18°C , Showers | Kigali-Rwanda
Abashumba basabwa kutaragira ku gasozi no kwangiza imyaka y'abandi (foto Ngaboyabahizi Protais).

Amajyaruguru: Aborozi basabwe kororera mu biraro mu gukumira urugomo

Yanditswe na Ngaboyabahizi Protais

Ku ya 19-04-2019 saa 12:29:55

Abaturage bo mu turere tw’Amajyaruguru bakomeje kugaragara urugomo rukorwa na bamwe mu bashumba, aho boneshereza abahinzi ndetse banavuga bagakubitwa.

Guverineri w’Intara y’Amajyaruguru, Gatabazi Jean Marie Vianney, arasaba aborozi kororera mu biraro, agashimangira ko nta mushumba uzihanganirwa mu gihe yangije imyaka y’umuhinzi.

Yagize ati : « Ikibazo cy’abashumba boneshereza abahinzi bavuga bakabakubita turakizi, inka iyo ari yo yose na nyirayo ntikwiye kujya kwangiza no kona imyaka y’umuhinzi. Numvise rero ngo inka zimwe aba ari iza bamwe biyita ko bakomeye, nta muntu ukomeye ku buryo yahohotera umunyarwanda, ahubwo ntituzihanganira uwo ari wese ukiragira ku gasozi, buri mworozi nashyire amatungo ye mu kiraro ndetse nibiba ngombwa afite urwuri arimo arajya aragira n’aho ubundi uzafatwa azabihanirwa kandi itegeko rirahari ».

Mushimiyimana Jean Baptiste ni umuhinzi w’ibirayi mu Murenge wa Cyuve, Akarere ka Musanze, avuga ko abashumba babarembeje kuko baboneshereza imyaka bakanakubitwa.

Yagize ati : « Rwose kuri ubu abashumba bitwikira ijoro bakaragira imyaka yacu, twavuga bakadukubita, twakwiyambaza Dasso na zo bakarwana na zo, aba bashumba njyewe nkeka ahari ko baba banyoye ibiyobyabwenge. »

« Ikitubabaza rero ni uko babikora bavuga ngo inka ni iza bamwe mu bacuruzi n’abayobozi bakomeye, twifuza ko aba borozi bakurikiranwa tukajya turihwa ibyangijwe kuko usanga hari ubwo usanga nta n’ujya mu murima we hataracya, icyo gihe rero kubera gutinya abashumba n’abajura bashobora kujya barara mu mirima yacu tugasanga bahogeje ».

Mukashema Ancile wo mu Murenge wa Cyanika akagari ka Kamanyana we avuga ko bamwoneshereje ibigori umurima wose akabura n’abamwoneshereje.

Yagize ati : « Bwareakeye numva barampamagaye ngo umurima wanjye w’ibigori inka zawurayemo, ntabwo nigeze ndbukwa n’imwe, ubwo narihanaguye. Gusa birababaje kubona umuntu ahinga imyaka ye cyane ko no kuri ubu hasigaye hari gahunda y’uko umuntu ahingira ku nguzanyo mu gihe rero inka zibyonnye ntubone n’ukuriha, ni bwo usanga nyine Sacco ije kugurisha utwawe, rwose Leta nikaze ibihano by’abakiragira ku gasozi n’abitwikira ijoro »

Guverineri w’Intara y’Amajyaruguru asaba inzego zose z’ibanze gukurikirana abakiragira ku gasozi, kugira ngo bigishwe, kuko gahunda ya Leta ari ukororera mu biraro.

Abashumba basabwa kutaragira ku gasozi no kwangiza imyaka y’abandi (foto Ngaboyabahizi Protais).

TANGA IGITEKEREZO

Leave a Reply

Your email address will not be published. Required fields are marked *