17°C , Partly sunny | Kigali-Rwanda
Laureano Bisan Etamé-Mayer waje mu Rwanda muri gahunda yo Kwita Izina abana b'ingagi i Musanze

Amateka ya  Etamé Mayer wakiniye  Arsenal akaba yaraje mu Rwanda  Kwita Izina

Yanditswe na BIZIMANA ERIC

Ku ya 09-09-2018 saa 08:59:00

Kuva tariki 05 Nzeri 2018, u Rwanda rwakiriye Laureano Bisan Etamé-Mayer  wahoze akinira  ikipe ya Arsenal  yo mu Bwongereza akaba yaraje muri gahunda  y’ubufatanye iyi kipe ifitanye n’Ikigo k’Igihugu gishinzwe Iterambere  (RDB) bwo gukangurira abatuye isi  kuza gusura u Rwanda  (Sura u Rwanda /Visit Rwanda).

Laureano Bisan Etamé-Mayer waje mu Rwanda muri gahunda yo Kwita Izina abana b’ingagi i Musanze

Iri jambo ubu rikaba rigaragara ku kuboko kw’ibumoso kw’umwenda w’iyi kipe ya Arsenal.

Mu rugendo yagiriye mu Rwanda, Mayer yanitabiriye ibirori byo Kwita Izina abana b’ingagi 23 byabaye tariki 07 Nzeri 2018 mu Karere ka Musanze aho yise umwana w’ingagi izina “Ikipe”. Yanaganiriye n’abana muri gahunda ya Arsenal yo guteza imbere impano z’abana b’Abanyarwanda.

Imvaho Nshya yifuje kubagezeho  ubuzima bw’uyu mugabo ufite ubwenegihugu bwa Espagne wegukanye igikombe cy’Afurika, wahawe ikarita itukura nyuma y’iminota itandatu y’umukino wa mbere yakinnye mu gikombe k’Isi, wari muri ya kipe ya Arsenal yatwaye igikombe cya FA bwa mbere nyuma y’imyaka 69, ikanatwara shampiyona y’u Bwongereza idatsinzwe.

Yavukiye mu buhunzi muri Cameroun mu muryango w’abana 22

Laureano Bisan Etamé-Mayer yabonye izuba tariki 19 Mutarama 1977 i Kribbi muri Cameroun. Ni umwana wa 21 mu muryango w’abana 22 ba Valentín Bisan-Etam, wari warashatse abagore benshi.

Se wa Mayer yahunze ubutegetsi  bwa Francisco Macías Nguema wayobora Guinea Equatorial  kuva kibonye ubwigenge mu 1968 kugeza akuwe ku butegetsi mu 1979 na mwishywa we Teodoro Obiang Nguema Mbasogo.

Mu kiganiro n’ikinyamakuru The Guardian cyo mu Bwongereza Etamé-Mayer yagize ati :“Data  yari umuyobozi mukuru w’iposita y’igihugu. Marume ni we waje kumuburira ko Perezida yashyizeho itegeko ryo kumwica bituma abasha gutoroka ku bitangaza by’Imana. Nge navukiye rero muri Cameroun nanahamara imyaka itatu ku buryo nta kintu na kimwe k’icyo gihe nibuka”.

Se  wa Mayer yaje kugira amahirwe abasha kujyana abana be 15 ku mugabane w’u Burayi mu mugi wa Sevilla ari na ho uyu musore yatangiriye ubuzima mu gace kabamo abirabura  benshi ka Montequito, aho se yari afite akazi akabasha kubatunga.

Umupira yawutangiriye neza muri Espagne

Etam Mayer wakuriye i Sevilla yaje kujya mu mashuri y’abato y’umupira yinjira mu makipe y’abato ya  Utrera, San Fernando, Sevilla hagati y’umwaka wa 1995 na 1997. Yaje gutangira gukinira ikipe ya Levante ayimaramo umwaka  atsinda ibitego 6 mu mikino 34,   ayivamo mu 1998 yerekeza muri Mallorca yabayemo imyaka ibiri ayitsindira ibitego bine mu mikino 63, aza kubengwuka na Arsene Wenger wamuguze miliyoni 7.2 z’amapawundi.

Mayer avuga ko muri iki gihe ari bwo yaje kubonwa na Thomas N’Kono wahoze ari umunyezamu w’ikipe y’igihugu ya Cameroun waje kumusaba kuzakinira ikipe y’igihugu ya  Cameroun.

Mayer ati:“Icyo gihe nari mu kiciro cya kabiri muri Espagne, nari Umunyafurika  ariko pe nta na kimwe nari nzi kuri uwo mugabane. Nibuka ko namwemereye ko tujyana, ntazi ururimi rwaho, numvaga bigoye”.

