17°C , Mostly cloudy | Kigali-Rwanda
Uwizeye Jean Claude ubwo yakinaga muri Tour du Rwanda 2018 ari kumwe n'ikipe ya POCCL agasoza ku mwanya wa 2 muri rusange

Amagare:  Uwizeye afite intego yo kuzageza mu 2025 agikinira i Burayi

Yanditswe na BUGINGO FIDELE

Ku ya 27-01-2019 saa 11:08:34

Uwizeye Jean Claude  yongereye amasezerano mu ikipe ya  Pays des Olonnes Cycliste Côte de Lumière (POCCL) mu Bufaransa nyuma yo kuyikinira umwaka ushize wa 2018 avuye mu  ikipe ya Les Amis Sportifs  y’i Rwamagana.

Uwizeye  mu kiganiro kirambuye yagiranye n’Imvaho Nshya  yavuze ko afite intego yo kuzageza muri 2025 agikina nk’uwabigize umwuga ku mugane w’u Burayi. Yanagarutse kandi ku buzima bwe  muri rusange n’uko yatangiye gukina umukino wo gusiganwa ku magare.

Uwizeye ni muntu ki?

Yavukiye mu Karere ka Rwamagana, Umurenge wa Muhazi muri Kanama 1994. Ni umuhererezi mu  bana 6 ba Gashirabake Augustin na Mukaruhashya Beatrice. Yize amashuri abanza kuri  EP  St Leon Nyarusange anahakomereza amashuri yisumbuye. Nyuma yakomereje muri GS Protestant mu mujyi wa  Rwamagana  aho yahagaritse ageze mu mwaka wa 5.

Yinjiye mu mukino w’amagare kubera Ndayisenga

Uwizeye avuga ko  yakuranye na Ndayisenga Valens  kandi bari inshuti cyane kuko bari mu kigero kimwe ariko aza kumutanga kwinjira mu mikino w’amagare. Ati: “Mbonye ko abishoboye nange nagize umuhate wo kubijyamo ariko mu rugo babanza kungora ngo nige”.

Uwizeye yemeza ko yari azi igare kuko mu rugo bari barifite rya mukuru we bityo  yarigendagaho. Ati: “Ibyo gukina umukino wo gusiganwa ku magare ntabwo nabyiyumvagamo cyane ariko nari niyiziho ko nzi igare kuko twaranaritunze na ba Valens bose nararibarushaga.”

 Muri 2013 ni bwo Uwizeye yatangiye kunyoga igare ariko akoresha irisanzwe rya pinebalo maze uwari umutoza w’ikipe ya Les Amis Sportifs, Nyakwigendera Rugambwa John abona ko afite impano amuha igare ariko ryo mu misozi.

Iri gare  yarikinishije isiganwa rye rya mbere atazanibagirwa muri Gashyantare 2013  aho abasiganwaga bavaga Kigali bagasoreza i  Nyakarambi muri Kirehe.  Ati: “ Bansize tugihaguruka birangora ngenda ngenyine nagera kuri robine nkavoma amazi yo kunywa  nagezeyo barangije no gutanga ibihembo barimo kwanura ibikoresho, urumva ko icyo gihe nabaye uwa nyuma  ntabwo nzabyibagirwa.”

Uwizeye Jean Claude (mu kaziga) ubwo yitabiraga irushanwa rye rya mbere akaba uwa nyuma

Akomeza avuga ko atacitse intege kuko yari azi icyo ashaka  aho yifuzaga kugendera mu murongo wa Ndayisenga Valens bari inshuti anifuza ko bahuza umwuga. Nyuma  yahawe igare ryiza maze muri  Kamena 2013 mu irushanwa ryo Kwibuka ryakiniwe  ku Kicukiro-Nemba-Kicukiro  aba uwa kabiri inyuma ya Uwizeyimana Bonaventure na ho ku mwanya wa 3 haza Byukusenge Nathan.

Ubwo Uwizeye yegukanaga umwanya wa kabiri mu irushanwa ryo kwibuka muri 2013 ari naryo ryari irya kabiri akinnye

Ati: “Umutoza w’ikipe y’igihugu Jonathan Boyer  yabonye ko  nzavamo umukinnyi ukomeye  bantumira i Musanze njya mu igeragezwa ndaritsinda”.  Muri uyu mwaka Uwizeye avuga ko   Ndayisenga  yegukanye intera muri Tour du Rwanda 2013  bituma yiyemeza na we kuzakina muri Tour du Rwanda byanze bikunze.

Yahamagawe bwa mbere mu ikipe y’igihugu muri 2014

Umwaka wa 2014, Uwiyeze avuga ko yawugiriyemo umugisha cyane kuko yahamagawe bwa mbere mu ikipe y’igihugu yagombaga kwitegura Tour du Rwanda ashyirwa mu ikipe ya 3 ariko biba  byiza cyane kuri we kuko Ndayisenga yayegukanye we agasoreza ku mwanya wa 19.

Ati: “Ntabwo byari byoroshye, batubwiraga ko hari abari hafi  guhagarika  gusa nakoresheje imbagara nyinshi. Nakinnye mu ikipe ya 3 aho  iyo ari intera y’ibirometero  nka 150 muri 50 bya mbere  hakuraga  ikipe ya  gatatu mu bindi hagakura iya kabiri mu bya nyuma hakaza ikipe ya mbere yabaga irimo na  Valens  wari ku mwanya wa mbere, gusa hose nabaga ndimo”.

Uwizeye avuga ko  kuba Ndayisenga yaregukanye Tour du Rwanda 2014  byamushimishije cyane. Ati: “Ni we  watumye mpura  na Perezida wa Repubulika kuko nyumo yo gutsinda Perezida yaratwakiriye”.

