Advertisement
 
 
 
 
 
 
 
 

Amakuru | Mu Ntara | Intara

Ngoma:Ibiyobyabwenge bya miliyoni 7 byangirijwe mu ruhame   

  Yanditswe na MANISHIMWE NOËL
 3 months ago

 
 

Ibiyobyabwenge bigizwe n’ibiro 145 by’urumogi, Litiro 348 za kanyanga, n’insheke zifashishwa mu guteka kanyanga 36, byose bifite agaciro k’amafaranga y’u Rwanda angana na miliyoni 7 n’ibihumbi 544 byangirijwe mu ruhame kuwa 6 Mutarama 2017, mu murenge wa Kibungo, akarere ka Ngoma.

Ibi biyobyabwenge byari bimaze igihe bikusanywa, kuko byafashwe kuva mu kwezi kwa Nzeri kugeza kuwa 31 Ukuboza 2016, ku bufatanye n’inzego z’umutekano n’abaturage binyuze mu gutanga amakuru n’amarondo.

Byafatiwe mu mirenge ya Kibungo, Rukira, Murama, Remera, Kazo, Karembo, na Rurenge yose yo muri aka karere ka Ngoma.

Mbere yuko byangizwa, urubyiruko rwiganjemo abatwara abantu n’ibintu ku magare n’amapikiki/moto mu mujyi wa Kibungo, baturuka hirya no hino mu karere ka Ngoma basobanuriwe uburyo ibiyobyabwenge byangiza ubuzima bw’ubinywa, bikagira n’ingaruka ku bantu batabinywa, dore ko akenshi abamaze kubihaga badatana n’imyitwarire ikurura umutekano muke.

JPEG - 387.9 kb
Mu biyobyabwenge byangijwe harimo n’urumogi

SSP Mutanganda Janvier, Umuyobozi wa Polisi y’u Rwanda mu karere ka Ngoma, yasabye uru rubyiruko rwitabiriye igikorwa cyo kwangiza ibi biyobyabwenge kwirinda kunywa, gukoresha no gukwirakwiza ibiyobyabwenge, kuko ari bibi ku buzima bwabo bwite n’ubw’abandi, ariko anabibutsa ko hejuru y’ibyo n’ubifatiweho ahabwa ibihano bikarishye.

Uyu muyobozi wa Polisi mu karere ka Ngoma kandi yanabasabye ubufatanye mu kubikumira, batanga amakuru y’aho bakeka bicururizwa, ababicuruza n’abateka kanyanga.

Yagize ati “Iyo unyonye kanyanga, cyangwa urumogi ubwenge bwawe ntabwo bwongera gukora neza, burayoba. Ibiyobyabwenge bigira ingaruka ku buzima bw’abaturage, bitera indwara, ubukene, n’igifungo ku bafatanywe ibiyobyabwenge.

Dusaba buri wese kuba ijisho ry’akarere kacu, ahantu hose hari ikiyobyabwenge yaba ari ukinywa, uteka niba ari kanyanga, akamenyekana, tukamwigisha, abandi bagahanwa.”

SSP Mutanganda kandi asaba abaturage kwirinda ibiyobyabwenge kuko n’ibihano ku bo bigaragayeho byakajijwe, hagamijwe ko byacika burundu.

Yagize ati “Ibiyobyabwenge ni byo bivamo ibindi byaha byinshi nko guhohotera, kandi mwuvise ko ibihano bigenda bizamuka, nubwo bagufatana kariya gacupa gato ka kanyanga, ibihano birangana n’ibya wa wundi uyiteka, kuko mu Rwanda harimo imbaraga zo kubirwanya kugira ngo bicike. Turashaka abanyarwanda bazima, bafite ubuzima bwiza, bafite ubwenge, bakora bagatera imbere mu nzira nziza.”

Nyuma yo kubwirwa ububi bw’ibiyobyabwenge n’uburyo ibihano ababifatanywe bagenerwa, urubyiruko rwaganiye n’Imvaho Nshya rwagaragaje ko rufashe ingamba zo guharanira ko ibiyobyabwenge byacika burundu.

Uwiragiye Eliyezeli ukora umwuga gutwara abantu n’ibintu kuri moto yagize ati “Ibihano bihanitse ni byiza, bariya bantu banywa n’abacuruza ibiyobyabwenge iyo bafashwe bagahanwa cyane bituma n’iyo bamurekuye, akajya mu buzima busanzwe ntabwo ashobora kubisubiramo, kandi bibera n’abandi basigaye isomo; kuko babona ko ibihano bikaze.

Kandi natwe twiyemeje gufatanya na Polisi guta muri yombi abashobora kuba bakoresha ibiyobyabwenge, kuko tujya tubabona.”
Ngiruwonsanga Joseph, na we yagize ati “Nkanjye ngiye ntwara umuntu ufite ibiyobyabwenge nkabimenya, ni uguhita ntanga amakuru ku nzego z’umutekano, agafatwa agahanwa, kuko muretse ibiyobyabwenge byakomeza gukwirakwizwa, kandi ikigaragara nuko ibiyobyabwenge ari bibi cyane.

Nkanjye nshishikariza abamotari n’abanyonzi, mbere yuko bajya gutwara umuntu ufite akazigo, bajye bagira amakenga, bamenye ikirimo, kuko hari ubwo haba harimo urumogi cyangwa kanyanga, mu by’ukuri nk’uko twabisobanuriwe dufatanyije byacika.”

