22°C , Partly sunny | Kigali-Rwanda

Amagare: Nkurunziza afite intego yo kuzegukana  Rwanda Cycling Cup 2019

Yanditswe na BUGINGO FIDELE

Ku ya 09-10-2019 saa 08:42:51
Nkurunziza Yves ubwo yari mu myitozo mu mujyi wa Monaco mu Bufaransa

Nkurunziza Yves usanzwe ari umukinnyi w’ikipe ya Benediction Excel Energy  mu mukino wo gusiganwa ku magare ndetse n’ikipe y’igihugu,  kuva tariki 04 Kanama kugeza 02 Ukwakira 2019 yari mu  gihugu cy’u Bufaransa mu mujyi wa Monaco mu myitozo ndetse anakina mu marushanwa atandukanye.

Nyuma yo kugaruka mu Rwanda, Nkurunziza aganira n’Imvaho Nshya yagaragaje byinshi yungutse mu gihe yamaze hariya ndetse n’intego afite mu marushanwa atandukanye agiye kwitabira.

Yagize ati: “ Nagezeyo banyakira neza gusa nasanze hashyushye cyane  bibanza kungora ariko nyuma ndamenyera nkora imyitozo ndetse nitabira n’amarushanwa atandukanye.”

Nkurunziza avuga ko yitabiriye amasiganwa 7 muri yo abasha gusoza 4 na ho andi 3 ntiyabasha kuyasoza. Ati: “Muri rusange  byagenze neza nabashije kwiga  byinshi ku mukino wo gusiganwa ku magare  birimo uko umuntu akina cyane mu bakinnyi benshi  mbese nahakuye ubunaribonye.”

Yakomeje avuga ko hariya atari kimwe no mu Rwanda kuko isiganwa ryaho  abakinnyi baba bafite umuvuduko uri hejuru ndetse n’uburyo babaho butandukanye cyane.

Ati : “Hariya umukinnyi ni ugukora imyitozo imyitozo bakaruhuka  bagakina irushanwa gutyo gutyo  n’iyo baruhuka baba bareba  amashusho  y’amasiganwa y’amagare. Icyo nize ni uko ngomba gukunda umukino wo gusiganwa ku magare nk’akazi kange kandi  ngashyiramo imbaraga.”

Intego yihaye ni ukwegukana Rwanda Cycling Cup 2019

Nkurunziza Yves mbere yo kwerekeza mu Bufaransa yabaje kwegukana intera ya kabiri ya Rwanda Cycling Cup 2019 yakiniwe mu Mujyi wa Kigali “Tour de Kigali 2019” tariki 03 Kanama 2019.

Nk’uko abitangaza ubu kuva tariki 07 Ukwakira 2019 yasubukuye imyitozo yitegura  intera ya 5 ya Rwanda Cycling Cup 2019 izakinirwa i Huye “Huye Circuit” tariki 19 Ukwakira 2019.

Nkurunziza yagize ati : “ Ubu nakomeje imyitozo kandi ndumva mfite intego, nta yindi ni iyo gukomeza kwitwara neza nkazegukana Rwanda Cycling Cup 2019”.

Uyu mukinnyi ufite imyaka 19 y’amavuko ashobora no kwitabira andi marushanwa atandukanye mpuzamahanga arimo irizabera muri Cameroun na Burkina Faso.

Aha Nkurunziza yari kumwe na Mugisha Samuel mu irushanwa ryabereye mu Butaliyani

Nkurunziza Yves yakinnye amasiganwa atandukanye

Mu masiganwa 7 yose yakinnye, 4 yabashije gusoza

Ubwo Nkurunziza Yves yegukanaga intera ya 2 ya Rwanda Cycling Cup 2019 mbere yo kwerekeza mu Bufaransa

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.