26°C , Partly sunny | Kigali-Rwanda

Amateka ya Chaka Chaka uzataramira mu Rwanda

Yanditswe na NDAMYIROKOYE FRANÇOIS

Ku ya 16-03-2018 saa 09:01:22

Umuhanzikazi Yvonne Chaka Chaka akomoka muri Afurika y’Epfo  akaba yaravutse ku ya 18 Werurwe 1965 avukira ahitwa  Dobsonville.

Chaka Chaka mu 1989 yashakanye na Mandlalele Mhinga. Uyu muhanzikazi mpuzamahanga ni umwanditsi w’indirimbo, rwiyemezamirimo, aharanira imibereho myiza y’abantu kandi   ni umwarimukazi.

Umuhanzikazi Yvonne Chaka Chaka

Nyuma y’uko mu 1990 yakoze ibitaramo binyuranye muri Afurika yahawe izina ry’igikomangoma cy’Afurika “Princess of Africa”.

Imyaka 27 yose Yvonne Chaka Chaka yayimaze ari umuhanzikazi uhiga abandi muri Afurika y’Epfo. Mu bihugu bitandukanye birimo Zimbabwe, Gabon, Kenya, Sierra Leone na Côte d’Ivoire yarakunzwe cyane.

Zimwe mu ndirimbo yamenyekanyeho harimo iyitwa “I’m burning up”, “Thank you Mr DJ”, “I cry for freedom”.

Mu 1981 akiri muto Yvonne Chaka Chaka yabaye umwana wa mbere w’Umwirabura wagaragaye kuri televiziyo yo muri Afurika y’Epfo guhera ubwo atangira kuzajya aririmba mu bitaramo bikomeye n’abahanzi nka Youssou N’dour, Bono, Angelique Kidjo, Miriam Makeba n’abandi.

Mu bantu bakomeye batandatukanye yaririmbiye harimo umwamikazi w’u Bwongereza Elizabeth II, Bill Clinton wigeze kuba Perezida wa Leta zunze ubumwe z’Amerika  n’abandi.

Umushinga wa Global Fund wamwemeje nk’umuntu ufashe runini mu kurwanya icyorezo cya SIDA, igituntu na malariya. Yvonne Chaka Chaka kandi ni intumwa y’umuryango w’abibumbye muri Afurika mu bijyanye no kugeza uyu mugabane ku majyambere arambye akaba anakorana n’umushinga witwa The Roll Back Malaria mu bijyanye no kurwanya indwara ya malariya.

Umuhanzikazi Chaka Chaka, Nelson Mandela yari yaramutoranyije nk’ambasaderi w’ikigo cyo gufasha abana yari yarashinze gusa  na we yaje gushinga ikigo cye kigamije gufasha abana babayeho nabi. Icyo kigo yakise “The Princess of Africa Foundation”. Ubwo yigeze kujya muri Uganda ni bwo bwa mbere yahawe akabyiniriro k’igikomangoma cy’Afurika.

Mu bihembo by’ishimwe yahawe harimo icya World economic Forum crystal akaba ari na we mugore wa mbere wagihawe ukomoka muri Afurika.

Ubu yigisha ibijyanye n’ubuvanganzo muri kaminuza yo muri Afurika y’Epfo. Azataramira kandi mu Rwanda muri Nyakanga 2018 mu gitaramo cya Kakooza Nkuriza Charles uzwi nka KNC.

Ntabwo azaba ari ubwa mbere kandi azaba ataramiye mu Rwanda kuko yagiye ahataramira mu bihe binyuranye.

TANGA IGITEKEREZO

Leave a Reply

Be the First to Comment!

avatar