19°C , Mostly clear | Kigali-Rwanda
Kamwe mu tubindi twa Ruganzu II Ndoli turi i Rubona (Foto Kayitare J.P)

Amateka y’utubindi twa Ruganzu Ndoli i Rubona muri Gatsibo

Yanditswe na Kayitare Jean Paul

Ku ya 14-06-2019 saa 17:25:03

Utubindi twa Ruganzu II Ndoli tuvugwa ahitwa i Rubona, ubu ni mu Murenge wa Kiziguro mu karere ka Gatsibo, dufite amateka maremare.

Turi mu kigo cy’Urwunge rw’amashuri ya Rubona mu kagari ka Rubona mu murenge wa Kiziguro, ni 12. Twose bivugwa ko twafukuwe na Ruganzu ubwo yari abundutse (guhunguka k’umwami) i Karagwe k’Abahinda, muri Tanzaniya.

Iyo ugeze ahari utwo utubindi twitiriwe Ruganzu, uhabona ibimenyetso bikunze kumwitirirwa birimo aho yarambitse umuheto, imyambi, inkota, intebe yicaragaho ndetse n’utwo tubindi uko ari 12.

Mu gushaka kumenya amateka y’utubindi twa Ruganzu, Imvaho Nshya yifashishije Rwabagabo Simon uvuga ko afite igisekuru ke kugeza ku cyariho mu 1700.

Rwabagabo yavutse mu 1969 yiga i Rubona guhera mu 1976 aharangiriza amashuri abanza, nyuma yiga amateka mu mashuri yisumbuye, akora ubushakashatsi ku mateka y’utubindi twa Ruganzu, kuri ubu akaba ari umwarimu muri GS Rubona aho amaze imyaka 23 yigisha amateka.

Avuga ko umusozi wa Rubona uri ku mupaka w’igihugu k’Igisaka n’u Rwanda, hakurya y’utubindi twa Ruganzu akaba ariho mu Gisaka (ubu ni mu misozi ya Rukara mu karere ka Kayonza).

Ashingiye ku ruhererekane mvugo, avuga ko umusaza witwaga Kavumbu wapfuye mu 1992 agapfa afite imyaka 125, ngo yajyaga avuga amateka y’utubindi kuko ngo na we yakuze batumubwira, akavuga ko ari utwa Ruganzu II Ndoli.

Ati “Uwo musaza yajyaga avuga ko Ruganzu amaze kubunduka ageze i Rubona (ubu ni mu murenge wa Kiziguro muri Gatsibo) habereye ibirori bimwakira. Ingabo zari zarahonotse intambara zivuye kumuzana zikora ibirori n’Abanyarwanda batumiza inzoga nyinshi hanyuma inzoga ziba nyinshi zibura aho zijya, yifashishije imitsindo y’abanyakaragwe acukura utu tubindi 12.”

Akomeza avuga ko iyo mitsindo yatumaga aho akandagije ikirenge hishushanya, hakishushanya nk’ukandagiye mu cyondo, yaharambika umuheto ukishushanya, yaharambika umwambi ukishushanya nyuma ni bwo utwo tubindi ngo batangiye kutunyweramo.

Mu bushakashatsi Rwabagabo yakoze kuri Ruganzu II Ndoli i Rubona, yagize ati “Amateka y’utubindi twa Ruganzu i Rubona nta bintu bifatika bavugamo nta k’ingenzi kirimo kuko yavuye i Karagwe aruhukira hano i Rubona ahashyira utwo tubindi bitewe n’imitsindo yari akuye i Karagwe.”

Kuri urundi ruhande, aho utwo tubindi twa Ruganzu II Ndoli duherereye mu kigo cy’amashuri yisumbuye cya Rubona, Urwego rw’Igihugu rw’Iterambere RDB, kigaragaza inshamake y’amateka y’utubindi twa Ruganzu ndetse kikanagenekereza igihe utubindi dushobora kuba twaracukuriwe.

Inyandiko za RDB zigira ziti “Utubindi twa Rubona twafukuwe n’umwami Ruganzu II Ndori, icyo gihe yari avuye kwa Nyirasenge Nyabunyana yambuka umugezi w’Akagera ataha i Rubona. Ruganzu yari yaragiye kubunda kwa Nyirasenge i Karagwe akiri umwana muto mu kinyejana cya 17 dore ko Nyirasenge yari yararongowe n’umwami w’i Karagwe.

Mu gihe Ruganzu yari i Karagwe umwami Ndahiro Cyamatare yishwe n’abanzi be, hagati aho Abanyarwanda bari babanje kugerageza kumuvura, mu gihe igihugu cyari mu kangaratete kivura Ndahiro, abari abatoni be bagiye inama yo kwimika umuhungu we Ndoli, umwe muri bo witwaga Kavuna ka Mushimiye yiyemeza kujya amenyesha Ndoli uko igihugu giteye kugeza ubwo abaye umwami.

Batashye mu Rwanda bavuye i Karagwe, Ruganzu n’ingabo ze baraye i Rubona bahagera baguye umwuma, ni uko Ruganzu yenda icumu rye ryarimo imitsindo arishinga mu butaka afukura intango 12 (utubindi) zihera ko zuzura amazi yabaramiye.”

Umunyamabanga Nshingwabikorwa w’agateganyo w’Umurenge wa Kiziguro, Mupenzi Leon Pierre, avuga ko nta kindi kintu umurenge wakora kuri utu tubindi twa Rubona kuko ngo ubuyobozi bwa RDB bwababwiye ko bumaze igihe bugenzura ahantu hari ibikorwa nyaburanga kugira ngo buzabyubakireho bugire n’ibikorwa buhakorera.

Mupenzi avuga ko RDB yabasabye kudahindura ibimenyetso by’umwami Ruganzu II Ndoli. Ati “Badusabye ko ibi bikorwa bigaragaza amateka bitakorwaho cyangwa ngo bihindurwemo ibindi bintu, icyahakorerwa ni amasuku asanzwe ariko ubundi igikorwa nk’iki kigomba kuguma uko cyakabaye.”

Kimwe nk’ahandi mu gihugu hari ibimenyetso byinshi byitirirwa Ruganzu II Ndoli nk’igisoro n’amajanja y’imbwa ze mu murenge wa Rugarama mu karere ka Gatsibo, ibuye rya Bagege riri mu Ntara y’Amajyaruguru ryahoraga rigenda hanyuma akarikubita inyundo ye yitwaga Kinubi rigahagarara ubwo, n’ibindi byinshi bavuga ko yakoze hirya no hino mu gihugu.

Kamwe mu tubindi twa Ruganzu II Ndoli turi i Rubona (Foto Kayitare J.P)

TANGA IGITEKEREZO

One Comment on “Amateka y’utubindi twa Ruganzu Ndoli i Rubona muri Gatsibo”

  1. Aya mateka akwiye kubungabungwa, Kandi byaba ngombwa akitabwaho by’umwihariko kuburyo yahabwa agaciro, agahindurwamo bimwe mu byiza by’u Rwanda bisurwa n’ abakererugendo, baba abanyamahanga ndetse n’ abanyarwanda ubwabo( byazatuma turushaho kumenya byinshi bigize amateka yaranze abakurambere bacu)

Leave a Reply

Your email address will not be published. Required fields are marked *