Amagare : Mugisha yegukanye  isiganwa “Criterium Lambert Byemayire 2019”

Yanditswe na BUGINGO FIDELE

Ku ya 19-10-2019 saa 22:31:06
Abakinnyi bitwaye neza mu byiciro bitandukanye bari kumwe n'abo mu muryango wa Nyakwigendera Byemayire Lambert

Abakuru (112 km)

1. Mugisha Samuel 02h40’31”
2. Habimana Jean Eric 02h40’31”
3. Rugamba Janvier 02h40’31”

Ingimbi (84 km)

1. Bikorimana Elysee 02h06’47”
2. Hategekimana Jean Bosco 02h06’47”
3. Baraka Pacis 02h07’12”

Abagore (67,2 km)

1. Ingabire Diane 01h49’48”
2. Nzayisenga Valentine 01h49’48”
3. Ishimwe Diane 01h50’23”

Mugisha Samuel  wari usanzwe akinira ikipe ya Dimension Data for Qhubeka  ubu akaba ari mu Rwanda  ni we  wegukanye  isiganwa rya 5 rya “Rwanda Cycling Cup 2019”  ryabereye i Huye “Criterium Lambert Byemayire 2019” rikaba ryari ryahujwe no kwibuka Nyakwigendera Byemayire Lambert wari Visi Perezida w’ishyirahamwe ry’umukino wo gusiganwa ku magare mu Rwanda  “FERWACY” wapfuye muri 2016.

Iri siganwa ryabereye i Huye tariki 19 Ukwakira 2019 aho abasiganwe mu byiciro byose bazengurutse intera ya kirometero 5,5 bahagurukiye  imbere y’Isoko rya Huye bagakomeza kuri Hotel Casa – Huye District – Sitade Huye – Hotel Galileo – Petit Séminaire de Karubanda – Hôtel Twiga- Ku iposta – RRA – Ku Isoko.

Mu kiciro cy’abakuru n’abatarengeje imyaka 23 “Men Elites & U-23” bazengurutse inshuro 20 (112 km) , Mugisha Samuel  yegukanye umwanya wa mbere aho yakoresheje amasaha 2, iminota 40 n’amasegonda 31 akaba yaratsindiye ku murongo abakinnyi babiri, Habimana Jean Eric ukinira Fly na Rugamba Janvier ukinira ikipe ya Les Amis Sportifs y’i Rwamagana aho bose bakoresheje ibihe bimwe.

Mu bandi bakinnyi bakomeye bari bitabiriye, Mugisha Moise yasoreje ku mwanya wa 10, Uwizeye Jean Claude ku mwanya wa 11 na Nkurunziza Yves ku mwanya wa 13.

Mu bakinnyi 39 batangiye isiganwa muri iki kiciro, 27 ni bo babashije gusoza mu gihe 12 batasoje isiganwa.

Nyuma yo kwegukana iri siganwa, Mugisha Samuel yavuze ko byari bimeze neza kuko yaje afite intego zo gutsinda. Yakomeje avuga ko yarushije abo bari bahanganye ubunararibonye.

Mu kiciro k’ingimbi “Men Juniors” bazengurutse inshuro 15  (84 km), Bikorimana Elysee ukinira Benediction Excel Energy ni we wabaye uwa mbere aho yakoresheje amasaha 2, iminota 6 n’amasegonda 47. Yakurikiwe na  Hategekimana Jean Bosco (02h06’47”) na  Baraka Pacis (02h07’12”) ku mwanya wa 3.  Muri iki kiciro hatangiye abakinnyi 29 hasoza 13.

Mu bagore iyi ntera bayizengurutse inshuro 13 (67,2 km) maze  Ingabire Diane yegukana iyi ntera  akoresheje isaha 1, iminota 49 n’amasegonda 48 akaba  yahagereye rimwe na  Nzayisenga Valentine  naho ku mwanya wa gatatu hakaza  Ishimwe Diane (01h50’23”). Aba ba bakinnyi  bakaba bakinira ikipe ya Benediction Excel Energy. Muri iki kiciro hari hatangiye abakinnyi 11 hasoza 5.

Mbere yo gutangira isiganwa hafashwe umunota wo kwibuka Nyakwigendera Byemayire Lambert ahari umuryango we urimo umugore we n’abana be. Umugore we Francine Byemayire akaba ari na we watangije isiganwa.

Nyuma y’isiganwa habaye  umuhango wo gushyira indabo ku mva ishyinguyemo Nyakwigendera Byemayire Lambert ihereye inyuma ya Sitade Kamena.

Abakinnyi b’ikipe ya Benediction Excel Energy mu kiciro k’ingimbi mbere y’isiganwa

Abakinnyi bose mbere yo gutangira isiganwa

Buri wese abanza kureba yo yujuje ibyangombwa

Ubwo bari bategereje gutangira

Bamaze kujya ku murongo aho bagombaga gutangirira isiganwa

Abagize umuryango wa Nyakwigendera Byemayire Lambert bari kumwe n’abayobozi ba FERWACY ndetse n’abakinnyi babanje gufata umunota wo kwibuka Byemayire

Madamu Byemayire Francine atangiza isiganwa

Ubwo abakinnyi bari bahagurutse bagiye

Bikorimana Elysee witwaye neza mu kiciro k’ingimbi

Ingabire Diane wabaye uwa mbere mu bagore

Mugisha Samuel witwaye neza mu kiciro cy’abakuru

Mugisha ubwo yari asize bagenzi be

 

Isiganwa ntabwo ryari ryoshye

 Gushyira indabo ku mva ishyinguyemo Nyakwigendera Byemayire Lambert

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.