2017-09-26 12:43:25 clouds 27o High | Kigali Rwanda

Dukurikire:
 
 

Umugabo w’i Nyamasheke afungiwe kurya umugore we umunwa akawumira

Yanditswe na IMVAHO NSHYA

Kuya 2017-01-12 12:19:42

 
Share on:
 
Yasuwe:108
 
Yavuzweho:200
 
10
 
10

Ntambabazi Emmanuel w’imyaka 57, wo mu kagari ka Kagarama, umurenge wa Karambi, mu karere ka Nyamasheke, akurikiranweho guhohotera umugore we Nyiranzabahimana Espérance w’imyaka 30, akamurya umunwa wo hasi akawumira.

Umunyamabanga nshingwabikorwa w’akagari ka Kagarama, Subukino Gratien , yabwiye Imvaho Nshya ko uyu mugabo afungiye kuri sitasiyo ya polisi ya Macuba muri aka karere mu gihe umugore we arwariye mu bitaro bya Kibogora.

Subukino avuga ko mu ijoro ryo kubunani, bahurujwe bavuga ko yari agiye kwica umugore we, bagasanga yamuciye umunwa, amenyo asigaye yanamye.

Yemeza ko Ntambabazi ashobora kuba yarawumize kuko batabonye aho watakaye, ngo umugore bahise bamujyana ku kigo nderabuzima cya Karambi avirirana, birananirana ajyanwa ku bitaro bya Kibogora igitaraganya, n’ubu ari ho akirembeye.

Ubwo Imvaho Nshya yasuraga uyu mugore muri ibi bitaro ari kumwe n’akana k’umwaka n’igice yonsa, adashobora kuvuga neza, yayibwiye ko umugabo yatashye yasinze saa moya z’ijoro amubwira ko hari undi umugabo wamuziye mu rugo.

JPEG - 269.1 kb
Nyiranzabahimana avuga ko adashaka kuzongera gusubirana n’uyu mugabo ufite amateka maremare mu bugizi bwa nabi.

Umugore yamubwiye ko ntawe yabonye, bakomeza gutongana ariko umugore ajya kuryama. Bigeze saa tanu z’ijoro umugabo yavuze ko yumvise hari undi mugabo ukomanga, afata umuhoro ashaka kumutema undi aramucika.
Ati “Naramucitse ngeze mu cyumba cy’uruganiriro aramfata ahita anduma umunwa igice cyo hasi cyose awukuraho. Sinamenye ibyakurikiyeho nisanze ndi muri ibi bitaro nagezemo mu gitondo cya kare cyo ku wa 2 Mutarama n’ubu sinzi igihe nzabiviramo.’’

Yakomeje agira ati “Nifuza ko ubutabera bwakora akazi kabwo, icyakora akampa ikirera abana banjye babiri ndumva ningira amahirwe ngakira, ntazongera gusubirana na we kuko arandembeje. Najyaga muhungira kwa mabukwe nkagaruka ariko ubu bwo ndamuhunga ntagiye kunyica ndeba.’’

Umuyobozi w’ibi bitaro, Dr Nsengiyumva Nathanael avuga ko bakomeje kumusanasana ariko ko atazavamo vuba.

Ubuyobozi bwemeza ko uyu mugabo ko afite amateka maremare y’ubugome ku buryo nabwo bwifuza ko yakanirwa urumukwiye.

Gitifu Subukino ati “Amakuru dufite ni uko uriya mugore ari uwa kane. Uwa mbere yaramwishe mu myaka ya za 1980, yaramukubise kugeza apfuye babyaranye rimwe gusa akatirwa amezi 11. Ashaka uwa kabiri amuhunga na we ari hafi kumwica. Muri Jenoside yakorewe Abatutsi na bwo ayinjandikamo, abifungirwa imyaka 12, afunguwe ashaka umugore wa 3 na we amukubita inyundo mu mutwe no mu zindi ngingo, umugore yamaze icyumweru muri koma avamo yigendera, none dore uko agize uwa kane amuciye umunwa arawurya.’’

Iki kibazo cyasuzumiwe mu nama y’umutekano y’aka karere ka Nyamasheke yateranye ku wa 11 Mutarama, umuyobozi wako Kamari Aimé Fabien,avuga ko uyu mugabo agiye gukurikiranwa n’ubutabera, cyane cyane ko amaze kugaragara mu bugome bwinshi kandi nta bundi burwayi bazi afite.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE