Amagare: Munyaneza yavuze ibanga bakoresheje kugira ngo begukane Tour du Senegal 2019

Yanditswe na BUGINGO FIDELE

Ku ya 19-11-2019 saa 19:11:08
Nyuma yo kwegukana Tour du Senegal 2019, Munyaneza Didier yashyikirijwe igikombe

Urutonde rusange (1023.3 km)
1. Munyaneza Didier 26h08’03”
2. Keller Hermann 26h08’12”
3. Canecky Marek 26h08’54”
4. Lienert Thomas 26h10’54”
5. Kubis Lukas 26h11’36”

Munyaneza Didier ukinira ikipe ya Benediction Excel Energy ndetse n’ikipe y’u Rwanda yegukanye isiganwa mpuzamahanga ryaberaga muri Senegal “Tour du Senegal 2019” kuva tariki 10 kugeza 17 Ugushyingo 2019.

Uyu mukinnyi  wayoboye isiganwa  kuva  ku ntera ya kabiri  yageze ku ntera ya nyuma ya 7 arusha umukurikiye, Keller Hermann amasegonda 15.  Iyi ntera ya 7, abasiganwa bazengurutse   mu mujyi wa Dakar aho basoje bakoze kirometero 106 maze  Munyaneza aza ku mwanya wa 5 mu bakinnyi 14 bose bakoresheje ibihe bingana n’uwaje ari uwa mbere, Lienert Thomas aho bose bakoresheje amasaha 2, iminota 36 n’amasegonda 44.

Ibi byatumye Munyaneza Didier asoza isiganwa akiri ku mwanya wa mbere  aho muri kirometero 1023,3 yakoresheje amasaha 26, iminota 8 n’amasegonda 03 akurikirwa na Keller Hermann ukinira ikipe ya Embrace The World mu  Budage wakoresheje amasaha 26, iminota 8 n’amasegonda 12  aho  hagati ye na Munyaneza  harimo ikinyuranyo cy’amasegonda 9.

Mu rukerera rwo ku wa Kabiri tariki 19 Ugushyingo 2019 ni bwo ikipe ya Benediction Excel Energy yageze mu Rwanda ivuye muri Senegal maze Munyaneza ashishura ibaga ryatumye  bitwara neza bakegukana Tour du Senegal 2019 yari ibaye ku nshuro 18.

Yagize ati: Nta rindi banga twakoresheje ahubwo nari maze kwitabira amarushanwa muri Burkina Faso na Cameroun kandi yose ari ahantu hatambitse kandi hanashyushye kimwe no muri Senegal.”

Umutoza Sempoma Felix yavuze ko isiganwa ryari rikomeye kuko  amakipe  yitabiriye nayo yari akomeye arimo Embrace The World yo mu Budage, Dukla Banska Bystrica (Slovakia) n’andi yo muri Afurika. Yavuze ko bagerageje gushyiramo ibihe ku ntera ya kabiri aho bakoresheje uburyo bwo gutoroka igikundi  birabakundira n’ubwo bagiye bakuramo bya bihe ariko bikarangira insinzi bayegukanye.

Iri ni isiganwa rya mbere mpuzamahaga, Munyaneza Didier yegukanye kuva yatangira kwitabira amarushanwa mpuzamahanga muri 2017. Uyu mukinnyi ufite imyaka 21 y’amavuko yagiye yitabira amasiganwa menshi atandukanye yitwara neza akanafasha bagenzi be gutsinda.

Munyanenza yegukanye iri siganwa muri rusange   nta ntera   atwaye uretse ko yaje ku mwanya wa 3 ku ntera ya kabiri ari bwo yayoboraga isiganwa muri rusange.  Munyaneza Didier yanegukanye umwanya wa mbere mu kiciro cy’abakiri bato.

Abandi bakinnyi imyanya basojeho

Benediction Excel Energy yari yajyanye abakinnyi 5, uretse Munyaneza Didier wasoreje ku mwanya wa 1, Manizabayo Eric yasoreje ku mwanya wa 8, Nzafashwanayo Jean Claude (14), Byukusenge Patrick (18) na Nkurunziza Yves (29).

Benediction Excel Energy yaba iya 3

Iyi kipe ya Benediction Excel Enery yitwaye neza yegukanye umwanya wa 3 riba irushanwa rya kabiri  yitwayemo neza nyuma yo kwegukana  Tour de la RDC 2019.  Ku mwanya wa mbere haje ikipe ya  Dukla Banska Bystrica (Slovakia),     ikurikirwa na Team Embrace The World. Ku mwanya wa 4 haje Cote d’Ivoire, RDC (5), Senegal (6), Benin (7) na Senegal Mixed Team (8). Abakinnyi 43 ni bo batangiye isiganwa hasoza 38.

Benediction Excel Energy ubwo bari bagiye gutangira isiganwa ku ntera ya nyuma

Bari kumwe n’Abanyarwanda baba muri Senegal

Abakinnyi ba Benediction bayoboye isiganwa

N’aha bari imbere

Kubona umwanya wa mbere byabasabye imbaraga

Abanyarwanda baba muri Senegal bari bahagaze ahantu hose bashyigikira ikipe

Aha bari bafite n’ibirango by’igihugu

Nyuma y’uko Munyaneza atsinze byari ibyishimo

Munyaneza yari yaje gushyikirwa n’Abananyarwanda mu ngeri zitandukanye

Bafashe n’amafoto y’urwibutso

Umutoza Sempoma nawe yarashimiwe

Munyaneza wegukanye isiganwa rye rya mbere mpuzamahanga

Ambasaderi w’u Rwanda muri Senegal, Harebamungu Mathias ari kumwe n’abandi bayobozi bamaze gushyikiriza Munyaneza igikombe

Abakinnyi ba Benediction bari kumwe n’abandi baje mu myanya ya mbere

Ubwo ikipe ya Benediction Excel Energy yari igarutse mu Rwanda

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.