2017-12-14 06:12:25 clouds 27o High | Kigali Rwanda

Dukurikire:
 
 

Ibikubiye mu nyandiko y’imicungire y’inzibutso za Jenoside zizandikishwa mu murage w’isi

Yanditswe na IMVAHO NSHYA

Kuya 2017-08-11 16:11:55

 
Share on:
 
Yasuwe:69
 
Yavuzweho:200
 
10
 
10

Komisiyo y’Igihugu yo kurwanya Jenoside (CNLG) n’abafatanyabikorwa barimo inzego za Leta, Sosiyete Sivile n’uturere inzibutso ziherereyemo, bagiranye inama nyunguranabitekerezo ku nyandiko y’imicungire y’inzibutso 4 za Jenoside yakorewe Abatutsi mu Rwanda mu 1994, ishaka kwandikisha ku rutonde rw’umurage w’isi rwa UNESCO.

Muri gahunda yo kwandikisha izo nzibutso 4 (Nyamata, Murambi, Gisozi na Bisesero) inzobere za Renew Plus Ltd, zateguriye CNLG inyandiko ijyanye n’imicungire n’ibungabungwa ryazo.

Iyo nyandiko ifatwa nk’umurongo ngenderwaho ku bindi bikorwa byose bishobora gukorwa kuri izi nzibutso mu rwego rwo kwirinda ko ibimenyetso zifite byahungabana.

Bimwe mu bikubiye muri iyo nyandiko

Mu kiganiro n’Imvaho Nshya, Dr Philibert Gakwenzire wateguye iyi nyandiko yagarutse kuri bimwe mu biyikubiyemo. Yagize ati “ Muri gahunda yo kwandikisha ziriya nzibutso ku rutonde rw’umurage w’isi, haba hagomba kubaho inyandiko igaragaza uko ibyasabwe kwandika ku rutonde rw’umurage w’isi bizabungwabungwa ntihazagire ikibikoma, bikabaho igihe kinini; ibisekuruza n’ibisekuruza.”

Yavuze ko iyo nyandiko igaragaza aho inzibutso ziherereye, agaciro kazo mu rwego rw’amateka kuko ari ibimenyetso bigaragaza aho Jenoside yakorewe Abatutsi yabereye n’uko yagenze n’ubwo atari ho honyine, igaragaza kandi agaciro kazo ku rwego rwa politiki kuko Leta yashyizeho gahunda y’uko hagomba kwibukirwa kandi abantu bose bakahagana, bakahigira uko ibyabaye bitakongera kubaho.

Hari kandi agaciro mu rwego rwo kwigisha n’ubushakashatsi. Dr Gakwenzire yagize ati “ ukurikije ibimenyetso biri kuri izi nzibutso, hari za kaminuza zagiye zibiheraho zigategura isomo runaka. Kuri iki kijyanye n’ubushakashatsi hari ibitabo byinshi bimaze kwandikwa n’abanditsi bakomeye nka Patrick de Saint-Exupéry wanditse ibitabo byinshi kuri Jenoside yabereye mu Bugesera,… Ni yo mpamvu ibi tugomba kubigaragaza kugira ngo UNESCO izabone agaciro izi nzibutso zifite.”

Iyi nyandiko kandi igaragaza uko inzibutso zihagaze ubu mu rwego rwo kuzikurikirana no kubungabunga ibimenyetso zifite hifashishijwe uburyo bugezweho, igaragaza amategeko menshi yashyizweho azirengera; arebana n’ibikorwa byo kwibuka, ahana icyaha cyo gupfobya Jenoside, ay’ibidukikije (mu kwirinda ko hari ibikorwa byakorerwa hafi y’inzibutso bikaba byashajisha ibimenyetso), ay’imiturire,… Hanagaragazwa ingufu za Leta n’uruhare rw’abaturage mu kuzibungabunga, n’ahakiri intege nke.

Yerekana uburyo ngenderwaho bw’ibizakorwa ziriya nzibutso zimaze kwemerwa ku rutonde rw’umurage w’isi, ibijyanye no gukomeza kuzibungabunga n’ubushakashatsi bufite intumbero z’uko ari inzibutso zagiye ku rwego mpuzamahanga. Ikindi kigaragazwa ni ibiro byashyirwa aho ziri, ahakirirwa abantu bazisura, inzu y’ibitabo n’uruhare rw’ikoranabuhanga mu kubika ibimenyetso.

Akamaro ko kwandikisha ziriya nzibutso

Butoto Jean umukozi wa CNLG ushinzwe umushinga wa UNESCO wo kwandikisha ziriya nzibutso 4 ku rutonde rw’umurage w’isi, agaruka ku kamaro ko kuzandikisha.

Ati “ Kwandikisha ziriya nzibutso bizafasha kubungabunga amateka ya Jenoside yakorewe Abatutsi, uyu munsi n’igihe kizaza, ni uburyo bufatika bwo kurwanya Jenoside n’ingengabitekerezo yayo hifashishijwe ibihamya inzibutso zifite, ikindi ni ukwereka amahanga ubugome bwakorewe inzirakarengane zazize Jenoside yakorewe Abatutsi kuko iyo urebye ibimenyetso ndangamateka bizirimo uhita ubona ubugome ndengakamere bwakorewe Abatutsi mu gihe cya Jenoside. Ikindi ni ukugira ngo inzibutso zizahoreho ibihe byose; ari ahantu ho kwigirwa amateka ya Jenoside no kunamira inzirakarengane zazize Jenoside yakorewe batutsi.”

