2017-08-18 19:28:21 clouds 27o High | Kigali Rwanda

Dukurikire:
 
 

Abanyarwandakazi bafite ubumuga bwo mu mutwe badoda imyenda igakundwa mu Butaliyani

Yanditswe na IMVAHO NSHYA

Kuya 2017-01-06 07:20:31

 
Share on:
 
Yasuwe:18
 
Yavuzweho:200
 
10
 
10

Abakobwa bafite ubumuga bwo mu mutwe biga ubudozi muri kigo Urugwiro kiri mu murenge wa Nkanka mu karere ka Rusizi, bageze ku rwego rwo kohereza imyenda badoze mu Butaliyani ikagurwa na benshi.

Aba bakobwa barakebura abagifata abafite ubumuga bwo mu mutwe nk’abadashoboye, ndetse mu miryango imwe n’imwe bakababona nk’abo kubateza ibibazo gusa, bakabasaba guhindura imyumvire.

Bavuga ko bamaze kumenya byinshi bibateza imbere, ndetse mu minsi iri imbere bakazaba banatanga akazi.

Ubwo Imvaho Nshya yabasuraga aho biga kudoda imyenda inyuranye ndetse no kuboha imipira, ibikapu n’ibindi, bayitangarije ko baje kwiga imiryango yabo yaramaze kubafata nk’abatazagira icyo bimarira, ariko bakaba bashimishijwe n’uko bamwe muri iyo miryango bambara imyenda babadodeye.

Uwamahoro Dative w’imyaka 22 wo mu kagari ka Gatsiro, umurenge wa Gihundwe yagize ati “ navukanye ubumuga bwo mu mutwe, aho nshobora kumara umwanya ndi muzima hashira undi nkaba nshobora kwitura hasi, bikamara umwanya nkazanzamuka nyuma. Ababyeyi banjye basaga n’abamaze kumfata nk’utazagira icyo mbamarira na kimwe, ko ahubwo nzahora mbarushya, cyane cyane ko batakekaga ko hari n’umwuga nashobora, kuko n’amashuri abanza nari nayacikirije kubera ubu bumuga.”

Yakomeje agira ati “Nyamara naje kumva ko hano hari ikigo gifasha abafite ubumuga nk’ubwanjye ndaza baramfasha, bakajya bampa imiti banatwigisha kuboha ibikapu n’imipira y’imbeho no kudoda imyenda, none ubu nshimishwa no kubona mama yambara imyenda mudodeye, bigahinyuza abibeshya ko kugira ubumuga bwo mu mutwe ari ukudashobora, kuko n’ibyo dukora tubibyaza amafaranga abasha kutugirira akamaro.”

JPEG - 317.4 kb
Aba bakobwa bafashwa n’Umutaliyani, Lucia Consuelo Cerobelli, uvuga ko azanababa hafi na nyuma y’amasomo

Nyiranshimiyimana Collette wigisha aba bakobwa, avuga ko bashoboye nubwo bisaba kubigisha buhoro buhoro ntibabe barangiriza amasomo igihe kimwe n’abadafite ibi bibazo kuko kubera imiterere y’ubumuga bwabo bakunda kwibagirwa vuba, ariko ibyo bize bakabikora neza kurusha na bamwe badafite ubu bumuga.

Ati “Bashoboye kudoda amashati y’abagabo, imyenda y’abagore, baboha udukapu twiza, imipira y’imbeho n’ibindi, bikoherezwa mu gihugu cy’u Butaliyani kandi bigakundwa, turasaba n’abandi bafite abakobwa bafite ubumuga bwo mu mutwe kutabaheza mu nzu, ahubwo bakabazana kwiga, bakazigirara akamaro bakanakabagirira.”

Umuyobozi w’iyi santere Urugwiro, Lucia Consuello Ceribelli, avuga ko aba bakobwa bahinduye imyumviye y’abaturiye iyi santere kuko ibyo bakora bituma n’abaturage bahindura imitekerereze.

Iyi ni nayo mpamvu abafasha kubonera isoko ibyo badoze kandi agakomeza kubafasha n’igihe barangije kwiga, kuko azi neza ko hari abaturage bagifite imyumvire yo kuba batabaha akazi bumva ko batabakorera neza.

Ikigo Urugwiro cyatangiye gukora mu 2004, ku bufatanye na diyosezi Gatolika ya Cyangungu, gifasha abana bafite ubumuga bwo mu mutwe, bakigishwa gusoma, bagahabwa, ubuvuzi bushingiye ku muziki, kandi bakigishwa imyuga yabateza imbere irimo ubworozi, ububaji, ubuhinzi, kudoda n’ibindi.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE