Amagare: Uhiriwe ni we ufite amahirwe yo kwegukana Rwanda Cycling Cup 2019

Yanditswe na BUGINGO FIDELE

Ku ya 02-12-2019 saa 12:33:17
Uhiriwe Byiza Renus ufite amahirwe yo kwegukana Rwanda Cycling Cup 2019

Mu mpera z’iki cyumweru tariki 07 Ukuboza 2019 ni bwo hazaba isiganwa risoza amasiganwa ya Rwanda Cycling Cup 2019, iri siganwa  rya 8 rikaba rizazenguruka mu mujyi wa Kigali.

Mbere y’uko iri siganwa rikinwa, nk’uko tubikesha ishyirahamwe ry’umukino wo gusiganwa ku magare mu Rwanda “FERWACY”, Uhiriwe Byiza Renus ukinira ikipe ya Benediction ni we uyoboye urutonde mu kiciro cy’abakinnyi bakuru n’abatarengeje  imyaka 23 mu bagabo “Men Elites &U-23”.

Uhiriwe wazamukiye mu ikipe ya  Muhazi CG ubu akaba afite imyaka 18 y’amavuko  ni umwaka we wa mbere arimo gukina mu kiciro cy’abakuru. Muri Rwanda Cycling Cup  2019  yitwaye neza  mu masiganwa 6  yabashije gukina muri 7 amaze kuba yose hamwe.

Kugeza ubu Uhiriwe ni we uyoboye urutonde aho afite amanota 136. Mu masiganwa 6 yitabiriye  yabashije kwitwara neza yegukana isiganwa rya 6 ryakiniwe i Muhanga ari naryo ryatumye azamura amanota. Isiganwa atabashije gukina  ni  “Tour de Kigali” ryabaye tariki 03 Kanama 2019 ubwo yari  mu Buyapani aho yari yajyanye n’ikipe y’igihugu mu myitozo.

Uhiriwe akurikiwe na Nsengiyumva Shemu (Amis Sportifs) ufite amanita 116  naho ku mwanya wa 3 hakaza Uwiduhaye (Nyabihu CT) ufite amanota 98.

Aganira n’Imvaho Nshya, Uhiriwe Byiza Renus yatangaje ko bimushimishije kuba ari we uyoboye mu gihe ari gukina umwaka we wa mbere mu kiciro cy’abakuru. Yavuze ko isiganwa rya nyuma azaba acunganye na Nsengiyumva Shemu kuko ni we umuri hafi  cyane mu manota.

Yagize ati: Numva mfite ikizere ko nzegukana Rwanda Cycling Cup 2019, Nsengiyumva ni we tuzaba duhanganye ariko ndizera ko aya manota atazayakuramo.”

Kugira ngo Shemu arushe amanota Uhiriwe ni uko yakwegukana intera isigaye  hanyuma Uhiriwe Byiza Renus ntabashe gusoreza nibura mu bakinnyi 10 ba mbere.

Mu bakobwa, Ingabire Diane  ukinira Benediction ni we ufite amahirwe yo kwegukana Rwanda  Cycling Cup 2019 aho afite amanota 54 gusa akurikiwe na mugenzi we bakinana, Nzayisenga Valentine ufite amanota 52  naho ku mwanya wa 3 hakaza nanone mugenzi wabo, Mukashema Josiane ufite amanota 46.

Mu ngimbi “Men Juniors”, Hategekimana Jean Bosco ukinira ikipe ya Les Amis Sportifs ni we uyoboye n’amanota 45 akurikiwe na Bikorimana Elysee ukinira Benediction  akaba afite amanota 39 anganya na Muhoza Eric ukinira Amis Sporifs y’i Rwamagana.

Iri rushanwa rya Rwanda Cycling Cup ritegurwa na FERWACY ku nkunga ya Skol na Cogebanque ryatangiye gukinwa muri 2015 ryegukanwa na Nsengimana Jean Bosco (Benediction). Muri uyu mwaka wa 2019 yakinnye irushanwa rimwe gusa afite amanota 17 ari ku mwanya wa 31.

Muri 2016 ndetse na 2018, Rwanda Cycling Cup yegukanwe na Gasore Hategeka ubu ari ku mwanya wa 27 n’amanota 20. Byukusenge Patrick (Benediction) wegukanye iri rushanwa muri 2017 ubu ari ku mwanya wa 37 n’amanota 11. Munyaneza Didier umaze iminsi yitwara neza akaba yaregukanye n’irushanwa riheruka rya Rwanda Cycling Cup 2019  ryakiniwe i Musanze ari ku mwanya wa 7 n’amanota 80.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.