Impamvu hatoranyijwe ziriya nzibutso 4

Muri 2004 , ubwo habaga ibarura ry’umurage kamere n’umurage ndangamateka na ndangamuco mu gihugu hose, habaye guhitamo inzibutso ndangamateka zakwandikwa ku rutonde rw’umurage w’isi hakurikijwe ibitekerezo byari byatanzwe n’Abanyarwanda ku bufatanye bw’inzobore yari yoherejwe na UNESCO mu Rwanda.

Urwibutso rwa Gisozi

JPEG - 312.2 kb
Urwibutso rwa Jenoside yakorewe Abatutsi rwo ku Gisozi ni rumwe mu zatoranyijwe u Rwanda rushaka kwandikisha ku rutonde rw’umurage w’Isi

Urwibutso rwa Jenoside rwa Gisozi ruri mu Mujyi wa Kigali, Akarere ka Gasabo. Ni rwo runini mu Gihugu urebye umubare w’abarushyinguyemo basaga 250.000 bavanywe hirya no hino mu Mujyi wa Kigali no mu nkengero zawo. Uru rwibutso rwubatswe mu 1999.

Butoto avuga ko uru rwibutso rwatoranyijwe nk’uruhagarariye izindi nzibutso zishyinguyemo imibiri y’Abatutsi bazize Jenoside bagiye bicirwa ahantu hatandukanye; ku misozi, kuri za bariyeri n’ahandi hantu hatandukanye bagiye bajugunywa.

Urwibutso rwa Murambi

Urwibutso rwa Jenoside yakorewe Abatutsi rwa Murambi rwubatse mu Mudugudu wa Murambi, Akagari ka Remera, Umur enge wa Gasaka, Akarere ka Nyamagabe ruri kuri km 126 uvuye i Kigali na km 3,5 uvuye mu Mujyi wa Nyamagabe.

Ku bijyanye n’uru rwibutso, Butoto avuga ko ruhagarariye izindi nzibutso z’ahantu rusange Abatutsi biciwe; kwa muganga, ku mashuri, muri za sitade,...

Bimwe mu bice bigirize uru rwibuto; ni igice gikubiyemo amateka cyane avuga kuri Jenoside, igice gishyinguyemo imibiri igera ku 50 000 n’ igice kibitse imibiri igera 1200 mu mashuri ari na ho abenshi baguye.

Urwibutso rwa Nyamata

Urwibutso rwa Jenoside rwa Nyamata ni urwibutso rwa Kiliziya yiciwemo Abatutsi, rwubatse mu karere ka Bugesera mu murenge wa Nyamata. Ruhagarariye izindi nzibutso za kiliziya Abatutsi biciwemo.

Urwibutso rwa Bisesero

Urwibutso rwa Bisesero ruherereye mu mudugudu wa Kibingo, akagari ka Gitabura, Umurenge wa Twumba mu Karere ka Karongi. Rwubatswe mu 1998 kugira ngo rubungabunge amateka ya Jenoside yakorewe Abatutsi mu karere ruherereyemo y’ubutwari bwo kwirwanaho kw’Abatutsi banganga kwicwa barebera. Ruhagarariye izindi nzibutso zigaragaza amateka y’uko Abatutsi bagerageje kwirwanaho mu gihe cya Jenoside.

Butoto avuga ko muri 2012 ari bwo u Rwanda rwemerewe by’agateganyo ko izi nzibutso zakwanditwa kuri ruriya rutonde, ibisabwa kugira ngo zandikwe bikaba bikomeje gukusanywa.

U Rwanda ruri mu bihugu byasinye amasezerano yo kubungabunga umurage ndangamuco n’amateka. Ni amasezerano aha Leta z’ibihugu uburenganizra n’inshingano muri iyi gahunda yo kubungabunga umurage ndangamuco na ndangamateka, UNESCO na yo iba ifite uburenganzira n’inshingano zo gutera inkunga ibikorwa birebana no kubungabunga imirage ndangamuco na ndangamateka, igakomeza no gukurikirana ibikorwa byanditswe ku rutonde rw’umurage w’isi kugira ngo bitazazimira.

UNESCO ivuga ko kugeza ubu inzibutso ndangamateka zanditse mu murage w’Isi zikiri nkeya cyane, aho kugeza ubu izo ifite ari izirebana n’ubucakara bwakorewe abirabura, site ya Jenoside yakorewe Abayahudi, na gereza yo mu kirwa cya Robben aho umukambwe Nelson Mandela yafungiwe mu gihe yarwanyaga ivanguramoko (APARTHEID) muri Afurika y’epfo.

Ahantu h’ibimenyetso by’amateka hari ku rutonde rw’umurage w’isi hagera kuri 1052 ku isi hose mu ngeri zinyuranye.

Tumukunde Georgine

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE