22°C , Partly cloudy | Kigali-Rwanda
Umuyobozi w'Urugaga Nyarwanda rw'Amakoperative Katabarwa Augustin

Amakoperative ntagihanganye n’ikibazo cy’umusaruro muke, arangamiye amasoko

Yanditswe na Sezibera Anselme

Ku ya 11-01-2019 saa 15:02:58

Ubuyobozi bw’Urugaga Nyarwanda rw’Amakoperative (NCCR) buravuga ko ikibazo cy’umusaruro muke cyakemutse, ubu bakaba ashishikajwe no gushaka amasoko ahagije.

Umuyobozi w’Urugaga Nyarwanda rw’Amakoperative (NCCR) Katabarwa Augustin avuga ko hari intambwe yatewe kubera ubufatanye bw’Inzego z’ibanze, iz’umutekano, NCCR, RCA ku buryo uruhare rwabo rwagize impinduka mu gukemura ibibazo byariho umusaruro ukiyongera.

Mu kiganiro kihariye n’Imvaho Nshya yagize ati: “Hari urwego n’intambwe tumaze gutera nk’Urugaga Nyarwanda rw’Amakoperative (NCCR) kubera ubufatanye bwacu n’inzego. Ahavuka ibibazo uburyo bwo kubikemura inzego zirafatanya, bityo n’ujya gukora amakosa, akavuga ngo amaso andeba ni menshi, kandi bigaragara ko n’abayakoraga bahagurukiwe bigahagarara.”

Katabarwa atangaza ko kugeza ubu hari ishusho nziza igaragara muri urwo rugaga NCCR kuko abanyamuryango barwo bahinduye imyumvire kandi bakagaragaza ibitagenda neza bigakosorwa inzego zifatanyije.

Nk’uko yabigarutseho, avuga ko ibyo byatumye umusaruro ukomoka ku makoperative muri rusange uzamuka ibijyanye n’umusaruro mukeya bigasigara ari amateka kabone n’ubwo bagiye bahura n’indwara zitandukanye nka kabore na kirabiranya.

Katabarwa agaragaza ko mu byerekeranye n’amakoperative akora ubuhinzi n’ubworozi umusaruro wagiye uboneka mu bihingwa nk’ibirayi, umuceri, imyumbati n’ibindi.

Agira ati: “Ku bijyanye n’ibirayi umusaruro mwinshi uragaragara kubera imyumvire y’abahinzi no kubahiriza inama bagirwa n’inzego, kabone nubwo byabanje kuzamo ibibazo, gusa dusigaje kongera imbaraga mu gushaka imbuto zihagije kandi zujuje ubuziranenge.

Mu makoperative ahinga umuceri naho ni uko warazamutse bigera naho abanyamuryango ba koperative COPRORIZ Ntende ihinga umuceri mu karere ka Gatsibo ishora imari yiyubakira hoteli y’inyenyeri 2 muri ako karere. Gusa ku mpande zombi ubu duhanganye no gushaka amasoko menshi y’uwo musaruro.”

Katabarwa akomoza ku bworozi avuga ko kubera ingufu bashyize mu guteza amatungo intanga ndetse no gushinga amakusanyirizo byagiye byongera umusaruro ukomoka ku mata.

Akomeza avuga ko mu makoperative akora ibigendanye n’ingendo naho byanogejwe hagendewe ku ikoranabuhanga haba mu kwishyura no kwishyuzwa, kugabanya imivuduko y’ibinyabiziga, interineti kandi hakanozwa n’ibikorwa remezo birimo no kubaka aho abagenzi bategera (gare).

Katabarwa ahamagarira amakoperative muri rusange akiyubaka gukora ingendoshuri agafatira urugero rwiza ku yashoboye kwiyubaka birushijeho.

Avuga ko mu bushakashatsi bwakozwe ku makoperative y’ubuhinzi muri Afurika mu bihugu birimo Senegali, Madagascar, Malawi, Ethiopie, n’u Rwanda aho buri gihugu batoranyagamo koperative 100 z’ubuhinzi mu rwego rwo kureba uburyo yiyubaka, u Rwanda rwaje ku mwanya wa mbere.

Katabarwa avuga ko kubera urwego amakoperative agezeho, u Rwanda rwatoranyijwe kuzakira inama y’amakoperative ku rwego rw’Isi iteganyijwe mu kwezi k’ukwakira 2019.

Ndayambaje Eraste umunyamuryango wa koperative Twiteze Imbere ikorera mu Karere ka Muhanga, avuga ko inama bahabwa n’inzego, politiki y’igihugu mu gushishikariza abaturage kwibumbira mu makoperative ndetse n’uruhare zibigiramo ari byo biza ku isonga mu gutuma abantu babikunda kandi umusaruro wiyongera. Ikindi kuba inzego z’amakoperative zubatse neza kuva hasi kugera hejuru, umuyoboro w’ibitekerezo uri hagati y’ubuyobozi n’abanyamuryango ukuraho imbogamizi zabagaho.

Kugeza ubu mu Rwanda amakoperative akora ibijyanye n’ubuhinzi n’ubworozi angana na 70%.

Umuyobozi w’Urugaga Nyarwanda rw’Amakoperative Katabarwa Augustin

TANGA IGITEKEREZO

Leave a Reply

Your email address will not be published. Required fields are marked *