2017-08-18 19:28:21 clouds 27o High | Kigali Rwanda

Dukurikire:
 
 

Rusizi: Abacuruzi n’abarema isoko rya Muganza barasaba ko ryubakwa

Yanditswe na IMVAHO NSHYA

Kuya 2017-08-12 12:41:06

 
Share on:
 
Yasuwe:32
 
Yavuzweho:200
 
10
 
10

Abacuruza n’abarema isoko rya Muganza riri mu murenge wa Muganza mu karere ka Rusizi barasaba ko ryubakirwa kugira ngo baruhuke kwicwa n’imvura n’izuba.

Abacuruzi n’abahahira muri iryo usanga ari benshi cyane, babwiye Imvaho Nshya ko mbere y’uko umuhanda wa kaburimbo uhagera hahoraga ivumbi ryinshi cyane riturutse ku modoka nyinshi zihanyura.

Icyondo nacyo kikaba cyari cyinshi cyane mu mvura nyinshi, ariko ubu ivumbi n’icyondo bikaba byaragabanutse, igisigaye kikaba ari imvura n’izuba.

Bavuga ko mu gihe bakubakirwa isoko rya kijyambere byaba bishimishije cyane kuko bakora neza mu mutekano, baticwa n’imvura n’izuba, bakanarushaho kwinjiza imisoro myinshi.

JPEG - 203.9 kb
Abacururiza muri iri soko bifuza kubakirwa irya kijyambere (Foto Bahuwyingera S)

Muhawenimana Josepha uhacururiza ifu yavuze ko kubera kutubakirwa n’ubundi hakiri isuku nke, kuko nk’ifu baha abakiliya hari igihe iba yagiyemo ivumbi ryo mu isoko, mu mvura na bwo bikaba ibibazo kuko badafite n’aho bayitereka hasukuye, agasaba ko bakubakirwa vuba.

Yagize ati “Dukeneye kubakirwa isoko kuko dukorera ahantu hadatunganye, hatubakiye, ariko batwubakiye isoko rya kijyambere twakunguka na Leta ikunguka kuko ahangaha abantu benshi bamaze kuhamenyera kandi hari ubucuruzi bwinshi, ariko gukorera ahantu nk’aha hatubakiye biratubangamiye”.

Nahimana Marie Josée wari guhaha imboga na we yagize ati “Imboga tugura hano ntitwizera ko ziba zujuje ubuziranenge rwose kuko iyo ari ku zuba ryinshi ziba zumagaye kuko n’udushitingi bashyiraho tuba tutameze neza, mu mvura ho bikaba ibibazo birenze, ariko hasakaye natwe abaguzi twahaha tunezerewe cyane, kuko twaba duhahira ahahesheje icyubahiro.”

Bavuga ko icyifuzo cyabo gisubijwe banezerwa nk’uko banezerewe ubwo babonaga umuhanda wa kaburimbo kuko yaba ari indi ntambwe y’iterambere yaba itewe mu murenge wabo, bakizera ko bizakorwa kuko n’ubuyobozi na bwo bubona ko ari ikibazo gikomeye cyane.

Umunyamabanga nshingwabikorwa w’uyu murenge wa Muganza, Muganga Alain Emmanuel, avuga ko iki ari ikibazo kizwi kandi na bo biteguye gukemura uko ubushobozi buzagenda buboneka, hakaba hari icyizere ko bizakemuka kuko na bo babona ko igihe ryakubakwa ryakemura byinshi byanatuma hinjira amafaranga menshi aturuka ku misoro kuruta ayinjira ubu.

BAHUWIYONGERA SYLVESTRE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE