20°C , Partly sunny | Kigali-Rwanda

Amagare: Munyaneza wanyuze mu buzima bugoye arifuza kuba umukinnyi ukomeye

Yanditswe na BIZIMANA ERIC

Ku ya 25-02-2018 saa 18:41:19

Munyaneza Didier bahimbye “Mbappe” ni umwe mu bakinnyi batanga ikizere cyo kuzigaragaza. Nyuma yo kubona impano ye, abanyamakuru bo mu Rwanda bamuhaye izina rya Mbappé bamugereranya na Kylian Mbappé, Umufaransa ukinira PSG yo mu Bufaransa, wazamutse vuba kandi yerekana impano idasanzwe.

Munyaneza Didier ubwo yaserukiraga u Rwanda muri shampiyona y’Afurika 2018 yabereye mu Rwanda

Nk’uko Munyaneza abisobanura ati “Kunyita Mbappé nabyumvise kuri Radiy. Si abakinnyi dukinana babinyise”.

Munyaneza ni umwana ufite impano, wicisha  bugufi kandi uhora akeneye kandi akubahiriza inama z’abamukuriye ahereye ku bo baturanye nka Hadi Janvier, Gasore Hategeka n’abandi baturuka  mu gace ka Sashwara muri Nyabihu bamufashije mu buzima  bubi yabayemo nyuma yo kubura nyina na mukuru we.

Munyaneza ni muntu ki?

Yabonye izuba tariki 01 Mutarama 1998  mu Karere ka Nyabihu. Ni umuhererezi mu muryango w’abana batandatu (abakobwa bane n’abahungu babiri) ba Havugimana Patrice na Nyakwigendera Uwizeyimana Verediyana wapfuye  Munyaneza afite imyaka ibiri.

Yize amashuri atandatu abanza kuri GS Kora, yiga umwaka umwe w’amashuri yisumbuye kuri GS Kora muri Nyabihu, ubundi ava mu ishuri burundu ku mpamvu z’amikoro.

Yatangiye gukina umukino w’amagare muri 2013, nyuma muri 2014 ajya mu ikipe ya Benediction ariko umwaka ujya kurangira arahagarika yongera kugaruka muri  Kamena 2015.

Ibihe bikomeye by’ingenzi yagezeho nk’umukinnyi w’amagare ni ukwegukana umwanya wa gatatu muri Tour du Rwanda ya 2017  mu ntera ndende ya Nyanza -Rubavu, anasoza Tour du Rwanda ku mwanya wa 8 ku rutonde rusange.Yanabaye uwa 9 ku rutonde rusange muri shampiyona y’Afurika iheruka kubera mu Rwanda, binamushyira ku mwanya wa 981 mu bakinnyi bose bo ku isi kuri uyu munsi.

Yavuye mu ishuri ajya kuba umunyonzi akiri umwana

Munyaneza avuga ko yaretse kwiga  nyuma y’imyaka 3 apfushije mukuru we wari ufite butike wamuhaga  ibikoresho,  binahurirana n’uko bashiki be bari baramaze gushaka abagabo.

Uyu musore avuga ko bitamworoheraga kubona abagenzi kuko bamwe bavugaga ko batatwarwa n’umwana kuko yabatura hasi. Ati: “Hari abavugaga bati ubu koko uyu mwana  yanshobora? Gusa hari bamwe bangiriraga ikizere, nange ngeraho ndamenyera n’ubwo nari mfite urubavu ruto ariko narwanaga no kugira ubunararibonye kugira ngo batanga ko mbatwara nkabura akazi kandi ariho ubuzima bwange bwari bushingiye”.

Muri rusange, Munyaneza yakoreraga amafaranga ari hagati ya 1500  na 2000 agakuramo aya nyiri igare ku buryo yashoboraga gucyura 800. Ntiyigeze abasha kwigurira irye bwite kubera amafaranga  yinjizaga,  gusa nyirarume yaje kubaha amafaranga we na bashiki be yose barayakusanya bayamuguriramo igare ryo gutwara abagenzi mu 2014.

Agitangira gukina umukino w’amagare yavaga  mu myitozo akajya gutwara abagenzi

Munyaneza wari uziranye na ba Hadi Janvier, Gasore Hategeka babaye kwa mukuru we cyane yaje gutangira kujya ajyana na bo banamuha ibikoresho nk’imyenda n’inkweto zo gukoresha binamubera imbarutso yo kujya mu magare asa n’ubakurikiye.

Mu ntangiriro za 2016, Munyaneza yitabiriye irushanwa ryateguwe n’umutoza Jock Boyer ryavaga i Rubavu rijya i Musanze  ntiyitwara neza kuko ari bwo yari akibona igare rya siporo.

Muri icyo gihe, yanabonye amahirwe yo guhabwa igare na Sempoma Felix watozaga Benediction nyuma yo kugaragaza ko hari icyo ashoboye, ku bw’amahirwe make aritwara iminsi mike ahita akora impanuka rirangirika  burundu, nyuma ariko bamuha irindi.

Muri izi ntangiro muri Benediction, Munyaneza yageze aho areka igare kuko yajyaga kwitoza amasaha atandatu yataha akajya gutwara abagenzi ashaka imibereho, ibintu yabonaga bishobora kuzatuma akora n’impanuka kubera isereri.

Munyaneza abisobanura muri aya magambo ati: ”Nta muntu nagiraga unyitaho ngo amfashe mu buzima busanzwe. Kugira ngo mbeho navaga mu myitozo kugira ngo ndye nkajya gutwara abagenzi, kandi nabaga nananiwe, byari bigoye pe, mpitamo kubireka. Nta muntu wanyirukanye, nge nararyamye  mbitekerezaho, ndavuga nti yego nkunda gukina umukino w’ igare ariko ndabona ubuzima bunaniye, aho kugundira igare ry’abandi hari undi ryafasha, reka nditange.”

