19°C , Partly sunny | Kigali-Rwanda

Amagare:  Ntiyamira yatorewe kuyobora umuryango w’Abakomiseri b’uyu umukino  mu Rwanda

Yanditswe na BUGINGO FIDELE

Ku ya 20-07-2020 saa 14:55:50
Ntiyamira Jean Sauveur watorewe kuyobora umuryango w’abakomiseri b’umukino w’amagare mu Rwanda “OCCR”.

Ntiyamira Jean Sauveur usanzwe ari umukomiseri mpuzamahanga mu mukino wo gusiganwa ku magare yatorewe kuyobora umuryango w’abakomiseri b’umukino w’amagare mu Rwanda “OCCR”.

Aya matora yabereye mu nama y’inteko rusange yabaye tariki 18 Nyakanga 2020  aho yari yitabiriwe n’abakomiseri 21. Uretse gutora komite nyobozi, komite ngenzuzi n’akanama nkemurampaka banashyizeho amategeko shingiro agenga uyu muryango.

Nyuma yo gutorerwa kuyobora uyu muryango, Ntiyamira yatangarije Imvaho Nshya ko  bashatse gushinga uyu muryango ndetse bakawushakira ubuzima gatozi kugira ngo ube umuryango uzwi mu rwego rw’amategeko hanyuma  bazasabe ishyirahamwe ry’umukino w’amagare mu Rwanda “FERWACY” kubemeza bagakorana nk’umunyamuryango.

Akomeza avuga ko   ibi bizatuma imikorere n’imikoranire inoga kurushaho uko bakoranaga mbere kuko byose bizajya binyuzwa mu muryango.

Ntiyamira avuga ko ubu bafite abakomiseri 21 bashobora kwiyongera aho bafite intego yo  kubashakira amahugurwa yaba abashya ndetse n’abasanzwemo.

Yagize ati:  “Kugira ngo dukomeze guteza imbere umukino w’amagare,  FERWACY nizajya ibona amahugurwa izajya  ibinyuza mu muryango natwe tugene abagomba kuyajyamo. Ikindi ni uko tuzandikira FERWACY ikadusabira ishyirahamwe ry’uyu mukino ku Isi  (UCI)  ko bakohereza umukomiseri mpuzamahanga akaza agatanga amahugurwa akaba ari twe tugomba gutanga urutonde rw’abagomba guhugurwa”.

Komiseri mu mukino w’amagare akaba ameze nk’umusifuzi mu yindi mikino aho aba ari we ushinzwe kureba no gukurikirana ko amategeko yubahirizwa mu gihe k’isiganwa.

Abagize Komite 

Muri komite nyobozi hatowe Ntiyamira Jean Sauveur nka Perezida, Ingabire Claudine atorerwa kuba Visi  Perezida. Umunyamabanga yabaye Kayinamura Idée Patrick naho umubitsi aba Muhinda James.

Mu bajyanama hatowe Umugwaneza Devotha na Uwambaje Eugene. Muri komite ngenzuzi hatorwa Habimana Louis   nka Perezida, Visi Perezida aba Kabano Gilles  naho Ingabire Henriette aba umunyamabanga.

Nshimayezu Viateur yatorewe kuba Perezida w’akanama nkemurampaka, Visi Perezida aba Kubwimana Patience naho Umunyamabanga aba Batamuriza Diane.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.