2017-06-27 12:16:32 clouds 27o High | Kigali Rwanda

Dukurikire:
 
 

MUSANZE:Umukobwa witeje imbere arasaba bagenzi be kwitinyuka

Yanditswe na Admin

Kuya 2015-11-10 07:32:15

 
Share on:
 
Yasuwe:44
 
Yavuzweho:200
 
10
 
10


Umuhire Catherine, utuye mu murenge wa Muhoza mu karere ka Musanze, asaba urubyiruko gukorana umwete umurimo wose berekejeho amaboko, kandi bakirinda kwitinya kuko bifitemo ubushobozi burenze ubwo batekereza.

Uyu mukobwa yemeza ko kwitinyuka ari byo byamushoboje kwihangira umurimo umutunze, ndetse unatunze abandi yahaye akazi.

Uku kwitinyuka kandi biherutse kumuhesha igihembo cy’amafaranga ibihumbi 700, nka rwiyemezamirimo uri munsi y’imyaka 24 wahize abandi mu kwihangira umurimo ubyara inyungu.

Mu kiganiro yagiranye n’Imvaho Nshya, Umuhire yagize ati: “Njye nize amashuri atatu yisumbuye,ntabwo nabashije gukomeza.Narashomeraga k’uburyo nasabaga amavuta yo kwisiga ndetse n’umwambaro, nsanga rero bitazanganisha ahantu heza, cyane ko n’abahungu bari batangiye kunyegera banshukisha nyine ibyo ntabashije kubona.

Ibi nabibonyemo agasuzuguro gakomeye nk’umuntu ukiri muto, nahisemo rero gukurikira basaza banjye bakora mu igaraje kuko nkunda umwuga w’ubukanishi”.

Akomeza avuga ko nyuma yo kuba mu igaraji akabona uburyo ibyuma by’imodoka bita bandeferi bitaboneka i Musanze, yahisemo kujya abikora yifashishije ibindi byuma bishaje,nyuma y’uko agiye kwigira uriya mwuga mu gihugu cya Uganda.

Yagize ati:“Kutitinyuka bya bamwe mu bakobwa bituma bafatwa nk’ibikoresho, niyemeje kujya muri Uganda kwiga gucura amabandeferi, nkoresheje udufaranga duke nagiye nkorera mu magaraji atandukanye. Namaze amezi 6 mu gihugu cy’abandi kandi nabigezeho, ntacyo umuhungu ashoboye umukobwa atakora”.

Umwe mu bakora umwuga wo gutwara abantu kuri ‘Taxi voiture’ yagize ati:“Izi bandeferi zikorwa n’Umuhire zirakomeye kandi zirahendutse, aho iva mu nganda igura 2500, iyi tuyigura ku 1500, rwose turazikoresha ibi rero byaradufashije.”

Kuri ubu Umuhire afite abakozi batatu.Yemeza ko nyuma yo gutanga ipatanti no guhemba abakozi ku kwezi yinjiza amafaranga ibihumbi 60, ndetse ngo igihembo yahawe agiye kukifashisha yagure umushinga we.

NGABOYABAHIZI PROTAIS

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE