2017-08-18 19:28:21 clouds 27o High | Kigali Rwanda

Dukurikire:
 
 

Minisitiri w’Intebe w’u Buhinde yabonanye na Perezida Kagame

Yanditswe na IMVAHO NSHYA

Kuya 2017-01-10 05:53:21

 
Share on:
 
Yasuwe:4
 
Yavuzweho:200
 
10
 
10

Umukuru w’Igihugu cy’u Rwanda, Paul Kagame yahuye na Minisitiri w’Intebe w’u Buhinde, Narendra Modi kuri uyu wa 10 Mutarama 2017.

Perezida Kagame ari mu Buhinde mu nama yiga ku bukungu yiswe Vibrant Gujarat Global Summit ibera mu Mujyi wa Gandhinagar mu Ntara ya Gujarat kuva kuri uyu wa 10 kugeza ku ya 13 Mutarama 2017.

Minisitiri Modi na Perezida Kagame bari kumwe n’amatsinda y’ababaherekeje, baganiriye ku ngingo zitandukanye zirebana n’umubano w’ibihugu byombi.

Bemeranyije kwihutisha umushinga wo kuhira imyaka u Buhinde bwahayemo u Rwanda inguzanyo ya miliyoni 120 z’amadorali, ugamije kugeza amazi mu mirima ya hegitari 41 190.

Perezida Kagame yashimye kuba u Buhinde bwarafashije u Rwanda kongera umuriro w’amashanyarazi binyuze mu nguzanyo ya miliyoni 80, yatanzwe ngo hubakwe urugomero rwa Nyabarongo rutanga MW 28 z’amashanyarazi.

U Buhinde bwagaragaje ko bwiteguye gutera inkunga iyubakwa ry’urugomero rwa Nyabarongo II, amashuri y’imyuga n’ubumenyingiro no kubaka umuhanda wa Huye-Kibeho.

Minisitiri Modi yemereye u Rwanda impano ya miliyoni ebyiri z’amadorali yo kugura imiti n’indi imwe yo kuvana ibikoresho byo kwa muganga mu Buhinde.

Aba bayobozi babiri, bumvikanye ko iterabwoba ari ikibazo gikomereye ikiremwamuntu, biyemeza kurirwanya bivuye inyuma.

U Rwanda rwashimiye ko ingabo zarwo zifata amasomo mu bigo byo mu Buhinde, binyuze mu masezerano y’ubufatanye; n’u Buhinde bwishimira ko kompanyi ya RwandAir igiye gutangira ingendo mu mujyi wa Mumbai.

Minisitiri w’Intebe w’u Buhinde kandi yatangaje ko ashobora kuzagirira uruzinduko rw’akazi mu Rwanda ku matariki azamenyekana nyuma.

Biteganyijwe ko Perezida Kagame atanga ikiganiro ku bukungu ahereye ku ngero zitandukanye z’ibyo u Rwanda wagezeho mu myaka isaga 20 ishize, akaza no gufungura imurikagurishwa mpuzamahanga ry’agace ka Gujarat, ari kumwe na Minisitiri Narendra Modi.

Iyi nama kandi yitabiriwe na Perezida wa Kenya, Uhuru Kenyatta, Minisitiri w’Intebe wa Portugal, Antonio Costa n’abandi bayobozi bahagarariye ibihugu birimo u Buholandi, u Bushinwa, u Buyapani, Pologne, u Bwongereza, na u Bufaransa, Suwede, Denmark, Canada, Lithuania, UAE, Singapore, Leta Zunze Ubumwe za Amerika.

Vibrant Gujarat Global Summit 2017 iba rimwe mu myaka ibiri, igamije gusangira ubunararibonye, no guteza imbere ubuhahirane hagati y’u Buhinde n’ibindi bihugu.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE