20°C , Partly cloudy | Kigali-Rwanda
Umuyobozi w'ikipe ya Benediction Excel Energy, Munyakindi Benoit wemeza ko bazategura amasiganwa abiri muri Kamena na Nyakanga 2019

Amagare: Muri Kamena na Nyakanga 2019, Benediction izategura amarushanwa abiri

Yanditswe na Bugingo Fidèle

Ku ya 14-05-2019 saa 18:39:09

Ubuyobozi bw’ikipe ya Benediction Excel Energy buratangaza ko muri Kamena na Nyakanga 2019 bazategura amarushanwa abiri azabera mu mujyi wa Rubavu aho iyi kipe ibarizwa.

Ubusanzwe iyi kipe mbere y’uko ijya ku rwego rw’amakipe y’ababigize umwuga ku rwego mpuzamahanga yari isanzwe itegura irushanwa ryo kuzenguruka umujyi wa Rubavu “Criterium de Gisenyi”.

Uyu mwaka rero iyi kipe ikaba izongera aya marushanwa akaba abiri akazanajya ku ngengabihe y’amasiganwa mu Rwanda kuko hari asanzwe ategurwa n’ishyirahamwe ry’umukino wo gusiganwa ku magare mu Rwanda “FERWACY”.

Umuyobozi w’ikipe ya Benediction Excel Enery, Munyakindi Benoit yagize ati : “Ni irushanwa risanzwe kuko buri mwaka twariteguraga ariko ubu tugiye kurishyira ku ngengabihe y’amarushanwa mu Rwanda.”

Munyankindi ariko avuga ko batari bagenda amatariki kuko hari hakinozwa gahunda y’amarushanwa asanzwe “Rwanda Cycling”. Ati: “Twamaze kumvikana n’abategura mu minsi iri imbere tuzababwira amatariki gusa mu mezi abiri Kamena na Nyakanga 2019 aya marushanwa agomba kuba yakinwe.”

Uyu muyobozi usanzwe ari na Visi Perezida wa FERWACY avuga ko aya marushanwa abiri azaba ari ku rwego rwo hejuru kandi yihuta kugira ngo bizamura urwego rw’imikinire rw’abakinnyi ba Benediction Excel Energy ndetse n’abandi muri rusange kuko hazatumirwamo abakinnyi babyifuza bose babyifuza mu Rwanda.

Aya masiganwa azaba ku bufatanye na Excel Energy n’abandi baterankunga batandukanye barimo Inyange n’abandi basanzwe bafatanya n’iyi kipe ya Benediction Excel Energy.

Amani Delphin, umuyobozi wa Excel Energy yatangaje ko ari abafatanyabikorwa n’ikipe ya Benediction nyuma y’uko yabagejejeho umushinga mugari bakumva bafite intego nziza zo kuzamura umukino wo gusiganwa ku magare.

Yakomeje avuga ko batangiranye n’iyi kipe mu ntangiriro z’uyu mwaka wa 2019 aho bakinnye irushanwa rya Tour du Rwanda 2019 ryabaye tariki 24 Gashyantare kugeza 03 Werurwe 2019 aho yasoreje ku mwanya wa 6 mu makipe 16 yitabiriye.

Amani avuga ko uyu musaruro bawishimiye kandi bazakomeza gufatanya n’iyi kipe cyane cyane mu marushanwa yandi atandukanye harimo n’aya iyi kipe izategura azakinirwa i Rubavu. Kuri ubu iyi kipe ikaba iri muri Afurika y’Epfo aho yitabiriye “Tour de Limpopo 2019” kuva kuri uyu wa Gatatu tariki 15 kugeza 18 Gicurasi 2019.

Umutoza w’iyi kipe, Simon Hupperetz avuga ko aya marushanwa azabafasha cyane kuko abakinnyi bo mu Rwanda bamenyere amarushanwa menshi kugira ngo bage bahora bari ku rwego rwiza.

Umuyobozi w’ikipe ya Benediction Excel Energy, Munyakindi Benoit wemeza ko bazategura amasiganwa abiri muri Kamena na Nyakanga 2019

TANGA IGITEKEREZO

Leave a Reply

Your email address will not be published. Required fields are marked *