21°C , Partly sunny | Kigali-Rwanda
Veda Baloomoody uyoboye itsinda ry’Abadepite b'Inteko Ishinga Amategeko mu Birwa bya Maurice uwa kane iburyo, Perezidante Mukabalisa Donatille uwa 5 n'abandi bagize itsinda basuye Inteko Ishinga Amategeko y'u Rwanda

Amateka y’u Rwanda afite ubudasa –  Hon Veda

Yanditswe na TWAGIRA WILSON

Ku ya 16-02-2018 saa 06:44:23

Depite  Veda Baloomoody uyoboye itsinda ry’Abadepite bagize Inteko Ishinga Amategeko  yo mu Birwa bya Maurice  avuga ko amateka y’u Rwanda afite  ubudasa, ndetse n’umwihariko w’uko abagore  nka bamwe mu bagezweho  n’ingaruka za Jenoside yakorewe Abatutsi mu 1994,  ari nabo bagize  uruhare mu gufatanya na basaza babo mu rugamba rwo kubohora Igihugu, none ubu  igihugu kikaba  kigeze mu nzira nziza  yo  kwiyubaka n’ubumwe n’ubwiyunge.

Veda Baloomoody uyoboye itsinda ry’Abadepite b’Inteko Ishinga Amategeko mu Birwa bya Maurice uwa kane iburyo, Perezidante Mukabalisa Donatille uwa 5 n’abandi bagize itsinda basuye Inteko Ishinga Amategeko y’u Rwanda

Depite Veda yabivugiye mu Nteko Ishinga Amategeko y’u Rwanda ejo hashize ku wa Kane tariki 15 Gashyantare 2018, nyuma y’uko we  hamwe  n’itsinda ry’abadepite 5  bo mu Birwa bya Maurice  ayoboye bakiriwe bakanagirana ibiganiro na Perezida w’Inteko Ishinga Amategeko y’u Rwanda umutwe w’abadepite  Mukabalisa Donatille.

Depite Veda avuga ko mu byo baganiriye n’uyu muyobozi birimo ibanga u Rwanda rwakoresheje kugira ngo  abagore na bo bagire uruhare mu iterambere ry’igihugu bahabwe umwanya mu nzego zifatirwamo ibyemezo, nk’uko bikubiye mu Itegeko Nshinga  cyane ko ngo mu gihugu cyabo inzego z’abagore zikiri inyuma.

Mu kiganiro n’itangazamakuru,  Depite Veda, asanga ibyo biboneye mu rugendoshuri barimo mu Rwanda nabo bizabafasha bishyirwe mu itegeko, maze n’iwabo babishyire mu bikorwa, kuko inzego z’abagore mu gihugu cyabo, ndetse no mu nteko zikiri inyuma.

Yakomeje agira ati: “Nk’ubu mu Nteko Ishinga Amategeko yo mu gihugu cyacu dusanga hakiri byinshi bikenewe gukorwa, kuko mbahaye urugero nko mu nteko yacu mu badepite 70, abagore ni umunani gusa, yewe no muri Guverinoma ni uko baracyari mbarwa.

Dukeneye ko amategeko ahari avugururwa maze umugore akagira uruhare mu iterambere nk’uko mu Rwanda bihagaze, hano iwanyu harimo n’ubushake bwa politike.  Iyindi mpamvu twahisemo  gukorera urugendoshuri mu Rwanda rero, ni uko abagore bagizweho ingaruka na Jenoside yakorewe Abatutsi, ari nabo bagize uruhare rukomeye mu mateka yo kwibohora ku gihugu cyabo.”

Perezida w’Inteko Ishinga Amategeko y’u Rwanda, umutwe w’abadepite, Mukabalisa Donatille, yabwiye itangazamakuru ko itsinda ry’abo badepite ryaboneyeho gusura imwe mu mishinga igamije guteza imbere inzego z’abagore, bagirana ibiganiro n’Ihuriro ry’abagore bari mu Nteko Ishinga Amategeko, baganire uburyo n’icyo bakora nabo mu guteza imbere Ihuriro ryabo batangije  Gender Caucas, n’uburyo ryateza imbere imikoranire n’izindi nzego hagamijwe kugera ku ntego yo guteza imbere umugore bose bafatanyije.

TANGA IGITEKEREZO

Leave a Reply

Be the First to Comment!

avatar