Uyu mukinnyi  ageze mu ikipe y’igihugu ku myaka 17 yahuye na Samuel Etoo Fils wamufashije kumenyera nk’umuntu bashoboraga kuvugana mu rurimi rw’ik’Espagnole.

Ati: “Etoo ni we wambwiye ngo iyo ugiye muri Afurika hari ibintu byinshi ubona bikagutungura.Ni umusore nabazaga buri kimwe, yambereye imfura, aramfasha bishoboka. Icyo gihe twanatwaye igikombe cy’Afurika cya 2000 n’umudari wa Olempike i Sydney dutsinze Espagne”.

Muri Arsenal yahagiriye ibihe byiza

Muri Nyakanga 2000, Mayer yaje kugurwa na Arsenal ariko ananirwa kubona umwanya uhoraho kubera ko yari ahasanze abakinnyi bakomeye barimo Lee Dixon na  Oleh Luzhny.

Mu 2001-2002, Mayer yaje kubona neza umwanya uhoraho ndetse yegukana igikombe cya shampiyona n’icya FA.

Mu mwaka wakurikiyeho, imvune zaje kumubuza gukina mu mwaka wose.

Nyuma yo gukira imvune, Etamé-Mayer yaje kugaruka mu ikipe yakoze amateka yo gutwara igikombe cya shampiyona idatsinzwe cya 2003-2004 na we yujuje imikino 150 muri Arsenal bamwambika imidari ibiri.

Mayer avuga ko ishyaka no guharanira kubaka amateka ari byo byabafashije muri uwo mwaka. Ati: “Ba Thierry Henry bari abantu b’akataraboneka.Thierry yashakaga gutsinda muri buri kintu. Hari kapiteni wacu Viera yari umuntu n’uyu munota nakwifuza gukinana na we. Martin Keown yari umuntu udashaka gutsindwa, na ko twese twari uko”.

Nyuma yo kumara imikino 49, Arsenal ya ba Mayer yaje gutsindwa na Manchester United mu mukino Mayer n’ubu yemeza ko bibwe n’umusifuzi wayoboye umukino.

Mu 2005 ari kumwe na Arsenal, Mayer yatwaye igikombe cya FA batsinze Manchester United kuri penaliti, aza guhura n’imvune ikomeye mu mwaka wakurikiyeho byatumye atongera kugaragara cyane mu mikino yakurikiyeho ahubwo umwanya we wifatirwa na  Emmanuel Eboué na Justin Hoyte

Ubuzima nyuma ya Arsenal

Nyuma yo kuva muri Arsenal muri Mutarama 2007, Mayer yerekeje muri Portsmouth asinya amasezerano y’imyaka ibiri n’igice na bwo akajya akina asimbuye Glen Johnson wari mu bihe bye, ahamara imyaka ibiri ahakina imikino 25 abona kujya muri Cordoba mu 2010 ahakina imikino itanu mbere yo gusezera.

Muri rusange Mayor yakinnye imikino 333  harimo 159 yakinnye muri Arsenal atsinda ibitego 25 birimo birindwi yatsindiye muri Arsenal. Yanakiniye ikipe y’igihugu ya Cameroun imikino 24 atsinda igitego kimwe.

Yatowe nk’umukinnyi mwiza w’igikombe cy’Afurika cyo mu 2000 atwara ibikombe bibiri by’Afurika (2000 na 2002), atwara ibikombe bibiri bya shampiyona y’u Bwongereza (2001-2002 na 2003-20004) n’ibikombe bitatu bya FA Cup (2001-2002, 2002-2003 na 2004-2005).

Nyuma y’umupira

Kuri ubu Mayer ni Ambasaderi wa Arsenal mu guteza imbere impano z’abana ku  mugabane w’Afurika  kandi yemera ko uyu mugabane ufite impano z’abakinnyi zihagije.

Ati: “Afurika yagize abakinnyi bakomeye Weah, N’Kono, Kanu, Drogba, Eto’o, n’ubu kandi yabatanga. Ikibazo ntabwo ari uko abakinnyi badafite ibibuga cyangwa imishahara myiza, nge nsanga byose bishingiye ku buyobozi bukoresha nabi amafaranga, akajya mu byo atagenewe”.

Usibye kuba Ambasaderi wa Arsenal, Mayer ni umusesenguzi kuri Tereviziyo y’Abongereza “Sky Sports” nk’inararibonye mu mupira wa Espagne ari na ho atuye mu buzima busanzwe.

TANGA IGITEKEREZO

Leave a Reply

Your email address will not be published. Required fields are marked *