25°C , Partly sunny | Kigali-Rwanda
Uwizeyimana Bonaventure wihaye intego yo kwegukana intera byibura 2 muri Tour du Rwanda 2018

Amagare: Uwizeyimana ashaka kwigaragaza muri Tour du Rwanda 2018

Yanditswe na BIZIMANA ERIC

Ku ya 11-06-2018 saa 08:13:29

Uwizeyimana Bonaventure ukinira ikipe ya Benediction n’ikipe y’igihugu mu mukino wo gusiganwa ku magare aravuga ko agomba kwigaragaza mu marushanwa yose azitabira muri uyu mwaka wa 2018 harimo na Tour du Rwanda 2018.

Uwizeyimana Bonaventure wihaye intego yo kwegukana intera byibura 2 muri Tour du Rwanda 2018

Ibi yabitangaje nyuma yo kwegukana isiganwa ryabereye Cameroun ndetse n’ uduce tubiri twa  Rwanda Cycling Cup 2018, intera ya Kayonza-Muhanga na Kigali-Nyanza.

Uwizeyimana wigeze gukinira Dimension Data yo muri Afurika yatangiye uyu mwaka atangaza ko ntawe uzongera kumusiga haba ahatambika n’ahazamuka atakunze kwitwara neza.

Tariki 09 Kamena 2018 nyuma yo kwegukana isiganwa ryo kwibuka ryasorejwe i Nyanza, Uwizeyimana yavuze ko intego ye ari ukwigaragaza mu marushanwa yose azitabira ariko by’umwihariko akazigaragaza cyane muri Tour du Rwanda izaba muri Kanama uyu mwaka.

Ati «Nk’uko mfite intego muri uyu mwaka, ndashaka ngo Bona wa kera atandukane na Bona wa 2018.Tour du Rwanda ni  umukino wo mu rugo, ngomba gushyiraho ingufu kuruta indi yose. Nzakurikiza inama z’abatoza. Umwaka washize negukanye agace kamwe uyu mwaka mfite intego yo kwegukana tubiri».

Perezida w’ishyirahamwe ry’umukino wo gusiganwa ku magare mu Rwanda «FERWACY», Bayingana Aimable nawe yemeza ko urwego rw’abakinnyi bakina imbere mu gihugu rurimo kuzamuka.

Ati  «Murabona ko urwego rw’Abanyarwanda basigaye mu gihugu rutari kure y’urwabariya bagiye hanze. Nka FERWACY amarushanwa tugerageza kuyongera uko dushoboye. Uyu munsi Bona yakinnye mu cyumweru gishize yari  i Yaounde mu byumweru bibiri tuzaba dufite shampiyona. Icyo gitutu ni cyo dushaka kuko imikino myinshi ariyo ituma abakinnyi bacu barushaho gukomera kandi na bariya bagiye bafite amarushanwa menshi ariko n’abacu tugomba kubazamura”.

Biteganyijwe tariki 23-24 Kamena 2018 hazaba shampiyona y’igihugu izanagaragaramo abakinnyi bakina hanze y’u Rwanda.

 

TANGA IGITEKEREZO

Leave a Reply

Be the First to Comment!

avatar