Umuyobozi w’akarere ka Ngoma Nambaje Aphrodise, we yasabye urubyiruko n’abaturage bo mu karere ka Ngoma muri rusange gufatanyiriza hamwe kurwanya ibiyobyabwenge byiganjemo inzoga z’inkorano, kanyanga n’urumogi bigaragara mu karere ka Ngoma, kuko bidindiza iterambere.

Yavuze ko u Rwanda rwifuza ko abanyarwanda bose babaho neza, bakora bagatera imbere, bari mu gihugu kiza kizira ibiyobyabwenge.

Mukwaya Jean, Umushinjacyaha ku rwego rw’ibanze rwa Kibungo avuga ko kugeza ubu mu Rwanda itegeko rivuga ko unywa ibiyobyabwenge by’urumogi na kanyanga ahanishwa igifungo cy’imyaka 3, agacibwa n’ihazabu y’amafaranga y’u Rwanda ibihumbi 500.

Naho ugurisha, ucuruza n’ukwirakwiza ibyo biyobyabwenge we ahanishwa igifungo cy’imyaka 5, agacibwa n’ihazabu z’amafaranga y’u Rwanda miliyoni 5. Yongeraho ko hari irindi tegeko rishya riteganya ibihano bikarishye gusumba ibiriho ubu, ku biyobyabwenge, riri hafi gusohoka.

Hamwe n’ibi bihano byose, abanywa n’abakwirakwiza ibiyobyagwenge muri aka karere baburiwe, bibutswa ko hejuru yo kwiyangiriza ubuzima bashobora kwisanga baguye mu bihano.

Mu ruzinduko aherutse kugirira mu karere ka Kirehe mu kwezi kw’Ukwakira 2016, Umuyobozi w’ingabo z’u Rwanda mu ntara y’Uburasirazuba n’umujyi wa Kigali General Major Mubarak Muganga, yagaragaje ko kimwe mu bituma ibiyobyabwenge bidacika muri iyi ntara, harimo n’ikibazo cy’abayobozi b’inzego z’ibanze bakingira ikibaba ababinywa n’ababicuruza, avuga ko aho bizajya bigaragara n’abayobozi baho bazajya babibazwa.

Yagize ati “Kanyanga ni mbi, yica ubuzima, imunga ubuzima.Umuntu dufatanye kanyanga ayiteka, umuntu dufatanye urumogi, atwicira abantu, njyewe uriya mufata nk’umucengezi. Ni yo mpamvu aho tuzajya dufata ingunguru (itekwamo kanyanga), umukuru w’umudugudu asezera, aho tuzafata 2, umukuru w’akagari asezera.Ntabwo dushaka ikintu cyangiza ubuzima bw’abanyarwanda.”

 

Comments

 
 
Karongi:Abatuye i Kabuga batewe impungenge n’abajura bahayogoje
Karongi:Abatuye i Kabuga batewe impungenge n’abajura bahayogoje

Abaturage bo mu kagari ka Kabuga mu murenge wa Rugabano mu karere ka Karongi, batewe impungenge n’ubujura bwibasiye ibyuma bitanga ingufu z’amashanyarazi aturuka ku mirasire y’izuba, ibiribwa biri (...)

Abasore 2 b’abanyekongo bakurikiranweho kwinjiza urumogi mu Rwanda
Abasore 2 b’abanyekongo bakurikiranweho kwinjiza urumogi mu Rwanda

Abasore 2 b’abanyekongo bafungiye kuri sitasiyo ya Polisi ya Muganza mu murenge wa Muganza mu karere ka Rusizi, bakurikiranweho kwinjiza urumogi mu gihugu, bakaba bararufatanywe mu ma saa saba (...)

Rusizi: Abataramenyekana bishe umusaza bamujugunya mu Kivu
Rusizi: Abataramenyekana bishe umusaza bamujugunya mu Kivu

Kanyamahanga Evariste w’imyaka 63, wari utuye mu mudugudu wa Isha,akagari ka Kamashangi, mu murenge wa Giheke, mu karere ka Rusizi yishwe n’abagizi ba nabi n’ubu bagishakishwa bikekwa ko bamukubise (...)

Ngoma: Abarokotse Jenoside bifuza ko urwibutso rwa Zaza rwatwikiirwa
Ngoma: Abarokotse Jenoside bifuza ko urwibutso rwa Zaza rwatwikiirwa

Abacitse ku icumu rya Jenoside bafite ababo bashyinguwe mu rwibutso rwa Jenoside rwa Zaza, mu murenge wa Zaza, akarere ka Ngoma, baravuga ko bababazwa nuko uru rwibutso rudasakaye, bakifuza ko (...)

Rubavu:Abahoze ari abayobozi barokoye abatutsi muri Jenoside bashimiwe
Rubavu:Abahoze ari abayobozi barokoye abatutsi muri Jenoside bashimiwe

Ndabarinze Faustin wahoze ari Burugumesitiri w’icyahoze ari komini ya Mutura na Baributsa Juvenal wahoze ari Resiponsabure wa selile Hehu muri Segiteri ya Mutovu, akaba yari n’umuvugabutumwa, (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.