20°C , Partly sunny | Kigali-Rwanda

Amagare: Umutoza Magnell ashobora kutongererwa amasezerano

Yanditswe na BUGINGO FIDELE

Ku ya 13-10-2020 saa 08:09:13
Umutoza Sterling Magnell

Umutoza w’ikipe y’igihugu y’umukino w’amagare mu Rwanda, Sterling Magnell mu Gushyingo  2020 ni bwo amasezerano ye azaba ageze ku musozo gusa  aya masezerano ashobora kutongerwa.

Perezida w’ishyirahamwe ry’ umukino wo gusiganwa ku magare mu Rwanda “FERWACY”, Murenzi Abdallah yagize ati: “Tuzicara turebe  umusaruro yaduhaye ni uwuhe? Uwo twamwifuzagaho ni uwuhe?”

Yakomeje agira ati: “Ikerekezo gishya dufitiye ikipe  y’igihugu  turifuza umuntu utari umutoza w’ikipe y’igihugu gusa  utoza abantu  5 cyangwa 10 ahubwo  turifuza uwaza  akaba ari n’umuntu ufasha  mu kuzamura urwego rwa tekinike  y’umukino wacu. Dukeneye umuntu ushobora guhugura abandi atari uguhamagara abakinnyi gusa, ahubwo ari umutekinisiye uduherekeza mu rugendo rw’iterambere  ry’igare kuva mu bana bato kugeza  igihe amwakiriye mu ikipe y’igihugu.”

Mu mpera z’umwaka wa 2019, umutoza Sterling Magnell yagiranye ikibazo na Komite nyobozi ya FERWACY aho yari yanafashe gahunda yo gusezera mu ikipe y’igihugu.

Murenzi Abdallah watangiye kuyobora FERWACY mu Kuboza 2019 atangaza ko ibibazo uyu mutoza yari afite bagerageje kubikemura. Ati: “Yari afite ibibazo by’imihemberwe  itarakorerwaga ku gihe nk’uko abyifuza n’ibindi birebana n’ubuzima bwe bwa buri munsi,  aho dufatiye inshingano twagerageje gukemura icyo kibazo, ku buryo aya mezi yose ashize  ibibazo byose twagerageje kubikemura.”

Perezida wa FERWACY avuga ko hari ibyo yifuje bikigoye kubera amikoro bijyanye n’ibikoresho. Ati: “Murabizi ko  ibikoresho ikipe y’igihugu ikoresha  twabihawe na Perezida wa Repubulika mu 2015, hari ibyo twifuza tutarabonera  amikoro  ariko mu bufatanye n’inzego  zindi z’igihugu bizaboneka.”

Sterling Magnell ukomoka muri Leta Zunze Ubumwe z’Amerika yatangiye gutoza ikipe y’u Rwanda  kuva mu 2015.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.