2017-11-18 15:01:47 clouds 27o High | Kigali Rwanda

Dukurikire:
 
 

Kigali: Ahahoze inganda hatangiye gutunganywa

Yanditswe na IMVAHO NSHYA

Kuya 2017-08-29 06:18:59

 
Share on:
 
Yasuwe:712
 
Yavuzweho:200
 
10
 
10

Mu mujyi wa Kigali hatangiye gutunganywa ahantu hagiye kugirwa nyaburanga. Aha ni i Gikondo, ahahoze inganda, igice kimwe kikaba cyaratangiye gutunganywa n’Umujyi wa Kigali, ikindi gisigaye kikazatunganywa n’Ikigo cy’igihugu gishinzwe kwita ku bidukikije, REMA.

JPEG - 62.3 kb
Francois Kanimba, Minisitiri w’Ubucuruzi, Inganda n’Afurika y’Iburasirazuba (Foto James R.)

Ahazatunganywa n’Umujyi wa Kigali ku gice cyahozemo inganda i Gikondo, biteganyijwe ko hazashyirwa ibikorwa bitandukanye by’ubukerarugendo bifasha no mu kubungabunga ibidukikije.

Umuyobozi w’Umujyi wa Kigali wungirije ushinzwe imibereho myiza y’abaturage Muhongerwa Patricie, mu kiganiro yagiranye n’Imvaho Nshya yavuze ko Umujyi wa Kigali watangiye gutunganya aho hantu hahoze inganda hangana na hegitari 1.8. Ati “Ibikorwa byo gutunganya aho hantu biteganywa ko hazagirwa nyaburanga byaratangiye, igishushanyo mbonera cyaho kirahari.”

Mu masezerano Umujyi wa Kigali wagiranye na rwiyemezamirimo watsindiye isoko ryo kuhatunganya, biteganyijwe ko uwo mushinga wo kuhatunganya uzarangira mu mwaka utaha wa 2018.

Ibikorwa biteganyijwe aho hantu hari ubusitani buzashyirwamo indabo, ibiti by’umurimbo, ibikinisho by’abana, resotora yakwakira abantu bahatemberera, amatara azamurikira abaza kuhatemberera nijoro n’ibindi.

Mu rwego rwo kuhabyaza umusaruro, umuyobozi w’Umujyi wa Kigali wungirije ushinzwe imibereho myiza yavuze ko ibyo batarabikorera igenamigambi, ko ahubwo bateganya ko nibamara kuhatunganya bazashaka undi muntu bagirana amasezerano wo kuhabyaza umusaruro. Uyu mushinga uzarangira utwaye amafaranga y’u Rwanda asaga miliyoni 600.

Mu gice kindi kigomba gutunganywa n’Ikigo cy’igihugu gishinzwe kwita ku bidukikije, REMA, hari ahatarimurwa inganda n’ibindi bikorwa. Kuri icyo kibazo cy’ibikorwa bitarimurwa, Minisiteri y’Ubucuruzi, Inganda n’Ibikorwa by’Umuryango wa Afurika y’Iburasirazuba, MINEACOM, iravuga ko hari ibirimo gukorwa kugira ngo ibyo bikorwa byimurwe.

Minisitiri w’ubucuruzi, inganda n’ibikorwa by’Umuryango w’Afurika y’Iburasirazuba, Francois Kanimba yabwiye Imvaho Nshya ko hamaze kwimurwa inganda 9 hakaba hasigaye inganda 5, ariko n’izisigaye zizimurwa bitarenza uyu mwaka.

Yagize ati “Ahahoze inganda i Gikondo hasigaye inganda 5 turimo turakora uko dushoboye kugira ngo zizimuke, uyu mwaka uzajya kurangira na zo zarimuriwe mu gice cyagenewe inganda.”

Gusa ngo haracyari ibindi bikorwa remezo bikigoranye kwimurwa ariko na byo birimo gushakirwa igisubizo. Minisitiri Kanimba atangaza ko hakiri ibindi bikorwaremezo bitari inganda bikigoranye kwimurwa kuko bitazimurirwa mu bice byagenewe inganda.

Ati “Ba nyiri ibyo bikorwa tuzababarira agaciro k’amazu yabo bimurwe, hashyizweho itsinda ryihariye ryiga ukuntu igikorwa cyo kubimura cyazakorwa.”

Ku bijyanye n’igishanga cya Nyabugogo n’ahakiri inganda, Umuyobozi mukuru w’Ikigo cy’Igihugu gishinzwe kwita ku bidukikije, Eng. Ruhamya Coleta, yabwiye Imvaho Nshya ko harimo gukorwa inyigo y’icyazahakorerwa.

Yagize ati “Igishanga cya Nyabugogo cyatangiye gukorerwa inyigo kugira ngo harebwe icyazahakorerwa, nyuma hashakishwe amafaranga yo gushyira mu bikorwa ibizaba byemejwe.”

Ikigo cy’igihugu gishinzwe kwita ku bidukikije, REMA, nta bwo gitangaza igihe nyacyo hazatangirira gutunganyirizwa.

UWIMANA DONATA

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE