18°C , Mostly cloudy | Kigali-Rwanda
Ababyeyi bitabira igikorwa cyo gupima abana babo indwara zitandura (foto Ngaboyabahizi P)

Amajyaruguru: Hafashwe ingamba zo gupima abanyeshuri indwara zitandura  

Yanditswe na Nshim Janvier

Ku ya 08-10-2018 saa 17:17:28

Bamwe mu bayobozi b’ibigo by’amashuri mu Ntara y’Amajyaruguru bavuga ko hafashwe  ingamba zo kujya bapimisha abanyeshuri babo indwara zitandura zirimo umuvuduko w’amaraso.

Umuyobozi wa Wisdom Schools, Nduwayesu Elie,  avuga ko iki gikorwa kiba gikenewe kuko gituma umwana ugaragaje uburwayi yitabwaho neza kandi agakurikirana n’amasomo ye neza.

Yagize ati: “Gahunda yo kumenya uko buri mwana ahagaze mu buzima ni ikintu k’ingirakamaro kuko burya bituma ubasha kumenya uburyo witwara imbere y’ikibazo cy’umwana uyu n’uyu, ubu rero abayobozi b’ibigo by’amashuri yo mu Ntara y’Amajyaruguru twiyemeje ko tugomba kumenya uburyo abanyeshuri bacu bahagaze ku bijyanye n’indwara zitandura.”

Avuga ko kumenya amakuru ya buri mwana mu ishuri ajyanye n’ubuzima bwe bituma agenda yigengesera nko ku mwana ufite ibibazo by’umutima n’abandi baba bafite utubazo tw’uburwayi.
Ati: “Nka twe hano intego yacu ni ugutanga uburezi n’uburere bufite ireme, ibyo ntibyagerwaho abo turera badafite ubuzima buzira umuze kuko ari bwo shingiro rya byose.”

Bamwe mu babyeyi barerera muri iki kigo aho Imvaho Nshya yasanze iki gikorwa kibera bishimira iyi gahunda, kuko izatuma bamenya uburyo bafatamo abana babo.

Humure Alphonse ni umwe muri abo babyeyi avuga ko gahunda yo gupima abana bayishimira cyane.
Ati: “Iyi gahunda yo gupima indwara abana bacu turayishimira cyane kuko nk’iyo umwana avuye mu biruhuko aba yarahuye n’abantu bo hanze benshi bashobora no kumwanduza zimwe mu ndwara z’ubuhumekero nawe akaba yazanduza abo aje asanga hano ku ishuri, ikindi kandi biduha ikizere kuko iyo uzanye umwana ari muzima bakamugusubiza nawe adafite uburwayi ni byiza.”

Yakomeje agira ati: “Dushima Leta yatekereje ko iyi gahunda igera ku banyarwanda bose, twari tumenyereye ko iyi gahunda ireba gusa abakuze none ubwo yageze no mu bantu bato tugiye kugira u Rwanda rufite abato bazira umuze.”

Ababyeyi bitabira igikorwa cyo gupima abana babo indwara zitandura (foto Ngaboyabahizi P)

Kabera Anastase ni umuforomo wemeza ko gupima aba bana bibafasha kumenya neza uko ubuzima bwabo buhagaze bityo bikabafasha kubakurikirana neza bitabangamiye amasomo kandi n’ugaragaje uburwayi akitabwaho.

Yagize ati: “Ibyo dupima aba bana ni ukureba neza umuvuduko w’amaraso hakiyongeraho kureba uburyo ahumeka, iyo dusanze hari ufite ikibazo tuganira n’ababyeyi be uburyo umwana agomba gufashwa tukamwitaho neza kandi bitabangamiye n’amasomo ye, kuko burya ikibi ni ukubaho utazi uko uhagaze mu buzima, ikindi ababyeyi bagomba kumenya ni uko izi ndwara zitandura zireba abakuze gusa kuko no mu bana zijya zigaragaza.”

Indwara zitandura ni zimwe mu zikunze guhitana benshi kubera ko zizahaza umuntu zimumazemo igihe kirekire atabizi, buri wese rero ngo akaba asabwa kuzisuzumisha.

TANGA IGITEKEREZO

Leave a Reply

Your email address will not be published. Required fields are marked *