19°C , Mostly cloudy | Kigali-Rwanda
Aha abayobozi bombi bari bamaze gusinya amasezerano

Amashanyarazi akomoka ku mirasire y’izuba agiye kunguka megawati 30

Yanditswe na DOSI JEANNE GISELE

Ku ya 14-03-2018 saa 06:58:18

Guverinoma y’u Rwanda ihagarariwe na Minisitiri w’Ibikorwa remezo James Musoni n’Umuyobozi Mukuru Urwego rw’’Igihugu rw’Iterambere (RDB) Clare Akamanzi, yasinyanye amasezerano na sosiyeti Mara Corporation ihagarariwe na Ashish J. Thakkar ndetse na SB Energy Corp ihagarariwe na Shigeki Miwa, yo kuzubaka umushinga ungana uzatanga megawati 30 mu rwego rwo guteza imbere ingufu z’amashyanyarazi akomoka ku mirasire y’izuba. Ni igikorwa cyabaye ku itariki ya 11 Werurwe 2018.

Ni mu gihe u Rwanda rukomeje gukora ibishoboka byose rushaka uko rwakongera izindi ngufu zunganira umuriro w’amashanyarazi usanzwe ukomoka ku mazi ari nawo ukoreshwa n’abatari bake mu gihugu.

Ubwo yitabiraga Inama mpuzamahanga y’umunsi umwe yiga ku ikoreshwa ry’ingufu zikomoka ku mirasire y’izuba (ISA), iherutse kubera i New Delhi mu Buhinde, Perezida Kagame yavuze ko nk’ibihugu bigeramo izuba ryinshi bitakabaye bigira ikibazo k’ingufu z’amashanyarazi akomoka ku zuba, ashima ko mu bihugu byinshi byashyize umukono kuri ayo masezerano ari ibyo ku mugabane w’Afurika.

Ati: “Kugira ngo tugere ku ntego z’iterambere rirambye n’intego z’Ubumwe bw’Afurika (Agenda 2063), hakenewe ibikorwa byagutse mu gukora ingufu, muri buri gihugu cyo ku mugabane w’Afurika..”

Perezida Paul Kagame yanasabye ubufatanye hagati y’ibihugu n’imigabane mu guteza imbere urwego rw’ingufu, bagashyira hamwe ubushobozi n’ubumenyi ku hazaza h’umubumbe w’Isi.

Iyi nama yaririmo abakuru b’ibihugu na za Guverinoma basaga 20, abanyemari ndetse n’abandi bafatanyabikorwa.

U Rwanda rusanzwe rutunganya ingufu z’amashanyarazi akomoka ku mirasire y’izuba angana na megawati 8.5 ashobora gucanira ingo ibihumbi 15, mu ruganda rwubatswe na Gigawatt Global n’abafatanyabikorwa barimo Scatec Solar mu karere ka Rwamagana.

 

 

TANGA IGITEKEREZO

Leave a Reply

Your email address will not be published. Required fields are marked *