25°C , Partly sunny | Kigali-Rwanda

Amayobera n’impaka ku rupfu rwa 2Pac

Yanditswe na SHEMA CHRISTIAN

Ku ya 01-04-2018 saa 08:36:31

Kugeza ubu impaka ziracyari zose ku rupfu rwa 2Pac , hari na bamwe bavuga ko yaba akiriho kugeza ubu bakabishingira ku ngingo nyinshi zitandukanye bagenda bagaragaza, ariko amateka yo yerekana  ko mu ijoro ryo ku ya 07 Nzeri 1996 ari bwo uyu muraperi yarashwe arakomereka bikomeye ndetse nyuma y’iminsi 6 aza gushiramo umwuka, abafana be barira ayo kwarika.

2Pac umuraperi wakunzwe n’abatari bake kugeza n’ubu urupfu rwe ntiruvugwaho rumwe

Tupac Amaru Shakur, 2Pac, Pac cyangwa se Makaveli, amazina yose yakunze kujya yiyita mu bihe bye, yavutse  tariki ya 16 Kamena 1971,  avukira Harlem agace ka Manhattan muri New York. Ni umuhungu wa Afeni Shakur na Billy Garland. Ni umwe mu baraperi bamamaye cyane muri iyi njyana mu myaka ya 90, yagurishije amakopi asaga miliyoni 75 y’alubumu ze ndetse kugeza ubu aracyafatwa nk’umuraperi w’ibihe byose.

Mu gitondo cyo ku itariki ya 7 Nzeri 1996, 2Pac yazindutse yerekeza mu mugi wa Las Vegas ubarizwa muri Leta ya Nevada, kugira ngo abashe gukurikira umukino w’iteramakofi, wari guhuza inshuti ye Mike Tyson na Bruce Seldon.

Akigera Las Vegas mu masaha y’amanywa yahise afata icyumba muri Hotel izwi cyane yitwa Luxal Hotel Casino. Uwo murwano wari witezwe n’abantu benshi ku buryo MGM Grand Hotel yari kuberamo yari yuzuye.

2 Pac akaba yari yazanye n’umuyobozi  we Marion Suge Knight umwe mu bashinze Studio 2 Pac yakoreragamo ibihangano bye, ngo birebere uwo mukino. 2 Pac hamwe n’abari bamuherekeje ari bo Suge Knight, umurinzi we Frank Alexander, ndetse n’indi nshuti imwe ya Suge Knight bafashe imyanya mu gice cy’abiyubashye, aho umwanya umwe wishyurwaga amafaranga 1 000 cy’amadorari.

Hashize iminota ibiri gusa, Mike Tyson yateye igipfunsi cy’akataraboneka Bruce Seldom ahita agwa hasi, umukino urangira utyo. Uyu mukino na wo wahise ujya  mu mateka  nk’umwe mu mikino ikomeye y’iteramakofe.

Abantu batangiye gusohoka banyuranamo bamwe bijujuta. 2 Pac, Suge Knight ndetse n’abo bari kumwe, batangiye gusohoka na bo bageze ku muryango, habayeho kurwana gutunguranye hagati ya 2 Pac n’abo bari kumwe, aho bacakiranye na Orlando Anderson umusore w’umuraperi wo mu gace ka Compton i California hamwe n’inkoramutima ze.

Imirwano yahagaritswe n’abarinzi ba hoteli ku bw’amahirwe, 2 Pac ahita yerekeza mu cyumba ke aho yari asanze umukunzi  we Kadada Jons. Amaze guhindura imyambaro  na Suge Knight bahise berekeza mu gace ka Paradise Valley mu mugi wa Las Vegas, kuri Villa y’akataraboneka ya Suge Knight.

Ahagana mu ma saa yine z’ijoro, 2Pac, Suge Knight ndetse n’abarinzi babo, berekeje mu nzu y’urubyiniro Club 662 ya Suge Knight iri ku muhanda witwa Flamingo, aha 2Pac akaba yaragombaga kuririmbana n’itsinda Run DMC, bikaba byari biteganyijwe ko na Mike Tyson na we yagombaga kuba ahari.

Agana kuri iyi nzu y’urubyiniro, 2Pac yari yicaye mu modoka ya BMW y’umukara Suge Knight ari we umutwaye aho bari baherekejwe n’imodoka 4 zirimo abarinzi babo. Saa tanu n’iminota  itanu habura ibirometero bike ngo bagere kuri Club 662, Suge Knight yahagaritswe na Polisi kubera ko yagendaga avuza umuziki mwinshi mu modoka  n’imodoka ye itari ifite ibiyiranga (plaque), ibi bikaba byaragaragajwe n’ifoto yafashwe n’umupaparazi wari hafi aho, iyi ikaba ari na yo foto yafashwe bwa nyuma 2Pac akiri muzima.

