Advertisement
 
 
 
 
 
 
 
 

Amakuru | Mu Ntara | Intara

Aborozi bagiye guhabwa amoko 20 y’ubwatsi bw’amatungo yunganira urubingo   

  Yanditswe na MANISHIMWE NOËL
 3 months ago

 
 

Ikigo cy’igihugu gishinzwe ubuhinzi n’ubworozi_RAB, kiratangaza ko hari amoko asaga 20 y’ubwatsi bugaburirwa amatungo, ashobora kunganira cyangwa gusimbura urubingo rwibasiwe n’indwara mu bice bitandukanye by’igihugu muri iki gihe.

Ni mu gihe mu Rwanda aborozi bakoreshaga urubingo ku kigero cya 80% nk’ikiribwa cy’ibanze cy’amatungo yabo, ariko hakaba hari hashize imyaka isaga 3 hirya no hino mu turere tw’igihugu humvikana indwara yo gutsigingira yibasiriye urubingo, bituma kubona ubwatsi bw’amatungo muri rusange kiba ingorabahizi, ndetse bamwe mu borozi bagurisha inka zabo bakeshaga imibereho.

Niyireba Remmy Ticien, umushakashatsi ku mirire y’amatungo muri RAB avuga ko nyuma yo gukora ubushakashatsi kuri iyi ndwara aborozi bagaragaza ko yibasiye urubingo rwabo ku buryo rutakuraga ahubwo rukabemba, rwageraho rugacika burundu, yasanze indwara y’urubingo yibasiye ku buryo bukomeye akarere ka Kirehe.

JPEG - 112 kb
Niyireba Remmy Ticien, umushakashatsi ku mirire y’amatungo muri RAB aganira n’abanyamakuru (Foto Manishimwe N)

Gusa ngo yanagaragaye mu tundi turere nka Rwamagana, Gatsibo, Nyagatare, Kayonza, Nyanza, Rusizi, na Rulindo, iki kikaba ari ikibazo kigaragazwa nk’igikomeye, byanatumye hashakishwa igisubizo mu buryo bwose bushoboka.

Uyu mushakashatsi ku mirire y’amatungo mu kigo cy’igihugu RAB, avuga ko mu gushaka umuti w’imbuto nziza y’urubingo rwasimbura urwarwaye, hanakorewe ubushakashatsi ku bindi byatsi bigaburirwa amatungo, bishobora guhingwa bikunganira urubingo rusanzwe, byanaba ngombwa bikarusimbura.

RAB ivuga ko ku ikubitiro yamaze kubona andi moko asaga 20 y’ubwatsi butari urubingo bugaburirwa amatungo, kandi by’akarusho bwo ngo bwihanganira izuba.

Yagize ati “Aborozi bagaburiraga amatungo yabo urubingo nta mpungenge bakwiye kugira, kuko hari andi moko y’ibyatsi ashobora gusimbuzwa urubingo dufite arenga 20 y’ibinyampeke kandi bashobora kubona imbuto, kuko dutuburira mu masitasiyo yose mu gihugu.”

Akomeza arondora amwe muri ayo moko, ati “Harimo Chloris-gayana, Cenchrus-Ciliaris, amako mashya y’amasaka, sugar-grass, nutrifeed, speed feed, sudan-grass, n’andi.Ni amako yitwara nk’urubingo kandi afite intungamubiri nyinshi ziri hejuru y’urubingo, yihanganira izuba, yihanganira indwara; ubu izo mbuto zishobora kuboneka ku mworozi wese uzifuza.”

Ikindi uyu mushakashatsi agaragaza nuko abahinzi ubu bari guhugurwa no kwigishwa ko ibisigazwa by’ibihingwa biboneka hano mu gihugu nk’umuceri, ingano, ibishogoshogo by’ ibishyimbo na soya, byagaragaye ko bifite intungamubiri nyinshi ndetse ziruta iz’urubingo, kuri ibyo hakiyongeraho n’ibiti nka Calliandra (kaliyandara) na Leucaena (Lusena) bivangwa n’ibindi bihingwa.

Nyamara ngo usanga ibisigazwa by’imyaka itandukanye twavuze haruguru bamwe babipfusha ubusa, kandi byakagombye kubyazwa umusaruro w’ibiryo by’amatungo.

Icyo RAB iri gukora cyane ngo ni amahugurwa igenera abahinzi n’aborozi bigishwa uburyo bwo guhinga ubwoko bushya bw’ubwatsi, kububika, kubugabura no kumenya ibimenyetso by’indwara ishobora gufata ubwatsi bw’urubingo basanzwe bakoresha, kugira ngo babashe kuyirwanya.

Aborozi bo mu ntara y’Uburasirazuba nyuma yo kumenyeshwa ko hari ibindi byatsi bishobora kunganira urubingo, babyakiriye nk’igisubizo ku bworozi bwabo, bavuga ko bagiye guhita babuhinga.

