17°C , Partly cloudy | Kigali-Rwanda
Abakinnyi b'ikipe y'u Rwanda mu kiciro cy'abahungu bakuru ubwo bari bamaze kwambikwa umudari wa Feza

Amagare: U Rwanda  rwitwaye neza  ku munsi wa mbere wa shampiyona y’Afurika

Yanditswe na BUGINGO FIDELE

Ku ya 15-03-2019 saa 17:44:50

Ikipe y’u Rwanda yitwaye neza ku munsi wa mbere  wa shampiyona  aho yegukanye imidari 2 harimo uwa Feza mu kiciro cy’abahungu bakuru  ndetse n’uw’umuringa  mu kiciro k’ingimbi.

Abakinnyi b’ikipe y’u Rwanda mu kiciro cy’abahungu bakuru ubwo bari bamaze kwambikwa umudari wa Feza

Tariki 15 Werurwe 2019 ni bwo hatangiye shampiyona y’Afurika mu mukino wo gusiganwa ku magare “African Continental Cycling Championships 2019” mu mujyi wa Bahir Dar muri Ethiopia.

Kuri uyu munsi wa mbere habaye  gusiganwa n’igihe harebwa ibihe byakoreshejwe nk’ikipe “Team Time Trial”. Aha hasiganwa abakinnyi 4 bakagendera rimwe bagafata ibihe bya 3 ba mbere.

Mu kiciro cy’abahungu bakuru n’abatarengeje imyaka 23 “Men Elite &U-23”  basiganwe intera ya kilometero 50. Ikipe ya  Eritrea ni yo yegukanya umwanya wa mbere aho  bakoresheje  isaha 1 n’iminota 42.

Ku mwanya wa kabiri haje ikipe y’u Rwanda yari gizwe na Uwizeye Jean Claude, Mugisha Moise, Ndayisenga Valens  na Nsengimana Jean Bosco  aho yakoresheje isaha 1, iminota 3 n’amasegonda 53 naho ku mwanya wa 3 haza ikipe ya Ethiopia yakoresheje isaha 1, iminota 4 n’amasegonda 31.

Mu kiciro k’ingimbi “Men Junior” basiganwe intera ya kilometero 30. Ikipe ya Ethiopia ni yo yegukanye umwanya wa mbere aho bakoresheje iminota 41 n’amasegonda 23, Eritrea iza ku mwanya wa kabiri (41’36”­) naho ikipe y’u Rwanda yari igizwe na Uhiriwe Byiza Renus, Habimana Jean Eric, Gahemba Bernabe  na Muhoza Eric  isoreza  ku mwanya wa 3 aho yakoresheje iminota 42 n’amasegonda 57.

Ikipe y’ingimbi ubwo nabo bambikwaga umudari w’umuringa

Mu bakobwa bakuru “Women Elite &U-23”,  ikipe y’u Rwanda nta mudari yabashije kwegukana kuko mu gusiganwa  kilometero 30 yasoje ku mwanya wa 4. Ikipe yabaye iya mbere ni Ethiopia ikurikirwa na Eritrea naho ku mwanya wa 3 haza Afurika y’Epfo.

Mu kiciro  cy’abangavu “Women Junior”  basiganwe kilometero 20,  Ethiopia yegukana umwanya wa mbere naho Eritrea iba iya kabiri. Muri iki kiciro u Rwanda rwajyanye umukinnyi umwe  ku buryo atari gukina.

Kuri uyu wa Gatandatu tariki 16 Werurwe 2019 harakinwa ikiciro gishya aho abakinnyi  bakina bavanze abahungu n’abakobwa “Mixed Relay Elite & U-23” aho basiganwa intera ya kilometero 50. Abakinnyi bagomba gukina muri iki kiciro ni  Manizabayo Eric, Uwizeye Jean Claude, Nsengimana Jean Bosco mu bahungu na  Ingabire Beatha, Tuyishime Jacqueline  na Mukundente Genevieve.

Umunsi wa  gatatu  hazakina abakinnyi 7

Tariki 17 Werurwe 2019  hazaba gusiganwa n’igihe ariko umukinnyi ku giti ke “Indivual Time Trial”. Mu kiciro cy’abahungu bakuru n’abatarengeje imyaka 23 “Men Elite &U-23” hazakina Ndayisenga Valens na Mugisha Moise basiganwe intera ya kilometero 50.

Mu kiciro k’ingimbi “Men Junior”  hazakina Uhiriwe Byiza Renus na Habimana Jean Eric aho bazasiganwa mu ntera ya kilometero 30. Mu bangavu “Women Junior” hazakina Ingabire Diane mu ntera ya kilometero 15 naho mu bakobwa bakuru “Women Elite &U-23”   hakine Ingabire Beatha na Tuyishimire Jacqueline mu ntera ya kilometero 30.

TANGA IGITEKEREZO

Leave a Reply

Your email address will not be published. Required fields are marked *