2017-08-18 19:28:21 clouds 27o High | Kigali Rwanda

Dukurikire:
 
 

Nyabihu:Abasaga 20,000 bakuwe mu bukene n’imirimo bahawe mu mushinga urengera ibidukikije

Yanditswe na IMVAHO NSHYA

Kuya 2017-07-14 11:14:27

 
Share on:
 
Yasuwe:65
 
Yavuzweho:200
 
10
 
10

Abaturage 20 682 bo mu mirenge itandukanye mu karere ka Nyabihu, barishimira imirimo y’amaboko bahawe mu mushinga ugamije guhangana n’ingaruka z’imihindagurikire y’ikirere, RV3CBA, bakuyemo amafaranga menshi akabafasha kwiteza imbere.

Ibikorwa aba baturage bagiye bahabwamo imirimo ni ibijyanye no gukora amaterasi y’indinganire, kubaka amazu y’imidugudu yubatswe muri aka gace, n’ibindi bikorwa bitandukanye bemeza ko byahinduye ubuzima n’imibereho yabo.

Munyawera Epimaque, umwe mu basaza batuye muri aka karere, akaba n’umwe mu batishoboye bahawe imirimo mu bikorwa byo gukora amaterasi, yagize ati “Imirimo twahawe yatugiriye akamaro cyane muri aka gace, kuko yatumye twikura mu bukene bukabije twari turimo, mbere njye ntarayabona nari mu cyiciro cya 1 cy’ubudehe ariko amafaranga nizigamiraga 1000 ku munsi ibindi byose byavuyemo, yaramfashije kuko nyuma y’amezi atatu gusa nari maze kwigurira isambu.”

JPEG - 120.2 kb
Ubwo hubakwaga izi nzu hari umubare munini w’abaturage bahawe akazi

Uyu muturage akomeza avuga ko muri iyi mirimo bahawe amafaranga yakuyemo nta handi yakekaga azayakura, kandi yatumye umuryango we ubaho neza nk’uko bikwiye, kuko ngo uretse n’isambu yaguze, yanaguze amatungo magufi agenda abunganira mu buzima bwabo ba buri munsi.

Uwanzwenuwe Theoneste, umuyobozi w’akarere ka Nyabihu, aganira n’Imvaho Nshya yagize ati “Mbere abaturage twari dufite bagiye bahabwa imirimo itandukanye, bari babayeho nabi cyane ariko kuba barahawe imirimo mu bikorwa byakozwe n’umushinga byabaye imbarutso y’iterambere ryabo, hari abo dufite batabashaga kuba bakwizerwa n’Umurenge Sacco, ariko kuba barakoze mu mirimo y’umushinga ubu barajyayo bakakirwa neza bagahabwa inguzanyo.”

Akomeza asaba aba baturage bagera ku 20 682 kudasubira inyuma mu ntera bari bamaze kugeraho, akabizeza ko ibikorwa nk’ibi bizakomeza mu rwego rwo gufasha abatishoboye kuva mu bukene.

IYAREMYE YVES

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE