17°C , Partly sunny | Kigali-Rwanda
Minisitiri Uwizeye Judith (ibumoso) na Dr Prof. Byiringiro Hesron, Umuyobozi w'Itorero ry'Abadivantisiti b'umunsi wa karindwi mu Rwanda (Foto Moses)

Amatorero n’amadini yashimiwe uruhare mu kwiyubaka k’u Rwanda

Yanditswe na MUGISHA BENIGNE

Ku ya 14-09-2018 saa 08:00:07

Ubworoherane n’ubumwe bw’amadini n’amatorero bwagize uruhare rukomeye mu kongera kubaka igihugu cy’u Rwanda nyuma ya Jenoside yakorewe Abatutsi mu 1994.

Minisitiri Uwizeye Judith (ibumoso) na Dr Prof. Byiringiro Hesron, Umuyobozi w’Itorero ry’Abadivantisiti b’umunsi wa karindwi mu Rwanda (Foto Moses)

Ibi ni bimwe mu byagarutsweho na Minisitiri muri Perezidansi, Uwizeye Judith, ubwo yatangizaga ku mugaragaro Inama y’Inteko rusange nyafurika ya 3 y’Itorero ry’Abadivantisiti b’umunsi wa 7.

Yagize ati “Amatorero n’amadini yagize uruhare rukomeye mu kongera kwiyubaka kw’igihugu cyacu mu bwiyunge, kubaka Abanyarwanda mu buryo bwo koroherana. Amadini yafashije cyane mu rugendo rw’ubwiyunge bw’Abanyarwanda, no mu iterambere ry’igihugu.”

Ku bijyanye n’iterambere, Minisitiri Uwizeye avuga ko amadini ategerejweho kubaka Abanyarwanda bakaba abaturage beza bashimwa n’igihugu, gufatanya na Leta mu kubaka igihugu binyuze mu bikorwa by’iterambere mu bayoboke babo ari na bo baturage b’igihugu.

Ati “Umunyedini mwiza aba n’umuturage mwiza, Abanyamadini nibigisha abayoboke babo kubahana, kubana neza no kwiteza imbere, bazavamo abaturage beza bakunda kandi bakorera igihugu cyabo.”

Minisitiri Uwizeye avuga kandi ko muri Afurika abarenga  90%  bafite imyemerere itandukanye ishingiye ku madini, ngo  iyo bashyize hamwe bashaka amahoro n’ubworoherane ni ikimenyetso kiza mu baturage kuko bituma na bo ubwabo babana neza.

Avuga ko amadini n’amatorero yo mu Rwanda agira urubuga   ahuriramo bityo akimakaza ubumwe n’ubworoherane.

Ati “Mu Rwanda amadini abanye neza, nta kibazo na kimwe ateza igihugu ahubwo  agifasha gukomeza kwiyubaka no kubaka Abanyarwanda mu buryo bunyuranye.”

Dr Blasious M. Ruguri, Umuyobozi w’Itorero ry’Abadivantisiti b’umunsi wa 7 muri Afurika, yishimiye ko inama nk’iyi yabereye mu Rwanda mu ngoro nziza ya Convention Center, avuga ko u Rwanda ruhabwa amahirwe yo kwakira inama nk’izi ku bw’umutekano rufite, ubwisanzure ruha amatorero, uburyo rwakira abashyitsi n’ibindi, akaba asanga ari igihugu kiza gitanga ubwisanzure kuri bose.

Ati “Ngereranyije u Rwanda n’ibindi bihugu nka Somaliya  nkoreramo, navuga ko u Rwanda ari igihugu gitanga ubwisanzure ku bantu bose ndetse n’amatorero, byari ngombwa rero  ko iyi nama ibera muri Afurika kandi mu Rwanda.”

Avuga ko uruhare rw’ubumwe bw’amadini muri Afurika rwafashije kugabanya intambara za hato na hato, ndetse Abanyafurika bakaba bagenda babona ko ari bamwe, kandi ko  bakwiye no gushyira hamwe mu kubaka umugabane wabo, amadini akabigiramo uruhare.

Dr. Prof. Byiringiro Hesron, Umuyobozi mukuru w’Itorero ry’Abadivantisiti mu Rwanda, yagarutse ku bumwe bw’amatorero n’amadini, avuga ko n’ubwo atandukanye ariko ahuriza ku ntego imwe ari yo yo kwigisha abaturage iby’ijuru.

Ati “Igihe amatorero n’amadini ashyize hamwe, nta kabuza ko yagera ku ntego yahamagariwe nko gutegura abakandida b’ijuru.”

Amadini afite umukoro wo kongera kubaka umuntu akongera akagarura ishusho Imana yamuremanye, agasanga umugambi w’itorero ryose ari uwo ng’uwo.

Ati “Itorero rigomba kubakwa n’urukundo, ubworoherane, kwihanganirana no kubahana, bizatuma abayoboke b’ayo madini bavamo abaturage beza, bityo bagafatanya mu kubaka igihugu cyabo.”

Bishop Rucyahana John wo mu Itorero ry’Abangilikani akaba na Perezida wa Komisiyo y’ubumwe n’ubwiyunge, yagarutse ku mibereho y’amadini mbere ya Jenoside yakorewe Abatutsi, kuko imibanire ngiro y’amadini ntiyari myiza ahubwo wasangaga badahuza neza.

Ati “Amadini afite uruhare rukomeye mu kubaka u Rwanda, kururinda, no kuruteza imbere, bagafatanya kurinda Abanyarwanda mu buryo bw’imyumvire, bakava mu mitekerereze ibatandukanya.”

Sheih Hitimana Salim, Mufti w’u Rwanda, avuga ko ubumwe  n’ubworoherane  ari ibisanzwe mu idini ya Isilamu, ngo  ni itegeko ry’intumwa y’Imana Muhamadi, agasanga rero kuba n’andi madini yahuriza kuri iyo ntego  n’ikerekezo kimwe byafasha mu mibanire no mu mikorere yayo n’abayoboke bayo.

Avuga ko ihame ry’ubworoherane mu madini rizatuma amadini akorera hamwe kandi agahurira ku kintu kimwe nko kwemera Imana.

Ati “Nubwo amadini n’amatorero afite amahame, imyemerere n’imigenzo binyuranye, ariko ubumwe hagati yayo burashoboka, ibyo kandi bifasha kubaka abaturage, na bo bunze ubumwe kandi bafite ikerekezo kimwe cyo kubana neza no gufatanya.”

Avuga ko ibintu byose bidakorerwa umunsi umwe ngo bishoboke, ahubwo ngo birasaba ko abantu bakomeza kuganira ku bumwe n’ubworoherane bw’amadini, aho asanga ari intambwe yatewe mu Rwanda ko amatorero n’amadini yicarana ku meza amwe akaganirira hamwe.

Inama y’Inteko rusange nyafurika y’Abadivantisiti b’umunsi wa 7 yahuje abantu 500, barimo 350 baturuka mu bihugu by’Afurika n’ahandi ku Isi  n’abandi 150 baturuka mu Rwanda.

Insanganyamatsiko y’iyi nama iragira iti “Umudendezo w’idini, ikizere cyo kubaka Afurika yuje ubworoherane n’amahoro.”

 

 

 

 

 

TANGA IGITEKEREZO

Leave a Reply

Your email address will not be published. Required fields are marked *