2017-11-18 15:01:47 clouds 27o High | Kigali Rwanda

Dukurikire:
 
 

Burera: Polisi yasabye abaturage kwirinda gukoresha abana imirimo ivunanye

Yanditswe na IMVAHO NSHYA

Kuya 2017-01-02 07:44:41

 
Share on:
 
Yasuwe:3
 
Yavuzweho:200
 
10
 
10

Nyuma y’aho bigaragariye ko hari ababyeyi batamenya uburenganzira bw’umwana; ahubwo bakabakoresha imirimo ivunanye, ku itariki ya 28 Ukuboza 2016, Polisi y’u Rwanda n’umugenzuzi w’umurimo mu karere ka Burera bagiranye inama n’abaturage b’umurenge wa Gitovu, basobanurirwa uburenganzira bw’umwana, banasabwa kutabakoresha imirimo ivunanye.

Ushinzwe ubugenzuzi bw’umurimo muri aka karere,Uwitonze Angelique yababwiye ko kutamenya ubusobanuro bw’ijambo "umwana" bituma benshi babashora mu mirimo ivunanye, abasobanurira ko umwana ari umuntu wese utarageza ku myaka cumi n’umunani (18) y’amavuko.

Yagize ati,"Umuntu wese utarageza kuri iyo myaka agomba kurindwa ikintu cyose cyahungabanya ubuzima bwe, cyane cyane kumukoresha imirimo ivunanye, kumutoteza cyangwa kumujujubya."

Yababwiye ko umwana afite uburenganzira bwo kubaho, kwiga, kwandikishwa igihe avutse, kuvuzwa, kumenya ababyeyi be, kurindwa ivangurwa, kurindwa gushimutwa no gucuruzwa, kugaragaza igitekerezo cye, kuruhuka, kwidagadura, n’ubundi.

Umuyobozi w’umurenge wa Gitovu, Muhire Silas yabwiye abo baturage ko bibabaje kuba hari ababyeyi bagihohotera abana kubera uburyo bavutse, abo bikunze kubaho bakaba ari ababyarwa n’abakobwa babyarira iwabo.

Yababwiye ati,"Abana babyarwa n’abakobwa bakiri iwabo bahabwa amazina abapfobya kandi abangamira uburenganzira bwabo. Hari ababita ’Ibinyendaro’, bamwe muri bo bakavutswa uburenganzira bwo kumenya ba se kuko baba babihakanye. Ibi dukwiye kubirwanya twese."

Muhire yavuze ko imirimo ivunanye ikunda gukoreshwa abana mu murenge wa Gitovu ari ukubatundisha amabuye yo kubaka, ifumbire, kubikoreza amakara, imicanga n’inzoga; gukora mu birombe by’amatafari n’amategura, kubakoresha imirimo yo mu ngo nk’ububoyi n’ubuyaya, n’ibindi.

Ushinzwe imikoranire ya Polisi y’u Rwanda n’abaturage ndetse n’izindi nzego mu karere ka Burera, Assistant Inspector of Police (AIP) Phelin Nshimyumukiza yababwiye ko kubabaza umwana, kumuha ibihano biremereye cyangwa bitesha agaciro bihanishwa gufungwa kuva ku mezi atandatu (6) kugeza ku myaka ibiri (2), n’ihazabu y’amafaranga y’u Rwanda kuva ku bihumbi ijana (100.000) kugeza ku bihumbi magana atatu (300.000), abasaba kutazahura n’ibi bihano, birinda gukora ibibuzwa n’amategeko.

Yagize ati,"Muhagurukire kurwanya imirimo mibi ikoreshwa abana batarageza ku myaka 18 y’amavuko; aho mubibonye mutange amakuru, buri wese iki kibazo akigire icye."

Yanasabye ababyeyi kubuza abana gukinira hafi no mu biyaga bya Burera na Ruhondo kuko bikunze gutwara ubuzima bw’abantu.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE