2017-08-18 19:28:21 clouds 27o High | Kigali Rwanda

Dukurikire:
 
 

U Rwanda rurashimirwa gukorana n’amasendika y’abakozi

Yanditswe na IMVAHO NSHYA

Kuya 2017-08-11 16:27:54

 
Share on:
 
Yasuwe:152
 
Yavuzweho:200
 
10
 
10

Urugaga rw’amasendika y’abarimu mu rwego rw’Afurika y’Uburasirazuba “FEATU”, rusanga u Rwanda ari kimwe mu bihugu by’akarere byubaha bigakorana neza n’amasendika y’abakozi.

Umuyobozi wa FEATU Ahimbisibwe John, yashimye u Rwanda i Kigali, kuri uyu wa 11 Kanama 2017 nyuma yo gutangiza kongere ya kabiri yahuje abarezi bahuriye muri sendika yo mu bigo by’uburezi byigenga ‘SYNEDUC’.

Ahimbisibwe yavuze ko mu karere u Rwanda ari rwo rukorana neza n’amasendika y’abakozi by’umwihariko abakora mu bigo by’uburezi byigenga, kuko bituma n’umusaruro wiyongera.

Mu gihe cy’iminsi ibiri, abari muri iyo kongere baturutse mu Rwanda, Uganda, Kenya, Tanzania n’u Burundi, baraganira banasuzume ibyakozwe mu gihe cy’imyaka 5, inzitizi bahuye na zo, habeho kumurika ibikorwa byarangiye, guhemba abarezi bitwaye neza, no gushakira hamwe ingamba zo guteza imbere imikoranire y’amasendika y’abarezi bo mu bigo byigenga.

JPEG - 196.7 kb
Ahimbisibwe uyobora Unatu ubanza ibumoso n’abandi basendikariste bo mu karere

Ntagaramba Johnson ushinzwe imicungire y’abarimu mu Kigo cy’Igihugu cy’Uburezi, REB, yijeje ko ikigo ahagarariye kizakomeza gukorana n’amasendika mu rwego rwo gufatanya gukemura ibibazo birimo, asaba ko amasendika mu gihugu yakomeza gukorera ku murongo, aho kuvuga ibitagenda gusa.

Ati “Igihe kirageze ngo abarezi bajye bahabwa uduhimbazamusyi kuko ari bwo barushaho gukora neza, ku buryo n’abakoze neza bahabwa ibihembo.”

Abashinzwe amasendika y’abakozi bo mu bigo byigenga, bo mu bihugu byo mu karere bitabiriye iyo nama, bose bahurije kuri gahunda yo kwishyira hamwe no guteza imbere imikoranire y’abayobozi b’ibigo hamwe n’inzego za Leta, kuko ari bwo inshingano bafite yo kuvuganira abarimu kugira ngo ibibazo byabo bimenyekane zigerwaho.

Tianki John wari uhagarariye sendika y’abarimu bo mu gihugu cya Kenya, ati “Ni ngombwa ko twese dushyira hamwe, kuko ari bwo intego twihaye zizagerwaho. Erega iyo ibitagangurirwa bishyize hamwe, bishobora guhambira inzovu.”

Umunyamabanga mukuru wa SYNEDUC mu Rwanda Abdon Nkotanyi, avuga ko kwishyira hamwe no gukorana n’amasendika y’ahandi nko mu karere bifite ubusobanuro mu birebana n’ubufatanye no kugera ku musaruro ukenewe, atanga ingero z’uko kuva SYNEDUC yatangira gukora, imaze gukora ubuvugizi no kurenganura abantu basaga 22 mu manza batsinze, bityo babasha guhabwa uburenganzira bwabo bemererwa n’itegeko.

SYNEDUC yatangiye mu mwaka wa 2013, kugeza ubu ifite abanyamuryango 7 300.

TWAGIRA WILSON

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE