18°C , Partly cloudy | Kigali-Rwanda
Kagere Meddie watsindiye Amavubi igitego k'impozamarira

Amavubi yatsindiwe mu rugo na Cote d’Ivoire

Yanditswe na BUGINGO FIDELE

Ku ya 10-09-2018 saa 07:33:56

Rwanda 1-2 Cote d’Ivoire

Guinea 1-0 CAR

Ikipe y’u Rwanda “Amavubi” nta bwo yitwaye  neza  nyuma yo gutsindwa  na Cote d’Ivoire ibitego 2-1  mu mukino w’umunsi wa kabiri mu itsinda H mu rwego rwo gushaka itike ya CAN 2019 izabera muri Cameroun umwaka utaha wa 2019.

Kagere Meddie watsindiye Amavubi igitego k’impozamarira (Foto N. Moses)

Muri uyu mukino wabereye kuri Sitade ya Kigali i Nyamirambo ejo hashize tariki 09 Nzeri 2018, ikipe y’u Rwanda ni yo yatangiranye ishyaka ndetse inahusha  uburyo bwinshi bwagombaga kuvamo igitego.

Igice cya mbere cy’umukino kijya kurangira ku ikosa ryakozwe  n’umunyezamu Kwizera Olivier, Cote d’Ivoire yabonye igitego gitsinzwe na  Jonathan Kodjia.

Nyuma y’iminota mike igice cya kabiri gitangiye  ni ukuvuga ku munota wa 49 Alain Gradel yatsindiye Cote d’Ivoire igitego cya kabiri nabwo ku burangare bwa ba myugariro w’u Rwanda.

Abakinnyi b’u Rwanda nta bwo  bacitse intege bakomeje gushakisha igitego maze ku munota wa 66, Kagere Meddie atsindira u Rwanda igitego ku mupira yari aherejwe na Fitimana Ombalenga nyuma y’ishoti Bizimana Djihad yari ateye rikagarurwa n’umutambiko w’izamu.

Ikipe y’u Rwanda yakomeje kotsa igitutu ikipe  ya Cote d’Ivoire dore ko mu mikino ya nyuma y’umukino, Usengimana Danny yahushije uburyo bubiri bwagombaga kuvamo igitego.

Nyuma y’uyu mukino, umutoza w’Amavubi, Mashami Vincent watozaga umukino we wa mbere nk’umutoza mukuru yatangaje ko uyu mukino wari ukomeye  ariko batagomba gutsindwa ariko kubera amakosa bakaba bayitsinzwe. Ati N’ubwo dutsinzwe abakinnyi bagerageje gukina umukino mwiza kuko twabuze n’uburyo bwinshi bwagombaga kubyara ibitego.”

Uyu mutoza akomeza avuga ko bagomba kwitegura imikino yindi iri imbere kandi yizera ko bizagenda neza hakaboneka umusaruro mwiza.

Ku ruhande rw’umutoza wa Cote d’Ivoire wari ubonye amanota 3 ya mbere muri iri tsinda, Ibrahim Camara nawe yavuze ko uyu mukino wari ukomeye cyane kuko ikipe yagaragaje umukino mwiza kandi yari ishyigikiwe n’abakunzi bayo. Ati “Ikipe y’u Rwanda yakinnye neza  byanashobokaga ko  umukino urangira ari ibitego 2-2 cyangwa 3-3”. Uyu mutoza akaba yarashimiye abakinnyi be babashije kwitwara neza bakabona amanota 3.

Izi kipe zombi zari zatsinzwe umukino wa mbere mu itsinda, u Rwanda rwari rwatsinzwe na Central African Republic ibitego 2-1 mu gihe Cote d’Ivoire yari yatsindiwe mu rugo na Guinea ibitego 3-2.

Mu wundi mukino wo muri iri tsinda H, ikipe ya Guinea yatsinze Central African Republic igitego 1-0.

Mu mikino y’umunsi wa 3 mu itsinda iteganyijwe tariki 16 Ukwakira 2018, ikipe y’u Rwanda izajya Conakry gukina na Guinea naho Cote d’Ivoire yakire Central African Republic.

 

 

TANGA IGITEKEREZO

Leave a Reply

Your email address will not be published. Required fields are marked *