20°C , Mostly cloudy | Kigali-Rwanda
Ishimwe Dieudonné utegura irushanwa rya Miss Rwanda

Amajonjora y’abakobwa muri Miss Rwanda 2018 aregereje

Yanditswe na NDAMYIROKOYE FRANÇOIS

Ku ya 10-01-2018 saa 12:55:42

Mu rwego rwo gushaka uzambikwa ikamba rya  nyampinga w’u Rwanda 2018 muri uku kwezi kwa Mutarama 2018 amajonjora y’abakobwa bazitabira iri rushanwa aratangira.

Ishimwe Dieudonné utegura irushanwa rya Miss Rwanda

Mu ntara y’Amajyaruguru  mu mujyi wa Musanze  iki gikorwa kizaba ku ya 13 Mutarama 2018, mu Burengerazuba kizabe ku ya 14 Mutarama 2018 kibere mu mujyi wa Rubavu naho ku ya 20 Mutarama 2018 amajonjora azabere mu  Ntara y’Amajyepfo.

Nyuma y’uko igikorwa kizaba cyabereye muri izo ntara zose, ku ya 21 Mutarama 2018 amajonjora azabera mu Ntara y’Uburasirazuba mu mujyi wa Kayonza naho mu Mujyi wa Kigali azabe ku ya 27 Mutarama 2018.

Ishimwe Dieudonné uzwi nka Prince Kid utegura akanashyira mu bikorwa irushanwa rya Misss Rwanda yatangarije Imvaho Nshya ko kugeze ubu imyiteguro yo gutangira amajoronjora imeze neza.

Yagize ati “Imyiteguro tuyigeze kure kandi imeze neza nta kibazo”.

Uyu mwaka mu  ntara zose  no Mujyi wa Kigali hazatoranywamo abakobwa  30 nyuma bazatoranywemo abakobwa 20 bazajyanwa  mu mwiherero.

Ku ya 10 Gashyantare 2018 ni bwo hazatoranywa abazajya mu mwiherero.

Ibisonga by’uzaba nyampinga kandi bizaba bibiri aho kuba bine nk’uko byari bisanzwe.

Ku ya  24 Gashyantare 2018 ni  bwo hazatoranywa nyampinga w’u Rwanda 2018 mu gikorwa kizabera mu mujyi wa Kigali.

Uhatanira ikamba rya Nyampinga w’u Rwanda agomba  kuba ari Umunyarwandakazi, afite hagati y’imyaka 18-24, yararangije amashuri yisumbuye, avuga neza Ikinyarwanda n’urundi rurimi, hagati y’Icyongereza, Igifaransa n’Igiswahili, afite indeshyo ya metero imwe na sentimetero  70 kuzamura, apima ibilo hagati ya 45-70, atari yabyara, yiteguye kumara nibura umwaka atuye mu Rwanda igihe yatsinze, atiteguye gukora ubukwe mu gihe cy’umwaka yambaye ikamba no kuba yiteguye guhagararira u Rwanda mu gihe bikenewe.

Uzambikwa ikamba azaba asimbuye Miss Iradukunda Elsa ufite ikamba rya Miss Rwanda 2017.

 

TANGA IGITEKEREZO

Leave a Reply

Be the First to Comment!

avatar