango w’Afurika y’Iburasirazuba.

Amb. William Gelling ucyuye igihe mu Rwanda yasimbuwe na Amb.  Jo Lomas wari usanzwe ari Ambasaderi w’u Bwongereza muri Namibia.

 

TANGA IGITEKEREZO

Leave a Reply

Your email address will not be published. Required fields are marked *