Barenze aho uwo mu polisi yarari, imodoka yabo yahise izengurukwa n’imodoka ebyiri batazi aho zivuye. Abakobwa b’abirabura bane bari bicaye mu  modoka imwe  bamwenyurira 2Pac na Suge Knight, na bo barabasuhuza.
Muri ako kanya umwe mu basore batatu bari bari mu modoka y’imbere, yahise asohora umutwe mu idirishya ry’imodoka, arekurira urufaya rw’amasasu agera kuri 13 ku modoka 2Pac na Suge Knight bari barimo.

Gushaka guhungira mu mwanya w’inyuma 2Pac  ntibyamworoheye kuko yari yambaye umukandara wo mu modoka, bituma ahita afatwa n’amasasu atatu. Ntiyari yambaye umwenda umurinda gukomeretswa n’amasasu kandi ubusanzwe yarawuhoranaga.  Suge Knight bari bicaranye we yarashwe ahagana ku irugu, ndetse n’amapine abiri y’imodoka araraswa. Ababarashe bahita bava aho bihuta cyane, bafata umuhanda w’ahitwa Coverlane.

Ubuhamya bwa Suge Knight wari kumwe na 2 Pac baraswa

Mu buhamya Suge Knight nyuma yo kurokoka yabwiye urukiko, avuga ko bakimara kuraswa, yabajije 2 Pac niba ameze neza, bitewe n’uko 2Pac yabonaga amaraso menshi ku ijosi rya Suge Knight, aramusubiza ati “Ni ngewe warashwe cyangwa ni wowe? Ndabona bakurashe mu mutwe”.

Polisi yahise ihagera berekeza kwa muganga, ariko kubera umuvuduko mwinshi mu nzira bakoze impanuka amapine yari yasigaye ari mazina na yo aratoboka, batabarwa n’ingobyi y’abarwayi yahise igera aho maze bose berekeza ku bitaro.

Nk’uko abaganga babitangaje, ngo mu nzira bagana ku bitaro 2Pac yagendaga avuga ngo ndapfuye, simbasha guhumeka. Kwa muganga bahise bamubaga inshuro eshatu, ngo barebe ko bahagarika kuvira imbere, banamuvanamo igihaha k’iburyo.

Iminsi igera kuri 6 yamaze muri koma, MC Hammer, Mike Tyson, Jasmine Guy, Pasiteri Hary Chalton ndetse na mama we Afeni Shakur, basimburanaga kuza kumusura bose bakahava n’amarira menshi.
Bitewe no gukomereka bikabije, ku wa Gatanu tariki ya 13 Nzeri 1996, saa kumi z’ijoro zirenzeho iminota itatu, 2Pac Amaru Shakur yashizemo umwuka.

Mu masa ya  mu gitondo ubwo umubyeyi we yahageraga agashyikirizwa umurambo, hakozwe imihango yoroheje i Las Vegas, aho umurambo wa Amaru 2 Pac Shakur watwitswe, bikaba bivugwa ko ivu rye ryahise rijugunywa mu nyanja. Bivugwa ko kandi bimwe mu bisigazwa bye abagize itsinda ryari inshuti ze kuva kera babivanga na Marijuana(urumogi) bakajya babinywa.

Umuntu wishe 2Pac ntiyashakishijwe cyane kuko umuryango we utabishatse gusa bakeka ko yishwe n’abigeze kumurasa mbere n’ubundi ariko ntapfe. Kuva 2Pac yapfa yabaye umunyabigwi  mpuzamahanga nka Bob Marley na Che Guevara, ubuzima bwe bwatumye habaho abitwa Tupacistas ku mihanda ya Brazil, ibikuta byo kumwibuka byubatswe ahantu hatandukanye muri Espagne, u Budage na Brazil, ndetse no kwambara bandana ku rubyiruko rwo muri Afurika y’Epfo n’ahandi bikorwa nk’urwibutso rwa 2Pac.

N’ubwo 2Pac atakiriho harakibazwa n’ubu ikihishe inyuma y’urupfu rwe. Umwe mu bari inkoramutima ze Yafeo Kadafi Fara, wari no mu bari bamuherekeje igihe yaraswaga, yavuze ko yari yiteguye gutanga ubuhamya, kuko yiboneye n’amaso ye abamurashe, ariko nyuma y’amezi abiri atangaje ibyo, umurambo we waje gutoragurwa i New Jersey.

TANGA IGITEKEREZO

Leave a Reply

Be the First to Comment!

avatar