Nyuma y’aho Ndayisenga Valens yegukaniye Tour du Rwanda 2014, Perezida wa Repubulika yakiriye ikipe y’u Rwanda abashimira uko bitwaye

Nyuma ya  2014, Uwiyeze yakomeje guhamagarwa mu ikipe y’igihugu yitabira amarushanwa menshi  mu bihugu bitandukanye nka Cameroun, Gabon, Eritrea n’ahandi hatandukanye. Muri 2015  yari ku mwe n’ikipe yakoze amateka mu mikino y’Afurika “All African Games 2015” muri Congo Brazzaville aho Hadi yegukanye umudari wa zahabu.

Muri 2016 yegukanye umudari wa Feza mu kiciro cy’abatarengeje imyaka 23 muri shampiyona y’Afurika yabereye muri Maroc.

Uwizeye Jean Claude wegukanye umudari wa Feza mu batarengeje imyaka 23 muri shampiyona y’Afurika yabereye muri Maroc mu 2016

Uko yagiye gukinira hanze nk’uwabigize umwuga

Muri 2018 ni bwo we na Ndayisenga Valens berekeje mu ikipe ya Pays des Olonnes Cycliste Côte de Lumière (POCCL) mu Bufaransa. Akinira iyi kipe  yitwaye neza kuko yasoje ku mwanya wa kabiri muri rusange muri Tour du Rwanda 2018 bituma yongererwa amasezerano   azarangirana n’uyu mwaka wa 2019.

Mu ikipe ya POCCL, Uwizeye yitwaye neza abasha kwegukana amarushanwa atandukanye

Uwizeye ati : « Perezida wa FERWACY ni we watumye ngira umuhate kuko yarambwiye ati ugiye gusaza utabaye  umukinnyi wabigize umwuga kandi uri umukinnyi ukomeye. Byatumye  nitekerezaho cyane, ndakina   ariko hari ababirebaga ».

Akomeza avuga ko yabonye ubutubwa   bwa Steven Laget, umutoza w’iriya kipe   amusaba ko yasinya amasezerano muri POCCL . Ati : « Ntabwo nari muzi ariko nari mfite amakuru ko yigeze kuba mu kigo k’imyitozo i Musanze yigisha abakanishi ari na ho  yakuraga amakuru yange, imikinire yange  n’ibindi ».

Uwizeye avuga ko yabyakiriye neza kuko ari ibintu yari yarifuje igihe kirekire. Ati : « Nahise numva ari umwanya mwiza wo kubyaza umusaruro amahirwe mbonye. Nagezeyo ndakora cyane nitwara neza kuko hari n’amarushanwa nagiye negukana ahandi nkaba uwa kabiri cyangwa uwahatanye cyane ».

Uwizeye Jean Claude ashyikirizwa igihembo

Uwizeye avuga ko muri POCCL bamushimye ko ari umukinnyi witanga kuko mu isiganwa  agomba gusoza byibuze hari icyo yerekanye n’ubwo yaba atatsinze. Avuga ko itandukaniro riri hagati yo gukina mu Rwanda no hanze ari rinini kuko  kuri we abona ubunararibonye bwariyogereye ugereranyije n’ukina amasiganwa y’imbere mu gihugu.

Gukinira i Burayi avuga ko hari icyo byamwongereye mu mikinire

Yakomeje avuga ko hariya isiganwa riba ririmo abakinnyi barenga 120 ko  bidahuye no gusiganwa mu bakinnyi 60 kandi hanze isiganwa riba ririmo abakinnyi bakomeye bigatuma n’umukinnyi na we akora cyane kubera abo bahanganye. Ati : «Abakinnyi bakomeye  bagufasha  kuzamura urwego  kuko umuvuduko bafata nawe ugomba kuwugenderaho  urumva  si kimwe n’uwo umukinnyi wo   mu Rwanda yafata, ikindi kandi hariya haba  amarushanwa menshi ».

Uwizeye Jean Claude ubwo yakinaga muri Tour du Rwanda 2018 ari kumwe n’ikipe ya POCCL agasoza ku mwanya wa 2 muri rusange

Intego Uwizeye afite

Muri 2019, Uwiyeze avuga ko ari ugokomeza gukora cyane kugira ngo azabone undi mwaka muri iyi kipe kuko yifuza kuzageza byibura mu 2025 agikina nk’uwabigize umwuga ku mugabane w’u Burayi.

Uwizeye yajyanye n’ikipe y’igihugu muri « La Tropicale Amissa Bongo 2019 » nyuma azitabira shampiyona y’Afurika muri Ethiopia  na Tour du Rwanda 2019 abone kujya mu Bufaransa.

Inama atanga

Uwizeye avuga ko umukino wo gusiganwa ku magare mu Rwanda wateye intambwe nziza ariko ko hakiri byinshi byo gukora n’ubwo batakwigereranya n’Abanyaburayi kuko bo bafite ubushobozi bwisumbuyeho.

Avuga ko mu Rwanda habonetse  ubushobozi amarushanwa akwiye kwiyongera ndetse n’amakipe agafashwa mu buryo bw’ibikoresho n’amikoro kuko abakinnyi ari ho  bagomba kuzamukira.

Ikipe ya POCCL yari irimo Uwizeye na Ndayisenga ubwo yitabiraga Tour du Rwanda 2018

Iyi kipe yagiye yitwara neza muri Tour du Rwanda kuko hari aho yafashe umwanya wa mbere

Mu ntera ya Kigali-Huye muri Tour du Rwanda 2018, Uwiyeze yegukanye umwanya wa kabiri

Yahawe igihembo nk’uwahatanye kurusha abandi

 

TANGA IGITEKEREZO

Leave a Reply

Your email address will not be published. Required fields are marked *