Nzabanterura Juvenal wo mu kagari ka Nyabikokora, mu murenge wa Kirehe, avuga ko urubigo ari rwo ahanini bifashishaga mu kugaburira amatungo, kuko nta bundi bwoko bw’ubwatsi bwagenewe amatungo bagiraga.

Yagize ati “Urubingo rwazaga ku mwanya wa mbere, ariko kuba tumaze kumenya andi mako y’ubwatsi yakunganira urubingo, ubu nk’aborozi tugiye guhindura, twe guhinga urubingo gusa duhinge n’andi moko y’ubwatsi yunganira urubingo, ashobora guhangana na bwa burwayi bwari bwaratwibasiye.”

Hafashimana Johnson, utuye i Kabarondo, mu karere ka Kayonza, avuga ko kubera ubwatsi bw’urubingo bwari bwaracitse kubera kurwara bamwe bari barahagaritse korora, ndetse n’ababashije gukomeza ubworozi bakaba bari bahagaritse umutima bibaza ikizatunga amatungo yabo mu minsi iri imbere.

Yagize ati “Twagize ikibazo urubingo rwararwaye ku buryo abantu bagaburiraga inka imitumba y’insina, inka zirasonza, harimo n’izagiye zipfa kubera izuba, abandi barazigurisha. Kuba noneho tugiye kubona ibindi byatsi by’urubingo rushya, n’ibyo byatsi bindi bishobora gusimbura urubingo, bije ari igisubizo ku borozi.”

Uretse aya moko mashya asaga 20 y’ibyatsi bigaburirwa amatungo bishobora gusimbura urubingo, RAB iherutse no gutangaza ko ikomeje ibikorwa byo gutubura no kugeza ku bahinzi imbuto nshya y’urubingo itanga umusaruro mwiza kandi yihanganira izuba, yo gusimbuza urwari rwararwaye.

Ubuyobozi bw’ikigo cy’igihugu gishinzwe ubuhinzi n’ubworozi bwemeza ko mu turere twose twagezemo indwara yibasiye urubingo hari gutangirwa amahugurwa y’uburyo abaturage barwanya iyi ndwara, ndetse n’uburyo babona imbuto nshya y’ubwatsi bw’amatungo, ndetse n’uburyo bwo kuyihinga.

 

Comments

 
 
Rusizi:Umukobwa w’imyaka 23 yasanzwe mu nzu yiyahuye
Rusizi:Umukobwa w’imyaka 23 yasanzwe mu nzu yiyahuye

Uwitonze Esther w’imyaka 23 wari usanzwe abana n’iwabo mu mudugudu wa Gasumo, akagari ka Rwambogo mu murenge wa Butare, mu karere ka Rusizi, bamusanze mu ma saa yine z’igitondo cyo ku cyumweru (...)

Musanze:Abarokotse Jenoside batarasanirwa inzu bijejwe ko zizasanwa vuba
Musanze:Abarokotse Jenoside batarasanirwa inzu bijejwe ko zizasanwa vuba

Ubuyobozi bw’akarere ka Musanze buravuga ko bufite gahunda yo gusana inzu z’abarokotse Jenoside batuye mu murenge wa Cyuve, akagari ka Bukinanyana mu mudugudu wa Bwiza, kuko bagaragaza ko zashaje (...)

Nyamasheke: Imirenge 5 yahawe abanyamabanga Nshingwabikorwa bashya
Nyamasheke: Imirenge 5 yahawe abanyamabanga Nshingwabikorwa bashya

Hari hashize hafi amezi 3 imirenge 5 y’akarere ka Nyamasheke itagira abanyamabanga nshingwabikorwa nyuma y’uko abari muri iyo myanya beguye ku mpamvu bise izabo bwite, ariko bikavugwa ko bijyanye (...)

Kayonza:Biyemeje kurwanya ingengabitekerezo ya Jenoside
Kayonza:Biyemeje kurwanya ingengabitekerezo ya Jenoside

Abayoboke b’ishyaka rya PSD mu karere ka Kayonza, biyemeje kurwanya ingengabitekerezo ya Jenoside aho iva ikagera, kuko ngo bamaze gusobanukirwa ububi bwayo ndetse bakamenya ko gahunda ya Ndi (...)

Karongi: Imibiri 45 y’abazize Jenoside igiye gushyingurwa mu cyubahiro
Karongi: Imibiri 45 y’abazize Jenoside igiye gushyingurwa mu cyubahiro

Ubuyobozi bw’akarere ka Karongi buravuga ko muri iki gihe cyo kwibuka ku nshuro ya 23 Jenoside yakorewe abatutsi, hazashyingurwa mu cyubahiro imibiri 45 y’abazize Jenoside, yabonetse mu mirenge (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.