Amashuri yigenga yishimiye ikurwaho ry’amabwiriza yo kwigisha mu Kinyarwanda

Yanditswe na Mugisha Benigne

Ku ya 02-12-2019 saa 17:40:23
Minisitiri w'Uburezi, Dr Mutimura Eugene

Minisiteri y’Uburezi yemeje ko mu kiciro cya mbere cy’amashuri abanza bigisha mu rurimi rw’Icyongereza ariko n’Ikinyarwanda kigahabwa umwanya uhagije, bikaba byishimiwe cyane n’abarezi bo mu mashuri yigenga.

Ni nyuma y’uko iyi Minisiteri yari yasohoye amabwiriza asaba ko amashuri yose agendera ku nteganyanyigisho ya Leta ko agomba kwigisha mu rurimi rw’Ikinyarwanda mu kiciro cya mbere cy’amashuri abanza.

Ibi Minisitiri w’Uburezi Dr. Mutimura Eugene yabivugiye mu nama yamuhuje n’abayobozi b’amashuri yigenga mu kurebera hamwe imbogamizi zihari ku kemezo cyari cyarafashwe na Minisiteri y’Uburezi cy’uko ikiciro cya mbere cy’amashuri abanza kizajya kigishwa mu rurimi rw’Ikinyarwanda, indimi z’amahanga zigatangira kwigishwa mu kiciro cya kabiri cy’amashuri abanza.

Abayobozi b’amashuri yigenga bagarutse ari benshi ku mbogamizi babona muri iki kemezo, bakavuga ko kwigisha mu ndimi z’amahanga bitabuza abana kumenya Ikinyarwanda kuko nacyo basanzwe bakiga nk’isomo kongeraho ko bataha mu miryango y’Abanyarwanda ikoresha ururimi rw’Ikinyarwanda, bakomeza gusaba ko iryo bwiriza ryavanwaho bagakomeza kwigisha uko byari bisanzwe.

Mutabazi Geoffrey ni umuyobozi w’ishuri ryigenga riherereye mu Karere ka Gasabo, avuga ko kwigisha abana bo mu kiciro cya mbere cy’amashuri abanza  n’ay’inshuke mu rurimi rw’Ikinyarwanda byasubiza inyuma intera bari bagezeho ngo kandi bituma ababyeyi bagana aya mashuri harimo izo ndimi z’amahanga zabujijwe kwigishwa, akaba asanga umwaka utaha w’amashuri batabona abanyeshuri kuko nta cyo baba baza kubashakaho batari bwigishe mu Cyongereza ngo bagitangire bakiri hasi.

Yagize ati “Turemeza ko abana bacu bagomba kumenya Ikinyarwanda kuko tukibigisha nk’isomo ariko bagomba no kumenya Icyongereza n’izindi ndimi z’amahanga kuko ari cyo bateganya kuzahahisha. Turabasaba ko mwadukomorera tugakomeza kwigisha muri izo ndimi, ahubwo tukongera imbaraga no mu isomo ry’Ikinyarwanda.”

Pasiteri Winny Muvunyi na we ni umuyobozi mu ishuri ryigenga, avuga ko kwigisha mu rurimi rw’Ikinyarwanda byatuma abana bose bigaga mu mashuri yigenga bahindura bakajya mu mashuri ya Leta gusa, ngo kandi ni mu gihe abikorera bihaye intego yo gushyigikira gahunda ya Leta bubaka amashuri kugira ngo abana bose bige kandi bisanzuye, na we asaba ko amabwiriza bahawe yo kwigisha mu rurimi rw’Ikinyarwanda yasuzumwa hakarebwa niba bitasubiza inyuma ireme ry’uburezi rigenda rigerwaho.

Nyuma y’icyo kifuzo, abayobozi b’amashuri yigenga bafashe ijambo bagiye basimburanaho, Minisitiri w’Uburezi Dr. Mutimura Eugene yafashe ijambo ababwira ko ikifuzo cyabo cyumviswe, agishimangira avuga ko bakomeza kwigisha mu rurimi rw’Icyongereza bakarwigisha neza kurushaho ndetse bakanigisha isomo ry’Ikinyarwanda abana bakakimenya.

Yagize ati “Turabasaba kwigisha mu rurimi rw’Icyongereza mu karushyiramo imbaraga ku buryo abana barumemya bakaruvuga neza, ariko nanone mukigisha n’isomo ry’Ikinyarwanda abana bakakimenya, si itegeko rero ko abana biga mu Kinyarwanda, ahubwo ibyo biga tubishyiremo imbaraga barusheho kubimenya.”

Yabibukije ko bagomba kwigisha isomo ry’Igifaransa kuva mu mwaka wa kane kugeza mu mwaka wa gatandatu w’amashuri abanza, bakanibuka ko mu mwaka wa gatatu w’amashuri yisumbuye abana bazakibazwa nk’isomo mu bizamini bya Leta.

Abayobozi b’amashuri yigenga bishimiye cyane iki kemezo cya Minisitiri w’Uburezi, bavuga ko imitima yabo isubiye mu gitereko kuko bari bihebye babona ko akazi kabo kari mu marembera kuko batizeraga ko ababyeyi bazongera kubazanira abana kuko ahanini ngo babigishirizaga mu mashuri yigenga kuko babaga bakurikiyeyo izo ndimi, ibyishimo akaba ari byose ku barezi bo muri ayo amashuri.

Umwanditsi:

Mugisha Benigne

One Comment on “Amashuri yigenga yishimiye ikurwaho ry’amabwiriza yo kwigisha mu Kinyarwanda”

  1. Ibyo ntibyakagombye kuba ikibazo mubuzamini bay reta ikinyarwanda kimye gihabwa amanota menshi itza urabona ntakajye atsinda

Tanga Igitekerezo

Email yanyu ntigaragazwa ku rubuga. Amazina na Email ni ngombwa.