19°C , Partly cloudy | Kigali-Rwanda
Hadi Janvier nyuma y'imyaka isaga ibiri agiye kongera guserukira u Rwanda mu masiganwa mpuzamahanga

Amagare: Nyuma y’imyaka isaga ibiri, Hadi agiye kongera guserukira igihugu

Yanditswe na BUGINGO FIDELE

Ku ya 01-03-2018 saa 07:30:14

 Kuva tariki 10 kugeza 18 Werurwe 2018, ikipe  y’u Rwanda igizwe n’abakinnyi 6 izaba iri muri Cameroun aho izitabira isiganwa “Tour du Cameroun 2018”.

Hadi Janvier nyuma y’imyaka isaga ibiri agiye kongera guserukira u Rwanda mu masiganwa mpuzamahanga

Muri aba bakinnyi 6 bazaserukira u Rwanda barimo Hadi Janvier wari umaze imyaka isaga ibiri adaserukira u Rwanda nyuma y’aho yari yarasezeye gukina uyu mukino gusa akaza kugaruka.

Hadi Janvier yaherukaga gukinira ikipe y’igihugu mu irushanwa mpuzamahanga muri Tour du Rwanda 2015. Muri 2016 yahise ajya mu ikipe ya Bike Aid atagiriyemo ibihe byiza dore ko  muri Kanama 2016 yatangaje ko ahagaritse uyu mukino  ariko nyuma mu Kwakira 2017 agasaba imbabazi akanazihabwa.

Uyu mukinnyi ufite imyaka 26 akaba yarakoze amateka muri 2015 yegukana umudali wa zahabu muri “All African Games 2015” muri iri siganwa agiye kwitabira muri Cameroun azaba ari kumwe na Gasore Hategeka, Uwizeyimana Bonaventure, Nsengimana Jean Bosco, Ruberwa Jean Damascene na  Tuyishimire Ephrem.

Hadi Janvier akaba atangaza ko yishimye kongera kugaruka mu ikipe y’igihugu nyuma y’igihe kirekire yarahagaritse. Avuga ko yiteguye kongera guhesha ishema igihugu kuko yumva afite ubushake ndetse n’imbaraga kandi ko ajyanye n’abakinnyi bakomeye bashobora gufatanya bakitwara neza.

Iyi kipe izahaguruka mu Rwanda tariki 08 Werurwe 2018 izajyana n’umutoza Munyankindi Benoit ari kumwe na Karasira Theoneste nk’umukanishi ndetse na Kayinamura Patrick ushinzwe kunanura imitsi abakinnyi “Masseur”

Iri rushanwa rigiye kuba  ku nshuro ya 16  ryatangiye gukinwa mu 1965,  muri iyi myaka 3  ishize ikipe y’u Rwanda yitwaye neza dore ko  muri 2015, Bintunimana Emile yasoje mu bakinnyi 3 ba mbere inyuma ya Abessolo Clovis Kamzong  wo muri Cameroun ari nawe waryegukanye ndetse na Rasmane Ouedraogo  wo muri Burkina Fasso wabaye uwa 2.

Muri 2016 Hakuzimana Camera nawe yasoje ku mwanya wa 3 aho Mohamed Er-Rafai wo muri Maroc wayegukanye na  Alexis Carlier  ukomoka mu Bufaransa wabaye uwa 2. Muri 2017, ikipe y’u Rwanda nta bwo yitwaye neza kuko Ndayisenga Valens ni we wasoje hafi ku mwanya wa 10,  naho Nikodemus Holler  ukomoka mu Budage akaba akinira Bike Aid aryegukana akurikirwa na  Salah Eddine Mraouni  wo muri Maroc na Adne Van Engelen ukomoka mu Buholandi aba uwa 3.

Uko abakinnyi b’u Rwanda bagiye bitwara

Muri 2015, Bintunimana yegukanye intera ya kabiri (Bafia-Bangangte), intera ya gatatu aba uwa kabiri naho intera ya 8 aba uwa 3. Muri 2016, Nsengimana Jean Bosco wakiniraga Bike Aid yegukanye intera ya  5 ya Douala-Kumba naho muri 2017, Ukiniwabo  yabaye uwa 3 mu ntera ya 5,  Uwizeyimana Bonaventure aba uwa 2 mu ntera ya 6 naho Nsengimana Jean Bosco aba uwa 2 mu ntera ya 7.

 

TANGA IGITEKEREZO

Leave a Reply

Be the First to Comment!

avatar