Akomeza agira ati : “Narabyutse ndishyira Gasore nti ntabwo nzongera kurinyonga  bitewe n’ubuzima. Gasore yarambwiye ati ihangane,ndamubwira nti kuva kera narihanganye, ariko nawe reba kwitoza amasaha atanu nta kintu nabonye, nimvayo saa sita binsabe kujya gutwara abagenzi, aho gukora impanuka ndabiretse nisubiriye mu bagenzi mbeho mu buzima busanzwe kuko hari igihe wasanga atari n’ibyange”.

Gasore wari umaze kubona ntacyo yahindura yaramuretse nyuma y’igihe Munyaneza aza kubitekerezaho neza asubira kujya gusaba imbabazi Sempoma, bamusubiza igare.

Akigaruka, Munyaneza yafashe ikemezo cyo kugurisha igare yatwaragaho abagenzi  kugira ngo ajye akuramo amafaranga yo kurya avuye mu myitozo.

Munyaneza ati: “Ndibuka hari muri Kamena  2016, hari shampiyona y’u Rwanda, ndavuga nti ngiye gukina amasiganwa atatu, aya mafaranga ngiye kuyajyana mu myitozo nashira nta kintu mbonye nzataha njye kuba mayibobo.Twajyaga mu myitozo, umuntu yansiga nkabona ko nsizwe n’ubuzima, nange nashyizemo imbaraga ku buryo nagombaga guhangana uko byagenda kose kugira ngo ntazasubira inyuma kuko nari nziko inyuma atari heza”.

Muri iyo shampiyona y’u Rwanda, Uwizeyimana Bonaventure yagukanye umwanya wa mbere, Munyaneza aza ku mwanya wa gatatu, ikintu cyamugaruriye ikizere n’ubwo atahise abona amafaranga yose yatakaje ariko yakuyemo make yo kumufasha kwitoza.

Intego ni ugukina mu ikipe ikomeye

Munyaneza  ari kumwe na Habimana Jean Eric, Werurwe 2017    bagiye  muri Afurika y’Epfo aho bakoze amahurwa ku mukino wo gusiganwa mu nzu “Cycling Track” ndetse banitabira shampiyona y’Afurika “African Continental Track Championships 2017”.

Muri Mata 2017, Munyaneza yagiye muri Tour d’Eritrea ahari abakinnyi benshi bakomeye bamusize akabona ko agifite urugendo rurerure ntiyanayirangiza kubera uburwayi.

Muri Kanama 2017, Munyaneza wari utangiye kumenyera Rwanda Cycling Cup , ntiyabashije kurangiza shampiyona y’u Rwanda.

Muri Kanama 2017, yagiye muri Colorado Classic, isiganwa ryarimo abakinnyi bakina ya marushanwa yo ku rwego rw’isi, ibi binamufasha kwitwara neza muri Tour du Rwanda 2017 anarangiza ku mwanya wa 8.

Munyaneza yanakomeje kugaragaza imbaraga zidasanzwe muri La Tropicale Amissa Bongo 2018 afasha Areruya Joseph gukomeza  kwambara umwenda w’umuhondo mu minsi ya nyuma yo gutakaza abakinnyi babiri (Ndayisenga Uwizeyimana). Munyaneza kandi yanitabiriye irushanwa ry’Afurika ry’abatarengeje imyaka 23 muri Cameroun,  anafasha Areruya kwegukana iri siganwa ryari ribaye bwa mbere muri Afurika.

Muri shampiyona y’Afurika yabereye mu Rwanda, Munyaneza yegukanye umudali wa Bronze mu batarangeje imyaka 23 mu isiganwa ryo mu muhanda “Road race”.

Munyaneza yemeza ko amasiganwa amaze kwitabira yamuhaye ikizere no kumva ko yakora ibyo bakuru be batarakora. Ati: “Iyo umutoza ambwiye ngo urarinda runaka, ibyo ni byo nshyiraho umutima. Kumvira ni cyo nshyize imbere kugira ngo nteze imbere impano yange, ntere kirenge mu cya ba Areruya n’abandi. Aho numva ntashobouye ndabaza nti nakora iki? Kandi ndumva bizamfasha kuva mu Rwanda nkajya gukina ku mugabane w’u Burayi nk’uwabigize umwuga”.

Impamvu i Nyabihu haturuka abakinnyi bakomeye  

Munyaneza avuga ko kuba Nyabihu ari agace k’imisozi miremire hakaniyongeraho kuba abana baho batangira kugenda ku igare bakiri bato ari bimwe mu bituma haturuka abakinnyi bakomeye b’umukino w’amagare.

Munyaneza arasaba ko umukino w’amagare washyigikirwa

Munyaneza asaba Abanyarwanda n’abandi gushyigikira abana b’Abanyarwanda kuko hari benshi bafite impano. Ati “Ishyirahamwe ry’umukino rikwiye kongera imbagara mu makipe, hari abana benshi bakeneye kuzamuka, ariko ntibibakundire kubera ubushobozi buke bw’amakipe, ku buryo usanga ikipe ifite abakinnyi batarenga 20 kandi yakabaye ifite abakinnyi 100”. Akomeza vuga ko umubyeyi uzajya abona umwana agiye kwitoza age amufasha. Igare ryigisha ikinyabupfura.

 

 

 

TANGA IGITEKEREZO

Leave a Reply

Be the First to Comment!

avatar